Dyondzo Ya Munhu Hi Xiyexe —I Mhaka Leyi Faneleke Ku Xiyisisiwa
1 I timhaka tihi leti hi ti xiyisisaka swinene? Hi fanele ku khumbeka swinene hi ku aka ni ku hlayisa vuxaka lebyikulu na Yehovha. Dyondzo ya munhu hi xiyexe yi endla xiphemu xa nkoka eku kuriseni ka vuxaka byo tano. Namuntlha, a hi vangani eka hina lava nga ni swiyimo leswi va pfumelelaka ku heta nkarhi wo tala va ri karhi va anakanyisisa ni ku endla dyondzo ya munhu hi xiyexe. Kambe, loko hi nga hlayi Rito ra Xikwembu nkarhi na nkarhi, hi nga tsana lerova hi nga vi na matimba yo lwisana ni moya wa misava, ni ku navela ka yona ka nyama.
2 Vana Ni Ku Navela Lokukulu Ka Rito: Loko hi sungula ku dyondza hi swikongomelo swa Xikwembu, swi le rivaleni leswaku a hi hisekela ku kuma vutivi lebyi engetelekeke. Hambi swi ri tano, hi ku famba ka nkarhi, ndlala ya hina ya swakudya swa moya yi nga ha va yi hungutekile. Ku nga ha va ku ri na xilaveko xo ‘va ni ku navela lokukulu’ ka swakudya swa moya. (1 Pet. 2:2) Xana hi nga ku kurisa njhani ku navela loku?
3 Nun’hwelo wa swakudya leswi hi swi rhandzaka wu nga vanga ndlala hikwalaho ka ku ehleketa ku nandziha ka swona. Dyondzo ya munhu hi xiyexe ya xinkarhana xo koma yi nga hi khumba hi ndlela leyi fanaka hi tlhelo ra moya. Ku dya swiphemu swi nga ri swingani leswo xawula swa swakudya swa moya swi nga kurisa ku navela ka hina mintiyiso leyi enteke. Vuyelo lebyi tisiwaka hi ku dyondza byi nga hi khutaza leswaku hi handzisisa Rito ra Yehovha.
4 Tivekele Nkarhi Lowu Ku Pfumelelaka Kahle: Van’wana va endla dyondzo ya munhu hi xiyexe madyambu hinkwawo, kasi van’wana va tsakela ku dyondza nkarhi wo koma, hi ku phindha-phindha. Loko u kuma leswaku u dyondza kahle eka tiawara to sungula ta ni mixo, u nga ha kunguhata ku dyondza u nga si fihlula. Loko u xalamuka swinene ni madyambu, u nga ha hlawula ku dyondza u nga si ya lata rivambu ni vusiku. Ku nga khathariseki leswaku xiyimo hi xihi, nchumu wa nkoka i ku dyondza nkarhi na nkarhi ni ku namarhela ndlela leyi fanelaka swiyimo swa wena.
5 Loko hi khutaziwa ku endla dyondzo ya munhu hi xiyexe hi laha ku engetelekeke, hi nga ha hatlisa ku kombisa leswaku ana se hi ni xiyimiso xa leswi hi swi endlaka nkarhi hinkwawo. Hambi swi ri tano, hinkwerhu ka hina hi fanele ku tshembeka eka ndlela leyi hi tirhisaka nkarhi wa hina ha yona. Xana tiawara to tala ta siku na siku ti tirhiseriwa ku hlalela thelevhixini? Xana hi tiyimisele ku titsona swilo swin’wana swa munhu hi xiyexe? Ku kambela ndlela leyi hi tirhisaka nkarhi wa hina hi xiviri swi ta kombisa minkarhi ya siku na siku leyi nga tirhisiwaka hi ndlela leyi humelelaka edyondzweni ya munhu hi xiyexe.—Ef. 5:15, 16.
6 Dyondzo ya Rito ra Xikwembu yi lava nyingiso wa hina lowu heleleke. Ku ringeta ku endla swin’wana hi nkarhi wun’we swi ta endla leswaku hi nga vuyeriwi ngopfu. Loko hi ri ni mboyamelo wo dyondza hi ri karhi hi dya, hi yingisela xiya-ni-moya kumbe hi hlalela thelevhixini, entiyisweni a hi nge fambisani ni leswi hi ringetaka ku swi dyondza. (1 Tim. 4:15) Hikwalaho ku ni xilaveko xo hambana ni swilo leswi kavanyetaka.—Vona Buku Yo Letela Ya Xikolo, matluka 33-4.
7 Ku dyondza ka siku na siku ni ku tirhisa ndzayo ya Bibele i swa nkoka hikuva leyi hi yona ndlela leyi hi kumaka nkongomiso lowu humaka eka Yehovha ha yona. Tivekele pakani yo nghenisa ntiyiso lowu kandziyisiweke embilwini ya wena. Tirhisa nkarhi hinkwawo lowu u nga na wona, ku nga khathariseki ku koma ka wona, u wu tirhisela ku hlaya, ku pfuxeta kumbe ku anakanyisisa hi swilo swa moya.—Det. 6:6-8; Kol. 1:9, 10.