Pfunani Lava Pfumalaka Ntokoto Leswaku Va Twisisa

¹ Hi ntirho wa ku endla vadyondzisiwa, hi dyondzisa van’wana leswi Xikwembu xi swi languteleke eka vona. (Mt. 28:19, 20) Timbhoni leti tlulaka ntlhanu wa timiliyoni emisaveni hinkwayo ti endla matshalatshala lamakulu yo endla tano. Ku humelela a ku titsheganga hi tiawara leti hetiwaka, tibuku leti fambisiweke kumbe tidyondzo ta Bibele leti sunguriweke. Hi fikelela xikongomelo xa hina loko vanhu va twisisa ni ku tirhisa leswi va swi dyondzaka.

² Ku pfuna van’wana hi tlhelo ra moya swi katsa ku “nyika la’v̌o riv̌ala e ku twisisa.” (Ps. 119:130) Timbilu ta vanhu ta khumbeka ni ku susumeteleka ku teka goza ntsena loko va swi “twisisa.” (Mt. 15:10) Loko ntirho wa hina wu andza ni ku ndlandlamuka, hi sungula ku vona xilaveko lexikulu xo vulavula ni ku dyondzisa van’wana hi ndlela yo olova. Hi yona mhaka leyi Sosayiti yi humeseke broxara leyi nge I Yini Leswi Xikwembu Xi Swi Languteleke Eka Hina? Yi tamele dyondzo leyi twisisekaka ya tidyondzo ta Bibele ta masungulo. Tidyondzo ta yona ti komile, marito ya yona a ma rharhangananga, naswona madyondzelo ya yona ma olova ku ma twisisa, leswi endlaka leswaku broxara leyi yi tsakisa swinene.

³ Broxara leyi yi ta fambisiwa kun’we ni nyiko ya xikhokhelo hi tin’hweti ta April na May. Vanhu lava amukeleke buku eku sunguleni, va yisele broxara leyi. Tsundzuka leswaku yi nga pfuna swinene eku dyondziseni ka vana, vanhu lava vulavulaka ririmi rimbe ni lava nga swi kotiki kahle ku hlaya.

⁴ Tirhisa Xingheniso Xo Olova: Loko u fambisa broxara leyi nge Leswi Xi Swi Languteleke, pfula eka tluka 2, laha ku hlamuseriwaka leswaku “broxara leyi yi endleriwe dyondzo ya Bibele.” Yana eka ndzimana 3 eka tluka 3 u kombisa xivangelo xo va munhu a fanele a dyondza Bibele. Pfuxa ku tsakela ka yena hi tin’wana ta tidyondzo leti hlamuselaka mintiyiso yo olova ya Bibele. Kombisa ndlela leyi broxara leyi yi endlaka ku dyondza ku olova ha yona, ivi u n’wi byela leswaku u lava ku n’wi nyika kopi ya yena n’wini.

⁵ Fambisa Dyondzo Leyi Endlaka Nhluvuko: Pakani ya hina a hi ku fambisa tidyondzo ntsena—hi lava ku endla vadyondzisiwa lava nga ta hundzuka vaseketeri vo tiya va vugandzeri bya ntiyiso. Broxara leyi yi nga hetiwa endzhaku ka mavhiki ma nga ri mangani naswona yi fanele yi hi yisa eka dyondzo ya buku leyi nge Vutivi. (Vona nhlamuselo ya le hansi eka tluka 31.) Loko ma ha sungula, pfuna xichudeni leswaku xi vona nhlengeletano ya Yehovha. (Vona buku leyi nge Ku Hlamulana, matluka 188-9.) Kandziyisa nkoka wa minhlangano ya vandlha, ivi u hlamusela leswaku ku va kona eminhlanganweni swi nyika ku twisisa lokunene ka ndlela yo hanya hi vugandzeri bya ntiyiso.—Hev. 10:24, 25.

⁶ Ku hlanganyela hi xitalo entirhweni lowu wo hlawuleka hi April na May swi le rivaleni leswaku swi ta hi tisela ntsako lowu tisiwaka hi ku pfuna vanhu va timbilu letinene leswaku va “fuwa ku twisisa” loku yisaka evuton’wini.—Swiv. 4:5.