Landzelela Timagazini Leti U Ti Fambiseke
1 Yesu u khutaze valandzeri vakwe leswaku va tirhela ku endla vadyondzisiwa. (Mt. 28:19) Sweswo swi vula ku tlula ku fambisa tibuku ntsena; hi lava ku pfuna vanhu va endla nhluvuko wa moya. Ku endla tano hi fanele hi vuyela hi ya nyikela mpfuno lowu engetelekeke eka lava va kombisaka ku tsakela.
2 Loko u kandziyise xihloko eka wun’wana wa timagazini eriendzweni ra wena ro sungula, swi ta va swinene ku vulavula hi mhaka leyi fanaka loko u vuyela:
◼ “Loko ndzi ku endzerile enkarhini lowu hundzeke, ndzi ku kombise xihloko xa Xihondzo xo Rindza (kumbe Xalamuka!) lexi hi pfuneke ku vona leswaku hi fanele hi kambisisa Bibele. Xikongomelo xa Xikwembu xa vumundzuku lebyinene evanhwini xi titshege hi hulumendhe ya Mfumo wa xona. Mikiya 4:3, 4 yi tamele xitshembiso xakwe xa leswaku Mfumo wu ta herisa tinyimpi hinkwato.” Endzhaku ko hlaya tsalwa, humesa broxara leyi nge “Vonani”! ivi u kombisa xifaniso lexi nga eka xifunengeto. Kambisisani ndzimana yo sungula ni matsalwa lama kombisiweke eka ndzimana yoleyo, u n’wi kombisa leswaku Mikiya 4:3, 4 hi yin’wana ya tona. Endla malunghiselelo yo vuyela leswaku mi ya emahlweni ni mbulavurisano wa n’wina eka ndzimana 2.
3 Loko ku tsakela ka n’wini wa muti ku vonaka ku ri kutsongo kumbe a nga ri na nkarhi wo vulavurisana na wena, u nga ha ehleketa ku tsala vito rakwe entileni wa wena wa timagazini:
◼ “Tanihi leswi u kombiseke ku tsakela eka timagazini leti ndzi ku siyeleke tona enkarhini lowu hundzeke, ndzi ehlekete leswaku u ta tsakela minkandziyiso ya sweswinyana. Ndza tshemba leswaku xihloko lexi u ta xi tsakela hakunene.” N’wi kombise xihloko lexi u ehleketaka leswaku xi ta n’wi tsakisa. N’wi byele leswaku u ta vuya ni minkandziyiso leyi landzelaka.
4 Vini va miti van’wana va tsakela ku sungula hi ku hlaya timagazini va nga si ehleketa hi xikhokhelo. Exiyin’weni xo tano u nga ha tirhisa xingheniso lexi landzelaka:
◼ “Tanihi leswi u tikombaka u tsakela Xihondzo xo Rindza ni Xalamuka!, ndzi swi tsakerile ku ku tisela minkandziyiso ya sweswinyana loko yi ri karhi yi huma. Loko u swi tsakela, ndzi nga ha hlela leswaku yi rhumeriwa eka wena hi poso, u ta tiyiseka leswaku u kuma nkandziyiso wun’wana ni wun’wana. Xikhokhelo xa timagazini leti ha timbirhi i R28,50 naswona u ta kuma minkandziyiso leyi ringanaka 36 hi lembe.” Vini va miti van’wana va nga ha tsakela ku endla xikhokhelo xin’we ntsena xa timagazini kasi van’wana va nga ha tsakela ku sungula hi xikhokhelo xa tin’hweti ta tsevu.
5 Loko u fambise xikhokhelo eriendzweni ra wena ro sungula, swi ta va swa nkoka ku tlhelela hi xihatla hi laha u nga kotaka ha kona ku ya yisa emahlweni ku tsakela ka n’wini wa muti ivi u sungula dyondzo ya Bibele.
Loko u siye broxara leyi nge “Hulumendhe,” ku kombisa lunghiselelo ra dyondzo, u nga ha tirhisa xingheniso lexi landzelaka:
◼ “Xiya leswi tluka 3 ri hi byelaka swona mayelana ni xihloko xa rungula ra Yesu leri a ri dyondziseke loko a ha ri emisaveni.” Kutani hi ku komisa vulavula hi rungula leri nga le ka tluka 3. Vutisa n’wini wa muti leswaku u ehleketa leswaku i yini lexi lavekaka leswaku a dyondza swo tala. Kutani u ku: “I swa nkoka ku twisisa leswaku ha yini hi lava Mfumo wa Xikwembu hi ndlela leyi. Ndzi ta rhandza ku vuya ndzi ta vulavurisana na wena hi xivangelo xa ku va hi fanele ku languta hulumendhe ya Xikwembu yi ri yona ntshembo wa hina ntsena.”
6 Hambi loko n’wini wa muti a nga yi tsakeli dyondzo ya Bibele, tinyiketele ku vuya nkarhi na nkarhi ni minkandziyiso ya timagazini leta ha ku humaka ku kondza loko a sungula ku kuma xikhokhelo xakwe. Landzelela timagazini hinkwato leti u ti fambiseke naswona u khutaza vanhu lavanene leswaku va dyondza swilo swo tala leswi Yesu a swi leriseke.—Mt. 28:20.