Lavisisa Lava Dyondzisekaka
1 “A ku na munhu la nga taka ka mina, loko a nga kokeriwi ka mina hi Tatana la ndzi rhumeke.” (Yoh. 6:44) Yehovha, loyi a kambisisaka timbilu, u ta hakela lava va dyondzisekaka va tlhela va endla leswi va swi dyondzaka. (Yer. 17:10; Yoh. 6:45) Hi ni lunghelo ro va vatirhi-kulobye na yena eku lavisiseni ka vanhu va musa lava navelaka misava leyintshwa.—Ps. 37:11; 1 Kor. 3:9.
2 Yesu u hlamusele vadyondzisiwa va yena tanihi “vaphasi va vanhu.” (Mt. 4:19) Hambi leswi muxaka wolowo wa ntirho wu nga ha nonon’hwaka minkarhi yin’wana, ku ni ku eneriseka lokukulu loko ku kumiwa vuyelo lebyinene. Ematshan’weni ya leswaku hi tirhela ku vuyeriwa, entiyisweni hi ponisa “tinhlampfi” eka ndzoviso lowu ti langutaneke na wona. Muphasi wa tinhlampfi la humelelaka u fanele ku tiva leswi a faneleke ku swi endla leswaku a koka nhlampfi. Hi ku fanana, hi fanele ku nyikela rungula ra Mfumo hi mukhuva lowu tsakisaka lowu nga ta pfuxa ku tsakela ka vayingiseri va hina. Leswi swi tano ngopfu-ngopfu loko hi endla maendzo yo vuyela. Xana hi nga vula yini?
3 Loko ku tsakela ku kombisiwe eka swihloko swa “Xihondzo xo Rindza” leswi vulavulaka hi vukhongeri, u nga ha ku:
◼ “Enkarhini lowu hundzeke hi vulavule hi lexi endlaka vanhu vo tala va nga rhandzi ku bula hi vukhongeri. Xana a swi ku hlamarisi sweswo, tanihi leswi vaakelani va hina vo tala va tivulaka Vakreste? Kumbexana u tivutisa leswaku ha yini vukhongeri byi ri mhaka leyi vangaka ku avana ni leyi pfuxaka njhekanjhekisano.” Yimela nhlamulo. Pfula eka tluka 322 ra buku leyi nge Reasoning, ivi u hlamusela tinhla ti nga ri tingani ehansi ka xihloko lexi nge “Ha Yini Ku Ri Ni Vukhongeri Byo Tala Swonghasi?”
4 U nga ha tirhisa ku tshinelela loku loku fanaka ku sungula bulo hi mhaka ya vukhongeri:
◼ “Xana yi kona ndlela yo karhi leyi hi nga tiyisekaka ha yona leswaku hi ni vukhongeri bya ntiyiso? [Yimela nhlamulo.] Hikwalaho ka leswi ku nga ni vukhongeri byo tala byo hambana-hambana, vanhu vo tala va titwa va pfilunganyekile va nga tiyiseki.” Pfula eka buku leyi nge Reasoning matluka 328-9, laha yi bulaka hi xivutiso lexi nge “Munhu a nga byi tivisa ku yini vukhongeri lebyi lulameke?” Hlamusela hi ku komisa xivutiso 5, lexi nge, “Xana swirho swa byona swa rhandzana hakunene?” Hlamusela ndlela leyi leswi engetelekeke swi nga dyondziwaka ha yona hi dyondzo ya munhu hi xiyexe ya Bibele.
5 Loko n’wini wa muti a vonake a khumbekile hi swiyimo swa misava, u nga ringeta leswi:
◼ “Handle ko kanakana u titwa u khumbeka hi swiyimo leswo biha leswi hi faneleke ku langutana na swona evuton’wini ni le ku kuriseni ka mindyangu ya hina. Bibele yi paluxa xitshembiso lexi hlamarisaka lexi Xikwembu xi nga ta xi hetisisa ku nga ri khale.” Hlaya Swivuriso 2:21, 22, ivi u hlamusela ndlela leyi Yehovha a tshembiseke ha yona misava leyi nga ni ku rhula loku nga heriki.
6 Loko u endla maendzo yo vuyela endzhaku ka loko tsima ro hlawuleka ro fambisa xiphephana xa Kingdom News ri sungurile, hi kombela u tiyiseka leswaku u siya kopi ya xiphephana xa Kingdom News eka vini va miti lava nga riki na xona. Leswi u nga ha swi vulaka eka maendzo yo vuyela loko u landzelela ku fambisiwa ka xiphephana xa Kingdom News ku ta buriwa hi swona enkandziyisweni wa Vutirheli Bya Hina Bya Mfumo bya May.
7 Tanihi leswi Rito ra Xikwembu ri “tirha[ka]” hi fanele ku ringeta ku ri tirhisa eka marungula ya hina. (Hev. 4:12) Tiyiseka leswaku u khutaza n’wini wa muti leswaku a tihlayela Bibele. (Ringanisa Mintirho 17:11.) Loko hi hisekela ku endla xiphemu xa hina, Yehovha u ta katekisa matshalatshala ya hina.