Xana Wa Xi Vona Xilaveko?

¹ Yehovha u hlamuseriwa tanihi Mupfuni ni Vuchavelo. Ha swi tiva leswaku hi nga ya eka yena hi nkarhi wa xilaveko naswona u ta hi pfuna. (Ps. 18:⁠2; 46:⁠1) Hi nga tekelela mfanelo leyi ya ntwela-vusiwana hi ku pfuna van’wana loko hi vona xilaveko.

² I yini lexi susumetelaka munhu ku endla matshalatshala lama hlawulekeke yo pfuna munhu un’wana? Vanhu vo tala va xiya leswi tanihi swilo swa rirhandzu ni ntwela-vusiwana leswi faneleke ku endliwa. Kunene Rito ra Xikwembu ra swi khutaza. (Rhom. 15:⁠1) Pawulo u hi khutaze ku nga ‘tikarhateli leswi swi nga swa hina ntsena, kambe hi tikarhatela ni leswi swi nga swa van’wana.’​—⁠Flp. 2:⁠4.

³ Leswi i swilo swin’wana leswi hi nga kumaka ntsako loko hi swi endla. (Mint. 20:​35) Pawulo u kombise Timotiya lontsongo tanihi xikombiso xa loyi a ‘hisekelaka ku va pfuna hi mbilu hinkwayo’ vamakwavo va yena. (Flp. 2:​20) I swinene leswi hi nga ni vantshwa vo tala namuntlha emavandlheni lava nga ni mboyamelo lowu fanaka. Kambe hambi hi vantshwa kumbe hi dyuharile, ku ni swilo swo tala leswi hi nga swi endlaka loko hi vona xilaveko.

⁴ Xana u tshame u xiya leswaku van’wana va ni swilaveko leswi nga nyikiwaka nyingiso lowu antswaka? Kumbexana makwerhu wa xinuna kumbe wa xisati a ri exibedlhele, naswona a hi vangani lava n’wi endzeleke; kumbe un’wana u lamarile, kambe a ku ri hava lava n’wi endleleke swintirhwana kumbe ku n’wi pfuna hi mintirho ya le ndlwini. Yesu u languta lava tirhelaka Yehovha tanihi swirho swa ndyangu leswi khathalelanaka hi mbilu hinkwayo. (Mar. 3:​33-35) Exifanisweni xa yena xa tinyimpfu ni timbuti, u kombise leswaku lava yimaka evokweni ra xinene ra ku tsakeriwa hi Hosi va endla tano hikwalaho ka ku pfuna ka vona vamakwavo va Hosi.​—⁠Mt. 25:⁠40.

⁵ Xana Ndzi Nga Pfuna Njhani? Xana ku nga endliwa yini ku nyikela mpfuno loko ku ri ni xilaveko lexi twisisekaka? Xana hi nga teka goza ro pfuna hi ndlela yo karhi? Kumbexana ku ni vadyuhari lava lavaka xikhutazo, kambe a va na vanghana va le kusuhi lava nga va pfunaka. Ku nga ha va ku ri na vantshwa lava lavaka mpfuno. Ndyangu lowu wa ha ku sungulaka ku tsakela lowu nga ni vana vo hlayanyana wu nga ha va kona eHolweni ya Mfumo loko muhuweleri loyi a dyondzaka na wona a nga ri kona. Va nga ha tlangela ku va ni un’wana loyi a tinyiketaka ku va pfuna hi vana.

⁶ Loko ku rhandza ka hina ntiyiso ni nhlengeletano ya Yehovha swi ya swi kula, hi tlhela hi kula eku tlangeleni ni le ku khathaleleni ka van’wana evandlheni. Pawulo u hi khutaze ku ndlandlamuxa emhakeni leyi. (2 Kor. 6:​11-13) Yesu u kandziyise leswaku ku kombisa ka hina rirhandzu eka van’wana hi yona ndlela leyikulu leyi hi yi kombisaka leswaku hi valandzeri va yena hakunene.​—⁠Yoh. 13:⁠35.

⁷ Kutani loko hi vona xilaveko, rirhandzu ra xiviri ro rhandza vamakwerhu ni vandlha ri fanele ku hi susumetela ku teka goza ni ku pfuna hi swilo swihi na swihi leswi hi nga swi kotaka. (Gal. 6:​9, 10) Ku khumbeka loku hi van’wana ku hi hlanganisa swin’we hi swiboho swa rirhandzu ni vun’we. (1 Kor. 10:​24) Hi ndlela leyi, hi endla xiphemu xa hina xo pfuna ku eneta xilaveko evandlheni.