Pfuna Van’wana Leswaku Va Chaveleleka
1 Vanhu vo tala va karhele ku twa timhaka ta timhangu, tinyimpi, vugevenga ni ku xaniseka. Kambe, nchavelelo, lowu pfumalekaka eka swiviko swa mahungu namuntlha, i nchumu lowu vanhu va wu lavaka hakunene. Ku chavelela swi vula “ku tiyisa nhlana ni ku nyika ntshembo eka” ni “ku hunguta gome kumbe ku karhateka ka” munhu un’wana. Tanihi Timbhoni ta Yehovha, hi hlomiseriwe ku pfuna vanhu van’wana hi ndlela leyi. (2 Kor. 1:3, 4) Tibroxara ta hina leti sekeriweke eBibeleni leti hi nga ta ti fambisa hi July na August ti ni marungula lama chavelelaka ya ntiyiso. (Rhom. 15:4) Hi leswi swiringanyeto swa ku ti fambisa ehansi ka swiyimo swo hambana-hambana:
2 Mahungu yo biha ma nga tisa nkarhi lowunene wo nyikela vumbhoni ni ku tisela van’wana nchavelelo, kumbexana loko u vula swin’wana swo fana ni leswi:
◼ “Loko swilo swo tano swi humelela, van’wana va tivutisa loko Xikwembu xi ri kona hakunene, niloko xi khathala hi hina. Xana u ehleketa yini? [Yimela nhlamulo.] Ndlela yin’wana yo kambisisa loko ku ri ni Xikwembu i ku tirhisa nsinya wa nawu lowu tiyisiweke kahle.” Hlaya Vaheveru 3:4. Kombisa swilo swin’wana leswi hi swi vonaka leswi nga erivaleni leswaku swi lo endliwa. Kutani u ya emahlweni u ku: “Ndzi ni broxara leyi ndzi swi tivaka leswaku yi ta ku chavelela. Yi ni xihloko lexi nge Xana Xikwembu Xa Hi Khathalela Hakunene? [Hlaya swivutiso leswi nga exifunengetweni.] Yi ni xitiyisekiso lexi khorwisaka xa leswaku Xikwembu a xo va kona ntsena kambe ni leswaku ku nga ri khale xi ta herisa swiyimo hinkwaswo leswi nga tsakisiki leswi hi swi vonaka namuntlha. Xana u nga tsakela ku yi hlaya?” Endla malunghiselelo yo tlhela u vuya.
3 Eriendzweni ro vuyela, u nga ha ku:
◼ “A hi ri karhi hi vulavula hi xitiyisekiso xa vukona bya Xikwembu loko ndzi ku siyela broxara leyi nge Xana Xikwembu Xa Hi Khathalela Hakunene? Kumbexana yinhla leyi u yi xiyile eka tluka 7. [N’wi kombe xifaniso ivi u katsakanya ndzimana 15.] Lexi i xikombiso xin’we ntsena lexi kombisaka leswaku Xikwembu lexi khathalelaka xi fanele xi ri kona. [Hlaya ndzimana 27 eka tluka 9.] Dyondzo ya munhu hi xiyexe ya Bibele yi ndzi pfune ku langutana ni swiphiqo swa vutomi bya siku rin’wana ni rin’wana hikuva yi dyondzisa langutelo ra Xikwembu etimhakeni leti.” N’wi kombise ndlela leyi dyondzo yi endliwaka ha yona.
4 Ku nyikela vumbhoni hi riqingho swi nga endliwa hi ku tirhisa broxara leyi nge “Xana Xikongomelo Xa Vutomi I Yini—U Nga Xi Kumisa Ku Yini?” U nga titivisa ivi u ku:
◼ “Ndzi ku bela riqingho leswaku ndzi ta ku byela rungula ra nkoka hikuva a ndzi nge swi koti ku ta ndzi ta ku vona hi ndzexe.” Hlaya ndzimana yo sungula eka tluka 4 ra broxara leyi, u swi endla hi ndlela leyi tolovelekeke, onge hiloko u ri karhi u vulavula ni munhu mi langutanile. N’wi vutise leswi a swi ehleketaka, ivi u yimela nhlamulo. “Ndzi pfule Bibele ya mina eka Esaya 45:18. Ndzimana leyi yi kombisa leswaku misava yi tumbuluxiwe ku ri karhi ku ehleketiwa hina. Xana ndzi nga ku hlayela yona?” Endzhaku ka sweswo, hlamusela xikongomelo xa broxara, kutani u vutisa ndlela leyi u nga n’wi yiselaka kopi leyi ha yona.
5 Loko u ba riqingho ra riendzo ro vuyela, u nga ha ringeta xingheniso lexi leswaku u sungula dyondzo:
◼ “Ndzi tsakela ku sungula laha hi gimeteke kona bulo ra hina ra nkarhi lowu nga hundza hi ku kombisa loyi a nga hi byelaka hi ta xikongomelo xa vutomi. [Hlamusela tindzimana 1 na 2 eka tluka 6 ra broxara leyi nge Xikongomelo Xa Vutomi.] Nhlavutelo 4:11 yi hlamusela leswaku Yehovha Xikwembu i Muvumbi wa hina. [Hlaya.] Kunene u fanele a ve ni xivangelo xo hi vumba. Vanhu lava laveke ku kumisisa xivangelo lexi va dyondze Rito ra Xikwembu leri tsariweke, ku nga Bibele. Ndzi tsakela ku ku nyika nkarhi wolowo.” Hlamusela ndlela leyi dyondzo ya hina ya mahala ya le kaya ya Bibele yi fambisiwaka ha yona, ivi u endla malunghiselelo yo sungula dyondzo yoleyo.
6 Xingheniso lexi lexi kongomeke xi nga ha chavelela lava langutaneke ni rifu ra la rhandzekaka:
◼ “Ndzi le ku endleni ka ntirho wa le rivaleni ehenhleni ka hinkwavo lava lahlekeriweke hi la rhandzekaka eku feni. Tanihi leswi leswi swi nga ha vaka swilo swo nonon’hwa swinene leswi un’wana ni un’wana wa hina a nga langutanaka na swona, ku lunghiseleriwe broxara leyi leyi nge, Loko U Feriwa Hi Loyi U N’wi Rhandzaka. Yi pfune timiliyoni ta vanhu. Ndzi tsakela ku ku kombisa leswi yi swi vulaka malunghana ni xitshembiso lexi tsakisaka lexi vuriweke hi Yesu Kreste. [Hlaya ndzimana ya vuntlhanu eka tluka 26, kun’we na Yohane 5:21, 28, 29.] Xiya xifaniso lexi nga eka tluka 29 lexi kombisaka mhaka ya Evhangeli laha Yesu a pfuxaka Lazaro eku feni hi xiviri. Loko u lava ku hlaya broxara leyi leyi chavelelaka, ndzi nga tsakela ku ku siyela yona hi munyikelo wa R1,20.”
7 Loko u tlhelela, u nga tlhela u kombisa xifaniso lexi nga eka tluka 29 ra broxara leyi nge “Loko U Feriwa Hi Loyi U N’wi Rhandzaka” kutani u ku:
◼ “Tsundzuka bulo ra hina malunghana na Kreste loko a pfuxa Lazaro eku feni. [Hlaya marito ya xifaniso lama nga eka tluka 28, ivi u kambisisa mhaka leyi nga ehansi ka xihlokwana lexi nge “Xana Swi Endlekile Hakunene?”] Loko mbilu ya wena yi lava ku pfumela leswaku u nga tlhela u n’wi vona murhandziwa la feke, i nge ndzi ku pfuna leswaku u ta va ni ntshembo eku pfuxiweni ka vafi.” N’wi byele hi ta dyondzo ya le kaya ya Bibele.
8 Onge hi nga endla hinkwaswo leswi hi nga swi kotaka etin’hwetini leti taka leswaku hi tekelela Yesu hi ku “tšhav̌elela hikwav̌o la’v̌a v̌av̌isekaka.”—Esa. 61:2.