Lunghiselela Minhlangano Ya Vandlha Leswaku U Yi Tsakela
1 Tanihi vamakwerhu, ha hlengeletana hi vutlhari nkarhi hinkwawo eminhlanganweni ya hina ya vhiki na vhiki. (1 Tim. 4:15, 16) Xana hi nga tiphina njhani ni ku vuyeriwa swinene ha yona?
2 Nkarhi na nkarhi ku fanele ku vekiwa nkarhi wo lunghiselela minhlangano. Van’wana va nga ha swi kota ku heta nkarhi lowu engetelekeke va lunghiselela ku tlula nkarhi lowu van’wana va hetaka wona. Hambi swi ri tano, ku nga khathariseki ndlela leyi hi khomekeke ha yona, i vutlhari ku kuma nkarhi wo lunghiselela minhlangano. Ku lunghiselela swin’we tanihi ndyangu swa vuyerisa swinene.—Ef. 5:15, 16.
3 Xikolo Xa Vutirheli Bya Le Tilweni: Lwela ku fambisana ni xiyimiso xa ku hlaya ka Bibele ka vhiki na vhiki. (Yox. 1:8) Pfuxeta mhaka leyi nga ta hlanganisiwa, naswona u ta ni tibuku leti faneleke leswaku u ta fambisana ni swivulavuri. Anakanya hi tindlela leti u nga tirhisaka rungula leri ha tona evutirhelini bya wena.
4 Nhlangano Wa Ntirho: Languta xiyimiso lexi nga eka Vutirheli Bya Hina Bya Mfumo. Hlaya swihloko leswi ku nga ta buriwa ha swona. Loko ku ta tirhisiwa mhaka leyi humaka exihlokweni xa Xihondzo xo Rindza kumbe eka buku yin’wana, xi langute kutani u tlhela u xi hlaya. Loko ku ta va na minkombiso ya swingheniso swa ntirho wa nsimu, swi hlaye ka ha ri na nkarhi leswaku u ta lunghela ku ya swi tirhisa evutirhelini bya wena.
5 Dyondzo Ya Xihondzo xo Rindza: Hlaya dyondzo ka ha ri na nkarhi, u xiya tinhlamulo ta swivutiso. Ku languta matsalwa lama kombisiweke swi ta ku pfuna ku twisisa kahle. Ku anakanyisisa hi ndlela leyi dyondzo yi hlanganaka ha yona ni leswi ana se u swi tivaka swi ta engetela vutivi bya wena. Kunguhata ku hlanganyela edyondzweni hi ku lunghiselela tinhlamulo to koma eka ndzimana yin’we kumbe timbirhi. Leyi i ndlela ya nkoka yo “vula ku tshemba ka hina.”—Hev. 10:23, NW.
6 Dyondzo Ya Buku Ya Vandlha: Xo sungula, kambisisa mhaka; xiya nhloko-mhaka ya ndzima ni swihlokwana. Kutani, loko u ri karhi u hlaya, xiya tinhla-nkulu. Pfuxeta tindzimana ta Bibele leti seketelaka mhaka. Ringeta ku hlamula swivutiso hi marito ya wena n’wini. Loko u lunghiselela dyondzo, yi pfuxete emianakanyweni ya wena. Ringeta ku tsundzuka tinhla-nkulu ni tinhlamuselo ta tona.—2 Tim. 2:15.
7 Tsakela Minhlangano: Leswaku u yi tsakela swinene minhlangano, i swa nkoka ku fika nkarhi wa ha ri kona leswaku u kota ku hlanganyela eka xikhongelo xo pfula, ni ku kombela moya wa Yehovha. Nakambe wa pfuneka hi tinsimu ta Mfumo leti phyuphyisaka. Loko u nga ri na vana kumbe ku nga ri na xivangelo xin’wana lexi endlaka leswaku u tshamela endzhaku, u ta kuma leswaku loko u tshamela emahlweni, a wu kavanyetiwi hi swo tala naswona u ta pfuneka swinene enongonokweni. Vatswari lava nga ni vana lava lavaka ku humeseriwa ehandle hi nkarhi wa minhlangano va nga hunguta ku kavanyeta hi ku tshamela endzhaku ekusuhi ni ndlela.
8 Tiyimisele ku languta matsalwa lama hlayiwaka. Leswi swi ta ku pfuna leswaku u tsundzuka leswi u swi twaka. Ku vulavula ni ndyangu ni vanghana hi leswi u swi dyondzeke swi ta dzikisa rungula emianakanyweni ya wena. Ku tirhisa swiringanyeto leswi swi ta endla minhlangano yi vula swo tala ni ku va leyi tsakisaka, naswona entiyisweni swi ta hi endla leswaku “hi kombana rirhandzu ni mintirho leyinene.”—Hev. 10:24, 25.