Kreste, Xikombiso Lexinene Xa Vantshwa
1 Endzhaku ka bulo ro leha ra Bibele, muntshwa un’wana u te: “Ndzi hlamarisiwe ngopfu hi matimba ya vumunhu bya Yesu Kreste. Loyi i murhangeri loyi ndzi faneleke ku pfumela eka yena.” Ku hava van’watipolitiki kumbe tingwenya ta mintlangu ni vuhungasi leti ku nga vuriwaka leswi ha tona. Vakreste va ntiyiso a va va languti va ri swikombiso leswinene lava yi amukelaka hi ku olova mimpimanyeto ya misava ni mahanyelo lama nga riki ya Vukreste.—Ps. 146:3, 4.
2 Vantshwa va nga tiyiseka leswaku loko va kombisa ripfumelo eka Yesu Kreste, va tikombisa va ri tinyimpfu ta Xikwembu naswona Yesu wa va tiva. Murisi Lonene wa va khathalela. (Yoh. 10:14, 15, 27) Vantshwa lava landzelaka Kreste tanihi Xikombiso xa vona va katekisiwa.
3 Makwerhu un’wana loyi sweswi a tirhaka eBethele ya le Brooklyn a a tivekele pakani leyi ya lunghelo ra ntirho ku sukela enkarhini lowu a ri ni malembe ya nhungu hi vukhale. U khutaziwe ku languta ntirho wa le Bethele tanihi ndlela leyi twisisekaka yo landzela xikombiso xa Kreste loko a kula. Vatswari vakwe, kun’we ni valanguteri lava famba-fambaka, va hambete va n’wi khutaza hi pakani leyi. Leswaku va n’wi pfuna ku yi lunghekela, va n’wi khutaze ku gingirika tanihi xirho xa ndyangu wa Bethele, a endla mintirho ya le kaya, a pfuneta eku lunghiseni ka Holo ya Mfumo ni ku antswisa vutshila evutirhelini. Leswi se a tiphineke hi ntirho wa le Bethele malembe yo hlayanyana sweswi, wa tsaka leswaku loko a ri karhi a kula, u endle matshalatshala yo tekelela xikombiso xa Kreste.
4 Yesu a nga hlongorisanga ntirho-vutomi wa misava; u hlawule vutirheli. Makwerhu un’wana wa xisati lontsongo a a lava ku phayona loko a thwasa exikolweni xa le henhla kambe a a kanakana hikwalaho ka leswi a nga ri na ntirho lowu faneleke wa nkarhinyana. A a tshamela ku anakanya leswi: ‘Xo sungula ndzi ta kuma ntirho, ivi ndzi endla xikombelo xa mina xa vuphayona.’ Nkulu u kombise leswaku loko a rindza ngopfu, u ta tikuma a vona onge ntirho wo tihanyisa wa nkarhi hinkwawo wu antswa ngopfu, tanihi leswi a nga ta ka a nga siveli hi nchumu ku wu amukela. U hlamusele a ku: “Ndzi khongelele moya wa Yehovha leswaku wu ndzi kongomisa.” Hi ku hatlisa u nghenele vuphayona bya nkarhinyana kutani endzhaku a va phayona ra nkarhi hinkwawo. Endzhakunyana ka sweswo, u kume ntirho lowu faneleke lowu a wu fambisana ni xiyimiso xakwe xa vuphayona.
5 Yesu u twarise rungula ra Mfumo hi xivindzi eka vanhu hinkwavo. (Mt. 4:23) Vakreste lavatsongo na vona va nga dyondza ku va ni xivindzi eku chumayeleni, va nga chavisiwi hi van’wana. Mbhoni yin’wana ya malembe ya 14 hi vukhale yi vikile: “Un’wana ni un’wana exikolweni u tiva xiyimo xa mina tanihi Mukreste. . . . Va xi tiva kahle lerova loko ndzi hlangana ni vadyondzi-kulorhi loko ndzi ri evutirhelini, a ndzi khomiwi hi tingana. Hakanyingi vadyondzi-kulorhi va yingisela, naswona minkarhi yo tala va amukela ni tibuku.”
6 Ku xiya xikombiso xa Kreste swi nga pfuna vantshwa leswaku va endla swiboho swa vutlhari malunghana ni vumundzuku bya vona. Ematshan’weni yo khomeka hi ku hlongorisa swilo swa misava, va ‘tsundzuka Muvumbi wa vona Lonkulu’ hi ku kombisa ku hiseka entirhweni wa Yehovha. (Ekl. 12:1) Ku fana na Kreste Yesu, va hlakulela “rirhandzu ro rhandza Tatana,” leri tisaka mikateko leyi naveriwaka swinene ku tlula nchumu wihi na wihi lowu kumekaka emisaveni. Ematshan’weni yo “hundza” ni misava ya khale, va nga langutela ku “tshama hilaha ku nga heriki.”—1 Yoh. 2:15-17.