Dzunisani Mativula Ya Yehovha!
1 Hi Sonto, Nisan 9, 33 C.E., ntshungu lowukulu lowu khomeke marhavi ya mincindzu emavokweni ya wona wu dzunise N’wana wa mativula wa Yehovha, Hosi Yesu Kreste, tanihi “Hosi le’yi taka hi v̌ito ra Yehova!” (Lk. 19:38; Hev. 1:6) Hi Musumbhunuku ni Ravumbirhi, Nisan 10 na 11, Yesu a khomekile ngopfu hi vutirheli byakwe bya le rivaleni, u endle masiku lawo yo hetelela ma va man’wana ya masiku ya migingiriko swinene evuton’wini byakwe bya le misaveni.
2 Namuntlha, ntshungu lowukulu ngopfu lowu khomeke marhavi ya mincindzu yo fanekisela emavokweni ya wona wu huwelela hi marito lama tlakukeke wu ku: “Ku hlayiseka i ka Šikwembu ša hina le’ši ṭhameke šiluv̌elweni, ni ka Šinyimpfana.” (Nhlav. 7:9, 10) Hi March 26, hi ta hlangana leswaku hi tlangela Xitsundzuxo xa rifu ra Kreste. Tanihi leswi siku rero ri tshinelaka, xana hi nga antswisa matshalatshala ya hina evutirhelini, ivi xisweswo hi engetela ku huwelela loku ko dzunisa ka misava hinkwayo?
3 Andzisa Ntirho Wa Nsimu: Vahuweleri vo tala ana se va tsarise tanihi maphayona lama pfunaka hi March. Xana u nga rhandza ku va joyina? Loko swi ri tano, u nga hlweli ku tisa xikombelo xa wena. Un’wana wa vakulu u ta tsaka ku hlamula swivutiso swihi na swihi leswi u nga ha vaka na swona mayelana ni ntirho lowu.
4 Ku nga khathariseki leswaku u nga tirha tanihi phayona leri pfunaka kumbe e-e, u ta rhandza ku va ni xiphemu lexikulu evutirhelini hi March. Vandlha ri nga ha hlela ku chumayela hi ntlawa siku rin’wana ni rin’wana exikarhi ka n’hweti. Nsimu leyikulu yi fanele yi vekeriwa nkarhi wolowo.
5 Mavandlha hinkwawo ma fanele ma hlelela nhlangano wo hlawuleka wa vutirheli bya nsimu hi Mugqivela, March 26. Hambi leswi ku nga ta va ni swo tala leswi faneleke swi lunghiseleriwa Xitsundzuxo, ku khutaziwa leswaku un’wana ni un’wana la nga swi kotaka ku hlanganyela evutirhelini bya nsimu hi Mugqivela ni mixo a endla tano. Nakambe, loko u tirha hi yindlu na yindlu, tiyiseka leswaku lava u va rhambeke leswaku va va kona eXitsundzuxweni va ni xo famba naswona va wu tiva kahle nkarhi ni ndhawu ya nhlangano.
6 Rhamba Ni Ku Khutaza Van’wana: Yesu u lerise valandzeri va yena a ku: “Endlisani ŝeŝo mi nḍi anakanya ha ŝona.” (1 Kor. 11:24) Tanihi leswi valandzeri va mikondzo ya Yesu lava totiweke, va yingiseke xileriso xexo, nandza un’wana ni un’wana wa Yehovha wa rhambiwa leswaku a va kona naswona a tlangela nkhuvo lowu wa Xitsundzuxo. Van’wana lava u faneleke u va rhamba i swichudeni swa Bibele, maxaka, lava u tshameke u vulavurisana na vona hi Bibele, vanghana va vukati lava nga riki vapfumeri ni vanhu lava u tirhaka na vona. Tsala mavito ya vona leswaku u nga rivali munhu.
7 Ku ta va ni minkarhi leyi engetelekeke yo khutaza lava tsakelaka eXitsundzuxweni hi koxe. Tiyiseka leswaku u hatla u fika leswaku u ta xeweta lava sungulaka ku va kona. Loko swichudeni swa wena swa Bibele swi va kona, swi nga va swinene leswaku muhuweleri un’wana a tshama ni swin’wana swa swona hi nkarhi wa nhlangano. Rhamba vanhu lavantshwa leswaku va hlanganyela Minhlangano ya le Rivaleni ya vandlha nkarhi na nkarhi. Nkulu loyi a hlawuriweke ku nyikela nkulumo ya le rivaleni u fanele a lungheke kahle ku nyikela nkulumo leyi khutazaka.
8 Eku heleni ka nkhuvo wa Xitsundzuxo, loko hi hlanganisa marito ya hina hi yimbelela risimu 105, “Dzunisani Mativula Ya Yehovha!,” onge hi nga languta endzhaku hi eneriseka hi n’hweti yo hiseka ya ntirho wa le tilweni lowu dzunisaka Yehovha!