Rito Ra Xikwembu Ri Ni Matimba
1 Bibele yi khumbe vutomi bya timiliyoni hi ndlela leyikulu swinene. Leswi yi swi vulaka swi ni nsusumeto lowukulu ku tlula swihi na swihi leswi munhu a nga swi endlaka. (Hev. 4:12) Vona leswi yi hi endleleke swona. Hakunene, nkoka wa yona a wu ringanisiwi na nchumu.
2 Timbhoni ta Yehovha i swichudeni leswi nga emahlweni swa Bibele ni vayimeri va yona. Hi fanele ku languta ku hlaya ka Bibele ku ri xiphemu xa nkoka xa xiyimiso xa hina xa le tilweni xa nkarhi na nkarhi, hi rhangisa kona ematshan’wini yo hlalela thelevhixini ni mintlango leyin’wana hinkwayo.
3 Swi Endle Mukhuva Wa Nkarhi Na Nkarhi: Vanhu va Yehovha va kote ku vona nkucetelo wa matimba lowu ku hlaya ka Bibele ka nkarhi na nkarhi ku nga vaka na wona. Ku ringana malembe layo tala mfungho lowukulu eka yin’wana ya miako ya fektri ya hina eBrooklyn a wu ri karhi wu khutaza vahundzi va ndlela leswaku va “Hlaya Rito Ra Xikwembu Bibele Leyo Kwetsima Siku Na Siku.” Swirho leswintshwa swa ndyangu wa Bethele swi languteriwa ku hlaya Bibele hinkwayo elembeni ra swona ro sungula ra ntirho wa le Bethele.
4 Ku nga khathariseki leswaku u tshama u khomekile kumbe e-e, xana u fambisana ni ku hlaya ka Bibele ka vhiki na vhiki loku ringanyetiweke, loku kombisiweke eka Xiyimiso xa Xikolo xa Vutirheli bya le Tilweni? Loko swi ku nonon’hwerile ku swi endla, ha yini u nga tikarhateli ku swi antswisa hi November? Ku hlaya ka Bibele ka n’hweti hinkwayo ku le ka Tipisalema 95-109, loku lavaka leswaku ku hlayiwa matluka ya kwalomu ka manharhu kumbe mune hi vhiki. Van’wana va hlawula ku hlaya switsongo siku rin’wana ni rin’wana, kumbexana ni mixo swinene kumbe va nga si lata rimbambu ni vusiku. Ku nga khathariseki leswaku u swi endlisa ku yini, nchumu wa nkoka hi leswaku u tshovela mikateko yo tala leyi kumiwaka hi ku hlaya Rito ra Xikwembu nkarhi na nkarhi.
5 Fambisa Buku Leyi Nge Rito Ra Xikwembu Hi November: Vanhu vo tala va ha yi xixima Bibele naswona va tiyimisele ku yingisela loko hi va hlayela yona. Hi November hi ta va hi fambisa buku leyi nge Bibele—I Rito Ra Xikwembu Kumbe I Ra Munhu? Leswi swi nyikela nkarhi lowunene wa ku kombisa vanhu va timbilu letinene nkoka wa Rito ra Xikwembu. Chivirikela ku endla sweswo.
6 Lunghiselela tinhlamuselo letinene malunghana ni nkoka lowunene wa buku leyi nge Rito Ra Xikwembu leti nga ta endla leswaku vanhu va tsakela ku va na yona. Ha yini u nga hlawuli xingheniso lexi nga eka buku leyi nge Reasoning, tluka 10, ehansi ka xihloko lexi nge “Bible/God”? Eka matluka 58-68 u ta kuma rungula rin’wana leri pfunaka eBibeleni. Ha yini mi nga pfuxeti rungula leri tanihi ndyangu mi nga si ya ensin’wini? Mi nga ha tlhela mi titoloveta swona, mi tirhisa swingheniso swihi na swihi leswi nga ebukwini leyi nge Reasoning kumbe swin’wana leswi mi swi kumeke swi humelela ensin’wini ya ka n’wina.
7 Tiyiseka leswaku u kombisa nkoka lowu tirhaka wa Bibele hi laha wu hlamuseriweke ha kona eka ndzima 12 ya buku leyi nge Rito Ra Xikwembu. Hikwalaho ka ku wa ka ikhonomi emisaveni hinkwayo, vanhu vo tala va tikarhatela ku kuma mali ni swilo leswi vonakaka swinene. U nga yisa nyingiso wa n’wini wa muti eka tindzimana 3 na 4 eka ndzima leyi, u kandziyisa ku ringanisela ni ndzayo ya vutlharhi eRitweni ra Xikwembu.
8 Ina, Bibele i Rito ra Xikwembu. Loko hi yi hlaya, hi yi tshemba naswona hi tirhisa ndzayo ya yona evuton’wini bya hina, hi ta vuyeriwa swinene. Yi tsaleriwe ku hi nyika swiletelo ni ntshembo. (Rhom. 15:4) I swa nkoka leswaku hi yi hlaya masiku hinkwawo ni leswaku hi tshama hi lunghekele ku yi tirhisela ku dyondzisa van’wana.