Kombisa Leswaku Wa Khathalela Hi Ku Endla Maendzo Yo Vuyela
1 Ku lavisisa vanhu lava tsakelaka hi yindlu ni yindlu ku kombisa ku navela ka wena ko nyika van’wana nkarhi wo yingisela rungula ra Mfumo. Kutani tiyiseka leswaku u vuyela laha u fambiseke kona tibuku hi n’hweti ya January, tanihi leswi leyi ku nga ndlela leyinene yo kombisa leswaku u khathalela van’wana.
2 U nga ha vuyela laha u fambiseke kona buku leyi nge “Xana Vutomi Lebyi Byo Va Na Sweswi Ntsena?” hi xingheniso xo koma xo fana ni lexi:
◼ “Varhangeri va misava namuntlha a va swi kotanga ku tisa ku rhula ni nsirhelelo. Nakambe a va swi koti ku ntshunxa misava leyi eka mavabyi ni rifu. Yehovha Xikwembu hi yena a ri swakwe loyi a nga swi endlaka sweswo. Bibele yi kombisa leswi Xikwembu xi nga ta swi endla ku nga ri khale leswaku ku va ni swiyimo swo antswa emisaveni leyi. [Bula hi tinhla leti faneleke eka ndzima 16.] Ndzi lava ku ku kombisa ndlela leyi buku leyi yi nga ta ku pfuna ha yona.”
3 Loko n’wini wa muti a nga tekanga buku ni yin’we, kambe a kombise ku tsakela rungula ra hina, u nga ha ringeta manghenelo lawa:
◼ “Ndza tsaka swinene ku ku kuma ekaya nakambe. Eriendzweni ra mina leri hundzeke u kombise ku tsakela exitshembisweni xa Bibele lexi tsariweke eka Nhlavutelo 21:3, 4. Namuntlha ndzi lava ku ku komba ndlela leyi Xikwembu xi nga ta hetisisa xitshembiso xa xona xo endla misava yi va paradeyisi. Xiya leswi vuriweke laha ka Pisalema 37:9-11. [Hlaya.] Xikwembu xi ta herisa vanhu lavo homboloka. Xana u nga swi tsakela ku va exikarhi ka lava titsongahataka lava nga ta tsakela ku rhula lokukulu? [Yimela nhlamulo.] Nakambe xiya ndzimana 29 na 34. Ndzi nga tsaka ngopfu ku tlhela ndzi vuya hi ta yisa bulo ra hina emahlweni hi nkarhi lowu nga ta va wu ku lungherile.” Loko swiyimo swi pfumela u nga ha fambisa timagazini ta sweswinyana. Endla malunghiselelo lama heleleke yo tlhela u vuya.
4 U nga ha vuyela laha u fambiseke broxara leyi nge “Xana Xikwembu Xa Hi Khathalela Hakunene?” hi xiringanyeto lexi:
◼ “Eku sunguleni ndzi ku siyele kopi ya broxara leyi, leyi tlakusaka xivutiso xa nkoka: ‘Xana Xikwembu xa hi khathalela hakunene?’ Endzhaku ka ku hlaya broxara leyi, xana u fikelele makumu wahi? [Yimela nhlamulo.] Swi le rivaleni leswaku u khutaziwe hi ku hlaya matsalwa lama tshembisaka misava leyintshwa ya paradeyisi, laha hi nga hanyaka hi ku rhula. [Kombisa swifaniso eka matluka 2 na 3, kutani u kombisa swiyimo swin’wana leswi tsakisaka swa misava leyintshwa.] Ndza tshemba leswaku wena ni varhandziwa va wena mi nga swi tsakela ku hanya emisaveni yo tano. Xiya leswi ndzimana 16 eka tluka 31 yi swi vulaka malunghana ni mhaka leyi.” Hlaya ndzimana, kutani u kombisa leswaku ku lavisisa Yehovha swi vula ku tiva swo tala ha yena ni swikongomelo swakwe hi ku dyondza Rito rakwe, ku nga Bibele.
5 Leswaku hi endla maendzo yo vuyela lama humelelaka, hi fanele ku kombisa leswaku ha khumbeka hi vanhu. Swi ta pfuna ku tsundzuka tinhla tinharhu. Pfumelelana ni swiyimo. N’wini wa muti a nga ha va a nga swi tolovelanga ku veka nkarhi wo karhi wa bulo ra Bibele etlhelo. Komisa. U nga tshami nkarhi wo leha kumbe ku hlanganisa tinhla to tala eku sunguleni. Hakanyingi, maendzo ya wena ma ta amukeriwa kahle loko u hlanganisa tinhla ti nga ri tingani ntsena hi nkarhi wo koma. Vana ni rirhandzu ni xinghana. Kombisa n’wini wa muti leswaku wa n’wi tsakela tanihi munhu. Pakani ya hina leyi kongomeke i ku nghenisa n’wini wa muti ebulweni ra Matsalwa. Kutani hi lava ku sungula dyondzo ya le kaya ya Bibele leyi humelelaka.
6 Yehovha u veke xikombiso lexi hetisekeke tanihi Murisi wa rirhandzu la khathalelaka tinyimpfu takwe. (Ezek. 34:11-14) Matshalatshala ya hina ya mbilu hinkwayo yo lava ku n’wi tekelela ma n’wi tsakisa, ma kombisa rirhandzu ra hina naswona ma tisela van’wana mikateko.