Lavisisa Tidyondzo Ta Bibele Hi Ku Hiseka
1 Ku ni vumbhoni lebyi andzaka bya leswaku nkarhi wa misava leyi ya khale wa hela. (2 Tim. 3:1-5) Xana leswi swi vula yini? Swi vula leswaku vutomi bya vanhu byi le khombyeni. Hambi swi ri tano, hi nga swi kota ku pfuna van’wana leswaku va pona. (Swiv. 3:27) Leswaku hi kota ku swi endla hi fanele hi hisekela ku sungula tidyondzo ta Bibele, hi ti fambisa.
2 Ku endliwe ntirho lowunene hi ku hangalasiwa ka tibuku ta hina leti sekeriweke eBibeleni. Kambe lexi vanhu va xi lavaka ngopfu i ku pfuniwa hi dyondzo ya Bibele leyi fambisiwaka nkarhi na nkarhi. Xana hi nga va pfunisa ku yini leswaku va kota ku swi vona sweswo?
3 Hi nga ha vutisa swivutiso leswi khumbaka vanhu vo tala. Swivutiso sweswo swi nga ha katsa leswi swi endlaka mahanyelo ma onhaka ngopfu, lexi endlaka vutomi bya ndyangu byi nga tiyi, lexi endlaka leswaku madzolonga ni vugevenga swi va nxungeto lowukulu, lexi endlaka leswaku Xikwembu xa rirhandzu xi pfumelela swiyimo leswi nga kona ni swin’wana. Xalamukela timhaka ni swiendlakalo leswi tsakisaka vanhu va nsimu ya ka n’wina. Kombisa tinhlamulo ta swivutiso leswi leti nga erivaleni ta Bibele. Kombisa ndlela leyi tibuku leti hi ti fambisaka ti nga va pfunaka ha yona ku dyondza leswi Bibele yi swi vulaka hi swilo leswi ni timhaka tin’wana ta nkoka leti khumbaka vutomi bya hina.
4 I swa nkoka ku kokela n’wini wa muti ebulweni. Xalamukela ku vona leswi a karhatekaka ha swona. Ndlandlamuxa bulo ra wena hi swilo leswi a swi tsakelaka ni leswi swi n’wi vilerisaka. N’wi kombise rungula leri nga ebukwini, broxara, magazini kumbe xiphephana lexi hlamuselaka nhlamulo ya Bibele eka swiphiqo swa vanhu. U nga si famba, tlakusa xivutiso xin’we kumbe swimbirhi leswi u vonaka leswaku swi ta n’wi endla a langutela riendzo ra wena leri landzelaka. Loko u vuya, tiyiseka leswaku u n’wi tsundzuxa swivutiso leswi, kutani u tirhisa tibuku ku n’wi pfuna a kuma tinhlamulo ta Bibele.
5 Ku sungula tidyondzo hi tlhela hi ti fambisa nkarhi na nkarhi swi nga hundzula vutomi bya vanhu. Hi fanele hi kombisa ku tsakela ka ntiyiso eka swilo leswi khumbaka vanhu lava hi hlanganaka na vona ensin’wini kumbe hi xitshuketa. Swi lava ku lunghiselela leswaku hi ya emahlweni hi pfuxa ku tsakela ka vona. Swi lava ku lehisa mbilu leswaku u hamba u vuyela ku kondza u va kuma nkarhi na nkarhi, u va wundla hi swilo swa moya. Swi lava ku rhandza vanhu. Hi fanele hi lava ku va pfuna hi xiviri leswaku va pona ndzoviso lowu tshinelaka. Ntirho wa hina wa dyondzo ya Bibele wu fanele ku khongeleriwa nkarhi hinkwawo, hi ku hiseka.—1 Tes. 5:17.
6 Hi kunguhata ku humesa switsundzuxo eka Vutirheli Bya Hina Bya Mfumo bya tin’hweti ti nga ri tingani leti landzelaka leswi swi nga ta pfuna vahuweleri ku fambisa tidyondzo ta Bibele leti endlaka nhluvuko. Hi kombela mi tsundzuka leswaku loko swi koteka, tidyondzo ta Bibele ti fanele ku fambisiwa hi buku leyi nge Hanya Hi Masiku. Buku ya vumbirhi leyi nga ta dyondziwa i buku leyi nge United in Worship. (Hi kombela u vona Bokisi Ra Swivutiso, kmTS 5/86.)
7 Swa khutaza swinene ku vona leswaku vanhu va kwalomu ka miliyoni va khuvuriwile eka malembe manharhu lama hundzeke. (Mt. 28:19, 20) Sweswi hi fambisa tidyondzo ta Bibele ta kwalomu ka mune wa timiliyoni ni hafu n’hweti na n’hweti, naswona leswi swi komba leswaku ha khumbeka hi vutomi bya van’wana. Wena ke? Xana u endle matshalatshala lamakulu yo hlanganyela entirhweni wa dyondzo ya Bibele? Tsundzuka, vutomi bya hina ni bya van’wana byi titshege hi vutshembeki bya hina emhakeni leyi.—Ezek. 3:17-19.