Maendzo Yo Vuyela Lama Humelelaka Ma Lava Madyondziselo Lama Humelelaka
1 Maendzo yo vuyela i xiphemu xa nkoka ni lexi tsakisaka xa vutirheli bya hina bya nsimu. Ha yini hi fanele ku hisekela ku tlhelela eka lava tsakelaka? Vito ra Yehovha ra tivisiwa naswona ra xiximiwa hi ntirho lowu wo endla vadyondzisiwa, naswona vanhu lava chavaka Xikwembu va pfuniwa ku kuma ndlela ya vutomi. (2 Kor. 2:17–3:3) Ku xiya leswaku ku hlawulekisiwa ka vito ra Yehovha ni vutomi bya van’wana swa khumbeka swi fanele ku hi susumetela ku lunghiselela kahle hi nga si tlhelela.
2 Mudyondzisi lonene u ta pfuna xichudeni leswaku xi aka ehenhla ka masungulo lama ana se ma nga endliwa. Hi laha mudyondzisi wa le xikolweni a engetelaka vutivi lebyi swichudeni swi byi kumaka siku na siku, na hina hi fanele ku landzela riendzo ra hina ro sungula hi tinhlamuselo leti engetelekeke emhakeni leyi fanaka. Leswi swi ta endla leswaku mianakanyo ni miehleketo swi ya emahlweni.
3 Loko u tlhelela laha u fambiseke broxara leyi nge “Xana Xikwembu Xa Hi Khathalela Hakunene?” u nga ha kuma xingheniso lexi xi ri lexi humelelaka:
◼ “Eriendzweni ra mina leri hundzeke, hi bule hi ‘masiku ya makumu’ lama hlamuseriweke eBibeleni ni leswi ma vulaka swona eka hina. U nga ha tivutisa leswaku hi swi tivisa ku yini leswaku hi hanya emasikwini ya makumu. (2 Tim. 3:1) Vadyondzisiwa va Yesu a va hisekela ku kuma nhlamulo ya xivutiso xexo. [Hlaya Matewu 24:3.] Loko a hlamula, Yesu u hlamusele swiyimo leswi hi swi vonaka namuntlha. Leswi swi katsa nhlomulo ni madzolonga lama nga si tshamaka ma voniwa.” N’wi kombe xiyenge xa xikombiso lexi hlamuseriweke eka tindzimana 3 na 4 eka tluka 19. Loko n’wangulo wu ri lowunene, n’wi kombe swiyenge swin’wana swa xikombiso eka tindzimana 5 ku ya eka 8 eka tluka 20. N’wi byele leswaku u ta tlhela u vuya leswaku u ta hlamula xivutiso lexi tlakusiweke eku sunguleni ka broxara leyi.
4 Leswaku u landzela ku tsakela eka broxara leyi nge “Xana Xikongomelo Xa Vutomi I Yini—U Nga Xi Kumisa Ku Yini?” u nga ha ku:
◼ “A ndzi swi yimele hi mahlo-ngati leswaku hi yisa bulo ra hina emahlweni malunghana ni xikongomelo evuton’wini. Ndza tshemba leswaku hinkwerhu ha pfumelelana leswaku Xikwembu xi hi kunguhatele ku hanya emisaveni leyi eswiyin’weni leswi tsakisaka ni leswo rhula ematshan’weni ya mpfilumpfilu lowu hi wu vonaka namuntlha. Xana u ehleketa leswaku u ta xi hetisisa xitshembiso xa yena?” Yimela nhlamulo. Hlaya Esaya 55:11, kutani u hlamusela rungula leri nga eka tindzimana 25 ku ya eka 27 eka tluka 30. Bumabumela dyondzo ya Bibele ya munhu hi xiyexe tanihi ndlela leyinene yo kuma xikongomelo xa xiviri evuton’wini.
5 Leswaku u landzela ku tsakela loku u ku kumeke enkarhini lowu nga hundza eka broxara leyi nge “Tsakela Vutomi eMisaveni Hi Masiku!” u nga ha yi kombisa nakambe kutani u ku:
◼ “Hi vulavule hi misava leyo saseka leyi kombisiweke exifunengetweni xa broxara leyi. Ndzi tsakela ku ku byela mhaka leyi ha yona ripfumelo eka Yesu Kreste ri nga ra nkoka swinene eka vanhu lava navelaka ku hanya kwalaho.” Pfula eka xifaniso 41, kutani u hlaya Esaya 9:6. Pfula xifaniso 62, kutani u hlaya Yohane 3:16, u kandziyisa xilaveko xo yingisa. Hlamusela leswaku Timbhoni ta Yehovha ti pfuna vanhu leswaku va dyondza ndlela yo kombisa ripfumelo hi ku dyondza Bibele ni ku ringeta ku hanya hi ndzayo ya yona.
6 Endzhaku ka riendzo rin’wana ni rin’wana ro vuyela, anakanyisisa ha rona hi xikongomelo xo lava ku antswisa vuswikoti bya wena. Tivutise: Xana a ndzi ri ni swilo leswi kongomeke emianakanyweni swo swi vula? Xana ndzi endle leswaku nyingiso wu tshama wu ri eBibeleni? Xana ndzi ake emasungulweni lama simekiweke eriendzweni ro sungula? Xana xingheniso xa mina a xi endleriwe ku sungula dyondzo ya Bibele? Tinhlamulo letinene ti nyika xitiyisekiso xa leswaku u lwela ku va mudyondzisi lonene wa Rito ra Xikwembu.