Vuyela Laha U Kumeke Ku Tsakela
1 Vo tala va hina hi humelerile eku fambiseni ka timagazini ni tibroxara. I swa nkoka leswaku hi vuyela naswona hi ringeta ku yisa ku tsakela emahlweni. Ku humelela eku endleni ka leswi, swi titshege hi ndlela leyi hi lunghiselelaka ha yona loko hi nga si endla riendzo ro vuyela.
2 Tsundzuka leswaku vantshwa vo tala va karhateka hi swilo leswi fanaka ni leswi karhataka lavakulu. Nkandziyiso wa May ni wa June wa Xalamuka! wu ni swihloko leswi kambisisaka swiphiqo swa sweswi hi ku ya hi mavonelo ya vantshwa. Swihloko leswi swi nyikela ku twisisa loku nga pfunaka vantshwa, ku katsa ni vatswari va vona, ku xiya leswi nga swa nkoka evuton’wini.
3 Loko u fambise “Xalamuka!” ya May 8, u nga ha kunguhata ku tlhandlekela hi ku fambisa nkandziyiso wa June 8. U nga ha ku:
◼ “Nkandziyiso wo hetelela lowu ndzi ku siyeleke wona a wu ri ni swihloko leswi a swi khumba mhaka ya ntshembo wa vana. Vantshwa va hina va boheka ku kula emisaveni leyi nga riki na ntshembo hi vumundzuku. Vo tala va vona va kombisa moya wo biha hi ku sihalala. Kambe va kona lava ringaniselaka va tlhela va hlayisa mimpimanyeto leyi tlakukeke. Xihloko lexi nga eka Xalamuka! ya sweswinyana xi hlamusela ndlela leyi huvo leyi tlakukeke yi seketeleke xiyimo xa n’wana wa kondlo a ndzi dyi ha yona. Ndza tshemba leswaku u ta tsakela leswi yi swi vulaka.”
4 U nga ha ehleketa ku fambisa broxara hi ku tirhisa xingheniso lexi:
◼ “Ndzi tsakele ku vulavurisana ka hina ko koma enkarhini lowu hundzeke mayelana ni vumundzuku bya misava leyi. Xana u nga ehleketa leswaku vutomi byi ta va njhani la misaveni loko Xikwembu xi herisa vubihi ni ku xaniseka? [N’wi kombise xifaniso lexi nga eka tluka 31 eka broxara leyi nge Xana Xikongomelo Xa Vutomi I Yini—U Nga Xi Kumisa Ku Yini?] Xiya tindzimana hinkwato ta Bibele leti nga eka matluka 29 na 30 leti hlamuselaka mikateko leyi nga ta tisiwa hi Mfumo wa Xikwembu. [Hlawula tsalwa rin’we, ivi u ri hlaya eka broxara hi ku kongoma.] Ndzi tsakela ku ku siyela yona hi munyikelo wa 90 wa tisente.”
5 Loko u tlhelela, kumbexana u nga kuma leswaku n’wini wa muti u kuma tibuku ta vukhongeri byakwe, naswona u tshemba leswaku swi ringene. U nga ha ku:
◼ “Ku nga khathariseki leswaku vukhongeri bya hina hi byihi, hinkwerhu hi khumbiwa hi ku karhateka ko tala loku fanaka—vugevenga, vuvabyi lebyikulu, ku karhateka hi mbango—xana a swi tano? [Yimela nhlamulo.] Xana u ehleketa leswaku wu kona ntlhantlho wa xiviri wa swiphiqo leswi? [Hlaya 2 Petro 3:13.] Xikongomelo xa tibuku ta hina xi tsariwe eka tluka 2 ra Xihondzo xo Rindza. [Hlaya xiga xin’we kumbe swimbirhi leswi u swi hlawuleke.] Vo tala lava nga riki Timbhoni ta Yehovha va tsakela ku hlaya tibuku ta hina hikwalaho ka leswi ti khomeke rungula leri nga ni ntshembo, leri sekeriweke eBibeleni.” Loko n’wini wa muti a angula kahle, hlamusela xiyimiso xa hina xa dyondzo ya Bibele kutani u n’wi fambisela timagazini ta sweswinyana.
6 U nga ha tirhisa xingheniso lexi:
◼ “Loko ndzi ri laha enkarhini lowu hundzeke, hi vulavule hi mintshembo ya vumundzuku bya misava ya hina. Xana u ehleketa yini hi xiviko lexi? [Boxa nhloko-mhaka yin’wana ya mahungu leyi vanhu va karhatekaka ha yona.] Loko vanhu va twa swo fana ni leswi, va tivutisa leswaku misava leyi yi hundzuka yini, xana a swi tano ke? Hi tshemba leswaku swilo swo fana ni leswi swi kombisa leswaku hi hanya ‘emasikwini ya makumu’ lawa ku vhumbhiweke ha wona eBibeleni eka 2 Timotiya 3:1-5.” Endzhaku ko hlaya tinhla-nkulu, u nga ha n’wi vutisa loko a tshame a vona vanhu lava faneriwaka hi nhlamuselo leyi. Yisa mbulavurisano emahlweni eka swin’wana swa swihlokwana leswi nga ebukwini leyi nge Reasoning, matluka 234-8.
7 Loko hi lunghiselela kahle naswona hi kombisa ku tsakela ka xiviri ko pfuna, hi nga tiyiseka leswaku vanhu va timbilu letinene va ta yingisela.—Yoh. 10:27, 28.