Dyondzisani Van’wana Leswi Xikwembu Xi Swi Languteleke
1 Ku nga ha kumiwa vanhu vo tala lava nga ni ndlala ya moya ya “marito ya Šikwembu.” (Am. 8:11) Hambileswi van’wana va pfumelaka leswaku Xikwembu xi kona, a va xi tivi xikongomelo xa xona ni leswi xi swi lavaka. Xisweswo, hi fanele hi va dyondzisa ntiyiso wa Mfumo lowu ponisaka vutomi. Hi ku va hi hlome kahle naswona hi lunghekele ku nyikela vumbhoni eka nkarhi wun’wana ni wun’wana, hi nga fikelela lava lavaka ku dyondza leswi Yehovha a swi languteleke.
2 Hi April na May, hi ta va ni minkandziyiso leyi nga enkarhini swinene ya Xihondzo xo Rindza ni Xalamuka! leyi hi nga ta yi fambisa. Nkarhi na nkarhi a hi fambiseni xikhokhelo. Ku engetela kwalaho, hi ta va hi fambisa broxara leyi nge I Yini Leswi Xikwembu Xi Swi Languteleke Eka Hina? ro sungula. Swifaniso swa yona leswi kokaka mahlo ni swivutiso leswi tlhontlhaka miehleketo swi endla leswaku broxara leyi yi tsakisa swinene. Swiringanyeto leswi landzelaka swi endleriwe ku hi pfuna leswaku hi tirhisa tibuku ta hina letinene hilaha ku humelelaka.
3 Ku Lavisisa Vanhu: Etindhawini leti vanhu vo tala va nga riki kona ekaya loko hi famba hi yindlu na yindlu, swi tikomba swi vuyerisa ku lavisisa vanhu lava hi nga vulavulaka na vona kwihi na kwihi laha va kumekaka kona. Xiengetelo xa Vutirheli Bya Hina Bya Mfumo bya September 1996 xi hi khutaze ku chumayela mahungu lamanene kun’wana ni kun’wana—exitarateni, eka swo famba swa mani na mani, etindhawini ta vuwiselo, laha ku pakiwaka kona mimovha ni le tindhawini ta mabindzu. Xi tlhele xi hi endla hi xalamukela xilaveko xo sungula tindlela to chumayela hi xitshuketa. Hi xikombiso, makwerhu wa xisati la nga phayona u ye entangeni wa swiharhi a ri ni mphakelo wa Xalamuka! ya August 8, 1996 leyi nga ni ntlhandlamano wa swihloko leswi vulavulaka hi swilo leswi hanyaka leswi nga ekhombyeni. Ku nga si hela ni awara, se a fambise tikopi ta 40 eka vanhu lava rhandzaka swiharhi ni ku swi xixima! Hi kwihi ku humelela loku u ku tsakeleke loko u chumayela mahungu lamanene kun’wana ni kun’wana ku fikela sweswi? Xihondzo xo Rindza ni Xalamuka! kun’we ni broxara leyi nge Leswi Xi Swi Languteleke swi ku fanela kahle ku nyikeriwa ka vumbhoni ka tindlela hinkwato, hikuva swi nyikela rungula leri khumbaka vutomi bya vanhu ni ku antswisa vuswikoti byo ehleketa.
4 Ku Sungula Mabulo: Tluka ra le ndzhaku ra Vutirheli Bya Hina Bya Mfumo bya October 1996 ri nyikela vuxokoxoko bya ndlela yo lunghiselela xingheniso xa wena n’wini xa timagazini ta Xihondzo xo Rindza ni Xalamuka! Swiringanyeto leswi fanaka swi ta ku pfuna loko u lunghiselela ku fambisa broxara leyi nge Leswi Xi Swi Languteleke. Leswi hi swi vulaka swi nga ha va swivulwa swi nga ri swingani ntsena kumbe bulo ro lehanyana leri katsaka ni Matsalwa. I swa nkoka leswaku u hlawula marito yo sungula hi vukheta, tanihi leswi ma nga ta kombisa loko munhu loyi u n’wi tshinelelaka a ta hambeta a yingisela. Van’wana va humelerile loko va sungula hi marito lawa: “Ndzi hlaye xihloko lexi ndzi khutazeke, kutani ndzi tsakela leswaku na wena u xi hlaya.” Kumbe xivutiso lexi tsakisaka xi nga tlakusiwa leswaku u nghenisa munhu lon’wana ebulwini.
5 Loko swi fanerile endhawini ya ka n’wina, u nga ha ringeta ku vutisa swivutiso leswi fanaka ni lexi landzelaka eka swingheniso swa wena n’hweti leyi:
◼ “Namuntlha hi vona ku tsalatsariwa ka makhumbi, nthyakiso wo tala swinene wa rivala ni moya. Xana ku laveka yini leswaku ku basisiwa misava ni ku yi endla yi va ndhawu leyinene yo hanya eka yona?” Yimela nhlamulo, kutani u hlamusela leswaku u ni rungula leri hi tiyisekisaka malunghana ni ndlela leyi misava yi nga ta va ntanga wa misava hinkwayo ha yona ni leswaku rini. N’wi kombise nhlamuselo yo karhi, tsalwa ro koma ni xifaniso lexo saseka lexi humaka eka magazini wa sweswinyana, ivi u n’wi nyika magazini lowu ni munghana wa wona hi munyikelo wa R2,00 leswaku a hlaya. Boxa leswaku vo tala lava tsakelaka ku hlaya timagazini ta hina va endla xikhokhelo xa tona. Hlamusela maendlelo ya xikhokhelo. U nga si gimeta bulo ra wena, ringeta ku hlamusela leswaku u ta ri yisa emahlweni enkarhini lowu taka.
◼ “Xana u ehleketa leswaku Xikwembu xi hi endlele leswaku hi langutana ni maxangu yo tanihi lawa hi ma vonaka namuntlha?” Endzhaku ka loko munhu a hlamurile, u nga ha ku: “Ndza tshemba leswaku u xi toloverile xikhongelo lexi Yesu a xi dyondziseke valandzeri vakwe leswaku va xi khongela, va kombela leswaku Mfumo wa Xikwembu wu ta. Xana u tshama u tivutisa leswaku Mfumo wa Xikwembu i yini?” Pfula dyondzo 6 ya broxara leyi nge Leswi Xi Swi Languteleke, ivi u hlaya swivutiso leswi nga eku sunguleni ka dyondzo. Kutani, loko u hlaya ndzimana 1, kombisa nhlamulo ya xivutiso xo sungula. Hlamusela leswaku swivutiso leswin’wana hinkwaswo swi hlamuriwa hi ndlela yoleyo leyi pakanisaka. Fambisa broxara hi munyikelo wa R1,20, ivi u n’wi byela leswaku u ta tlhela u vuya leswaku u ta n’wi byela leswi engetelekeke malunghana ni Mfumo.
◼ “Vanhu vo tala lava anakanyaka va sungula ku languta vukhongeri bya misava byi ri xivangelo xa swiphiqo swa vanhu ku nga ri ntlhantlho wa swiphiqo. Xana u ehleketa yini hi mhaka leyi?” Endzhaku ko yingisela langutelo ra munhu yoloye, kombisa swin’wana eka wun’wana wa timagazini ta sweswinyana leswi nga ha endlaka leswaku a tsakela ku tiva malunghana ni ku tsandzeka ka vukhongeri bya mavunwa kumbe ku lovisiwa ka byona loku tshinelaka. N’wi vutise loko a tsakela ku wu hlaya, ivi u wu fambisa hi munyikelo lowu tolovelekeke. Kombela vito ra yena, kutani u n’wi byela leswaku u ta tlhela u vuya u ta n’wi hlamusela ndlela leyi ha yona vukhongeri bya ntiyiso byi nga khomisangiki vanhu tingana.
◼ “Tanihi leswi ku nga ni swiphiqo swo tala swinene evuton’wini bya ndyangu namuntlha, xana u tshama u tivutisa leswaku hi xihi xihundla xo kuma ntsako endyangwini?” Yimela nhlamulo, ivi u hlamusela leswaku eBibeleni, Xikwembu xi paluxa xihundla xa ntsako wa ntiyiso endyangwini. Kumbexana u nga hlaya Esaya 48:17. Kutani pfula eka dyondzo 8 ya broxara leyi nge Leswi Xi Swi Languteleke, kutani u kombisa tindzimana tin’wana ta Bibele leti tshahiweke leti nyikelaka nkongomiso lowu tshembekaka eka xirho xin’wana ni xin’wana xa ndyangu. Hlaya nxaxamelo wa swivutiso leswi nga emasungulweni ya dyondzo. Vutisa munhu loyi loko a ta tsakela ku hlaya tinhlamulo ta swona. Loko a swi tsakela, fambisa broxara hi R1,20. N’wi byele leswaku u ta tlhela u vuya enkarhini wun’wana leswaku u ta n’wi byela leswi engetelekeke malunghana ni nkongomiso lowu tirhaka lowu Bibele yi nga na wona wa vutomi bya ndyangu lebyi tsakisaka.
6 Xiengetelo lexi nga eka Vutirheli Bya Hina Bya Mfumo bya March 1997 xi hi khutaze leswaku hi va ni xivindzi xo endla maendzo yo vuyela. Xi bumabumele ku tirhisiwa ka broxara leyi nge Leswi Xi Swi Languteleke leswaku ku sunguriwa tidyondzo ta Bibele, loko yi nga fambisiwi eka riendzo ro sungula, a yi fambisiwe eka riendzo ro vuyela. Nchumu lowu vanhu va wu lavaka swinene i ku dyondza leswi Xikwembu xi swi languteleke ni ku swi endla. (Kol. 1:9, 10) Van’wana hi ta va pfuna swinene hi April na May loko ho sungula ku va dyondzisa leswi hi swi tivaka malunghana ni swilaveko swa Yehovha swa vutomi.—1 Kor. 9:23.