Ku Fambisa Buku Leyi Nge Nghwazi Leyi Tshameke Yi Hanya
1 Evutirhelini bya hina bya nsimu hi December, hi ta fambisa buku leyi nge, Nghwazi Leyi Tshameke Yi Hanya. I yini leswi u nga ta swi vula leswaku u sungula bulo ra Bibele leri nga enkarhini, xana u ta yi vulavulela njhani buku leyi ya kahle swinene?
2 Endzhaku ko xeweta n’wini wa muti, u nga ha vula swo fana na leswi:
◼ “Namuntlha hi vutisa vaakelani va hina leswi va swi anakanyaka loko va hlaya eBibeleni mayelana ni ku hanya hi laha ku nga heriki. [Yimela nhlamulo.] I mhaka leyi tsakisaka swinene hikuva Bibele yi tirhisa xivulwa lexi nge ‘vutomi lebyi nga heriki’ ku ringana minkarhi ya kwalomu ka 40. Xana vutomi byo tano byi nga vula yini eka hina? Xiya leswi Nhlavutelo 21:4 yi swi vulaka. [Hlaya.] Xana u swi xiyile leswi tshembisiweke? [Yimela nhlamulo.] Xana hi nga byi kumisa ku yini vutomi lebyi nga heriki?” Hlaya Yohane 17:3, kutani u kandziyisa xilaveko xo kuma vutivi bya Xikwembu ni bya N’wana wa xona Yesu Kreste. Pfula buku leyi nge Nghwazi, u komba n’wini wa muti swin’wana swa swifaniso swa yona. Kutani pfula exinghenisweni, u tirhisa swihlokwana leswaku u endla ku tsakela ka yena ku ya emahlweni. Fambisa buku hi R10,50.
3 Endzhaku ka maxewetelo lama faneleke, u nga ha ku:
◼ “Hi vutisa vanhu loko va pfumela leswaku Yesu Kreste a a ri nghwazi leyi tshameke yi hanya. [N’wi nyike nkarhi wo hlamula.] Kavula, vanhu vo tala va kucetele vutomi bya vanhu, naswona van’wana va hoxe xandla enhluvukweni wa tinxaka ta vanhu, kambe xiya leswi endleke Yesu Kreste a hambana ni lavan’wana hinkwavo. [Hlaya Yohane 17:3.] A ku na munhu loyi a nga ni matimba yo nyika vanhu vutomi lebyi nga heriki. [Pfula eka ndzima 111 ya buku leyi nge Nghwazi.] Loko Yesu a ri laha misaveni, u hlamusele swiendlakalo leswi a swi ta humelela ku nga si hela misava.” Endzhaku ka ku hlamuselanyana swiendlakalo swin’wana leswi nga xikombiso xa vukona bya Kreste, kombisa tinhla-nkulu tin’wana ta buku leyi.
4 Xingheniso xin’wana, endzhaku ka maxewetelo lamanene, xi nga ha va lexi:
◼ “Hi December vanhu va anakanya ni ku vulavula ngopfu hi Yesu. Hi nga xi tekelela njhani xikombiso lexi vekiweke hi Yesu, nghwazi ya misava hinkwayo? [Yimela nhlamulo, kutani u yisa nyingiso eka 1 Petro 2:21.] U dyondzise valandzeri va yena leswaku va rhandza vaakelani va vona, va tenga emahanyelweni, ni ku khongelela Mfumo wa Xikwembu lowu taka. Ku ponisiwa ka hina ku titshege hi ku tiva ni ku yingisa Yesu tanihi Muponisi wa hina. [Hlaya Yohane 14:6.] Yesu a a nga ri munhu la tolovelekeke. Buku leyi yi n’wi hlamusela tanihi nghwazi leyi tshameke yi hanya. Ndzima 59 ya swi kombisa leswi, yi n’wi hlamusela tanihi ‘Kreste, N’wana wa Xikwembu lexi hanyaka.’ Leswi hi titshegeke ha yena leswaku hi ponisiwa, xana a wu anakanyi leswaku ku na xilaveko xo va hi dyondza swo tala hi laha hi swi nga kotekaka ha kona mayelana ni ntirho wa yena ni leswi a swi dyondziseke? Buku leyi yi lunghiseleriwe ngopfu-ngopfu xikongomelo xexo, naswona ndzi ta tsakela ku ku nyika kopi leyi hi munyikelo wa R10,50.”
5 Loko u vulavula ni muntshwa u nga ha lava ku ringeta manghenelo lawa:
◼ “Vantshwa vo tala va lava munhu la nga xikombiso lexi va nga ta xi tekelela, kambe swikombiso leswinene swa tika ku swi kuma. Yesu Kreste u vekele un’wana ni un’wana xikombiso lexi hetisekeke. [Hlaya 1 Petro 2:21.] Vutomi bya yena hinkwabyo a byi sekeriwe eku gandzeleni ka Tata wa yena wa le tilweni. Xana u anakanya leswaku a swi ta va njhani loko vanhu vo tala a va ringeta ku n’wi tekelela?” Yimela nhlamulo. Kombetela eka ndzimana ya vumune eka tluka ra vumbirhi ku suka eka ro hetelela ra buku, leri hlamuselaka timfanelo ta yena leto hlawuleka. Hlamusela ndlela leyi buku leyi nge Nghwazi yi nga hi pfunaka ha yona hinkwerhu leswaku hi va Vakreste vo antswa.
6 Loko hi lunghiselele kahle, hi nga swi kota ku tirhisa buku leyi ku ‘pfulela van’wana Matsalwa’ hi ndlela leyi nga ta va tisela ntsako lowukulu!—Lk. 24:32.