Bokisi Ra Swivutiso

◼ Xana Tidyondzo ta Buku ta Vandlha ti fanele ti fambisiwa rini?

 Hakanyingi i swinene ngopfu naswona swa pfuna ku va ni mintlawa yo hlayanyana ya dyondzo ya buku leyi hlanganaka etindhawini leti hambaneke ensin’wini hinkwayo ya vandlha ku tlula ku va hinkwenu mi hlangana eHolweni ya Mfumo. Tidyondzo leti ti fanele ti fambisiwa hi nkarhi lowu pfulekeleke vo tala va vanhu lava averiweke kwalaho. Hakanyingi, ti khomiwa eka madyambu ya le xikarhi ka vhiki laha ku nga hleriwangiki tidyondzo tin’wana kumbe mintirho ya nsimu. Hambi swi ri tano, swi nga va swinene ku endla lunghiselelo ra dyondzo ya buku ya ni nhlikanhi ku pfuna lava kuleke lava kanakanaka ku famba exinyamini ku katsa ni lava tirhaka ni vusiku. Eka swiendlakalo swo hlayanyana, swi nga va swinene ku va ni dyondzo ya ni nhlikanhi hi mahelo-vhiki.

 Vakulu va nga endla vulavisisi lebyi fanelaka ku vona leswaku hi yihi minkarhi ya nhlangano leyi nga “olovelaka vahuweleri vo tala” ku katsa ni lava va tsakelaka. (om-TS tl. 62) Nkarhi lowu hlawuriweke wu fanele wu va ni nhlikanhi naswona ku va nkarhi lowu nga taka wu nga kavanyeti ngopfu kumbe ku komisa nkarhi wa malunghiselelo lama hleriweke ya ntirho wa nsimu.