Pfuna Swichudeni Swa Bibele Swi Lunghiselela Dyondzo Ya Swona
1 Swichudeni swa Bibele leswi lunghiselelaka dyondzo ya swona vhiki na vhiki swi tsakela dyondzo hi mbilu hinkwayo naswona hakanyingi swi hatla swi endla nhluvuko wa moya ku tlula leswi swi nga lunghiseleliki. Nkarhi wun’wana xichudeni a xi lunghiseleli hi mhaka ya leswi xi nga yi tiviki ndlela ya kona. Swi nga ha lava leswaku u xi dyondzisa ku lunghiselela. Xana leswi swi nga endlisiwa ku yini?
2 Ku sukela eku sunguleni, tinyike nkarhinyana wa ku tiyisekisa leswaku xichudeni xa yi twisisa mhaka ya leswaku ku lunghiselela swi katsa dyondzo ya munhu hi xiyexe. Vanhu vo tala, hambi loko va swi kota ku hlaya, a va dyondzisiwanga ndlela ya ku dyondza. Matluka 33-43 ya Buku Yo Letela Ya Xikolo Xa Vutirheli Bya Le Tilweni ma nyika swiringanyeto swo tala leswi pfunaka leswi u nga swi nyikaka xichudeni loko swi laveka.
3 Komba Xichudeni Nkoka Wa Dyondzo: U nga ha komba xichudeni buku ya wena leyi u dyondzaka ha yona, leyi u nga yi fungha ni ku khwatihata marito-nkulu ni swivulwa eka yona. N’wi pfune a vona leswaku ku languta laha a nga fungha kona swi nga n’wi pfunisa ku yini leswaku a tsundzuka tinhla leti a nga kotaka ku ti vula hi marito yakwe. Kutani a nge hlayi ebukwini loko a hlamula swivutiso. Ku n’wi letela kahle enkarhini lowu swi ta n’wi pfuna leswaku a nyikela tinhlamulo leti twalaka eminhlanganweni ya vandlha. Tinhlamulo takwe ti ta kombisa ku twisisa mhaka leyi dyondziwaka ni ku paluxa vuento bya matwisiselo yakwe.
4 N’wi Dyondzise Ku Tirhisa Bibele: Xichudeni xi fanele ku dyondza ndlela yo kuma tindzimana ta matsalwa leti ku vulavuriwaka ha tona emhakeni leyi dyondziwaka. Loko a swi kota ku ti kuma kahle, u ta swi vona kahle leswaku i xichudeni xa Bibele hakunene. Hambi loko a ta rhanga hi ku lava ku tirhisa ntlhandlamano wa tibuku ta Bibele lowu nga eku sunguleni ka yona, xichudeni xi fanele ku khutaziwa leswaku xi tolovela ku landzelelana ka tibuku ta Bibele ta 66. Loko a phendlha tsalwa, a ri hlaya, n’wi pfune leswaku a vona xiphemu lexi seketelaka yinhla leyi boxiwaka endzimaneni leyi mi yi hlayaka naswona a nga tshuki a hlanganisiwa nhloko hi swiphemu leswi nga fambelaniki ni dyondzo yoleyo.
5 Loko xichudeni xi endla nhluvuko, xi khutaze ku hlaya Bibele ku sukela eku sunguleni ku ya emakumu. Kandziyisa leswaku Bibele hinkwayo i Rito ra Xikwembu leri huhuteriweke ni leswaku Vakreste va ntiyiso va fanele ku wundliwa hi rona emoyeni.—Mt. 4:4; 2 Tim. 3:16, 17.
6 Boxa Tinhlamuselo Tin’wana Ta Swa Le Tilweni: Loko xichudeni xi endle nhluvuko lowunene, xi nga sungula ku tirhisa tinhlamuselo tin’wana ta swa le tilweni. Hi ku twisisa, n’wi khutaze leswaku a languta rungula leri engetelekeke etibukwini ta Sosayiti leti a nga ta ti tolovela loko a va kona eminhlanganweni ya vandlha. N’wi dyondzise ndlela yo tirhisa swiyenge swo karhi swa New World Translation, tanihi “Bible Words Indexed.” Loko a sungula ku va ni layiburari yakwe ya tibuku ta swa le tilweni, n’wi kombe ndlela yo tirhisa Comprehensive Concordance, Reasoning From the Scriptures, Index, ni tivholumo ta Insight.
7 Loko hi dyondzisa swichudeni swa Bibele ndlela ya ku lunghiselela dyondzo ya swona ya Bibele, hi ta swi hlomisela leswaku swi ya emahlweni ni ntiyiso tanihi swichudeni swa Bibele leswi tiyeke hambi loko dyondzo ya swona ya le kaya ya Bibele se yi herile.