Mahungu Lamanene Ya Lava Titsongahataka
1 Hi hanya enkarhini wa ku avanyisa loku tshinelaka. (Ezek. 9:5, 6) I swa xihatla leswaku vanhu lava titsongahataka va tindhawu hinkwato va dyondzisiwa leswaku va ta tilunghiselela leswi taka. Hi tintswalo ta yena ta rirhandzu, Yehovha u lerise vanhu va yena “ku byela ŝisiwana e mahungu ya ku saseka.” (Esa. 61:1, 2) Timagazini ta hina ti hi pfuna ku twarisa mahungu lamanene kun’wana ni kun’wana.
2 Xihondzo xo Rindza ni Xalamuka! swi nyikela swakudya leswi tiyeke swa moya leswi hi tiyisaka ni ku hi khutaza. Xihondzo xo Rindza xi chavelela lava titsongahataka hi mahungu lamanene ya leswaku Mfumo wa Xikwembu wu ta hundzula misava yi va paradeyisi ku nga ri khale. Xalamuka! yi aka ntshembo eka xitshembiso xa Muvumbi xa misava leyintshwa ya ku rhula ni leyi sirhelelekeke. Ku hangalasiwa lokukulu ka timagazini leti i yin’wana ya tindlela leti hatlisaka to yisa mahungu lamanene eka lava titsongahataka. Hi tihi tinhla leti hi nga ti kandziyisaka eka minkandziyiso ya sweswinyana?
3 U nga ha fambisa “Xihondzo xo Rindza” xa May 1 hi ku vulavulela xihloko lexi nge: “Ku Vuyeriwa Hi Ku Hlaya Bibele Siku Na Siku” ni ku vutisa xivutiso lexi nge:
◼ “Xana u ehleketa leswaku i mpfuno wihi lowu hi nga wu kumaka eku hlayeni ka Bibele? [Yimela nhlamulo.] Bibele hi yoxe, eka Varhoma 15:4, yi hi pfuna ku anakanyisisa hi xivutiso xexo. [Hlaya Varhoma 15:4.] Vanhu vo tala endhawini ya ka hina va ni Bibele, kambe a hi vangani va kumaka nkarhi wo yi hlaya nkarhi na nkarhi. Hi tshemba leswaku ntshembo lowu nga wona ntsena wa vumundzuku wu fanele ku kumiwa eBibeleni, naswona hi ta kateka loko hi yi hlaya.” Endla nhlamuselo leyi engetelekeke leyi fanelekaka, kutani u fambisa timagazini. Loko xikhokhelo xi nga amukeriwi fambisa timagazini timbirhi.
4 “Xihondzo xo Rindza” xa May 15 xi ni xihloko lexi nyanyulaka lexi nge: “Vutomi Lebyintshwa Eka Vakokwa Wa Hina.” U nga ha swi kota ku pfuxa ku tsakela hi xingheniso lexi:
◼ “Vo tala hakanyingi va tivutise leswi vakokwa wa vona a va ri xiswona. Leswi va feke naswona va fambeke, vanhu vo tala va gimeta hi leswaku a swi tiviwi hi munhu. Xana u ehleketa leswaku swi nga koteka leswaku hi tiva vakokwa wa hina?” Yimela nhlamulo. Hlaya Yohane 5:28, 29, ivi u hlamusela ndlela leyi Xikwembu xi tshembiseke ha yona ku va nyika vutomi lebyintshwa emisaveni ya paradeyisi.
5 U nga ha fambisa “Xalamuka!” ya May 8 hi ku vutisa xivutiso lexi nge:
◼ “Xana u ehleketa leswaku i yini lexi lavekaka leswaku vutomi byi tsakisa?” Yimela nhlamulo. Vulavulela xihloko lexi nge “Xana Vutomi Byi Vula Yini?”, eka tluka 29, ivi u hlaya marito ya Solomoni eka Eklesiasta 2:11. Kutani, kombisa ndzayo ya yena eka ndzima 12, ndzimana 13. Khutaza n’wini wa muti leswaku a teka magazini. Loko a ri ni mali ya le hansi u nga ha fambisa xikhokhelo xa tin’hweti ta tsevu kumbe timagazini timbirhi.
6 Loko u tirhisa timagazini ku nga si fika May 14, tiyiseka leswaku u na tikopi ta Kingdom News No. 34 kutani u ti nyika un’wana ni un’wana loyi a nga siki ti kumaka. Loko hi fambisa timagazini, hi fanele ku tsundzuka leswaku vini va muti va pfumeleriwa ku nyikela munyikelo lowutsongo ku seketela ntirho wa hina loko va swi tsakela. Nkarhi hinkwawo hi fanele ku lunghekela ku fambisa tibuku ta hina, hi ku xiya leswaku ti nga ha hlayiwa hi van’wana endyangwini ku katsa ni vanghana lava nga ha va endzelaka. (1 Tim. 6:18) Mahungu lamanene lawa hi ma tisaka eka lava titsongahataka ma nga ponisa vutomi bya vona.—1 Tim. 4:16.