Makume-Tsevu-Ntlhanu Wa Magidi!

Yoleyo i nhlayo ya vahuweleri lava hi tsakela ku va vona va vika laha Afrika Dzonga hi August 1998. Ematikweni lawa hi akelaneke na wona, hi tsakela ku vona vahuweleri vo ringana 1200 va vika eBotswana, 2400 eLesotho, 1000 eNamibia, 165 eSt. Helena na 2000 eSwaziland. Xana hi nga swi kota ku fikelela tipakani leti? Ina, hi nga swi kota! Rhekhodo ya mavandlha ya sweswinyana laha Afrika Dzonga yi kombisa leswaku ku ni vahuweleri vo ringana 68 451. Hambiswiritano, nhlohlorhi ya nkarhi na nkarhi ya vahuweleri lava nga vika laha Afrika Dzonga hi January 1998 a ku ri 64 514. Xana hi nga yi hundzisa ku yini nhlayo yoleyo? Yi nga fikeleriwa loko muhuweleri un’wana ni un’wana evandlheni a endla malunghiselelo lama heleleke yo hlanganyela evutirhelini hi August ivi a vika ntirho wolowo hi ku hatlisa. Tanihi leswi masiku mambirhi yo sungula ma nga hi Mugqivela ni Sonto, ni leswi mavandlha yo tala ma nga ta sungula tsima ra nsimu leyi nga aviwangiki, swi nga va njhani loko wo kunguhata ku hlanganyela entirhweni wa nsimu eka mahelo-vhiki wolawo? Loko mi ya enhlengeletanweni ya xifundzha kumbe eka yo hlawuleka ya siku rin’we, u nga ha nyikela vumbhoni hi xitshuketa mahelo-vhiki wolawo ivi u hlanganyela entirhweni wa nsimu ni vandlha eka mahelo-vhiki lama landzelaka. Loko hi sungula ntirho wa nsimu hi ku hatlisa en’hwetini, a hi nge tsandzeki ku kuma nkarhi wo karhi entirhweni wa ku nyikela vumbhoni hi August. Matsalana ni vafambisi va dyondzo ya buku va fanele va tiyiseka leswaku a va hlengeleti swiviko swa August ntsena kambe ni leswaku swiviko leswi nga hlwela swa tin’hweti leti nga hundza swa katsiwa eka xiviko xa August. Loko hi tirha hi vun’we, hi ta yi vona nhlohlorhi leyintshwa ya vahuweleri leyi nga ta hundza 65-000 ro sungula eAfrika Dzonga, kun’we ni tinhlohlorhi letintshwa ematikweni lawa hi akelaneke na wona. Koloko ku ta va ku dzunisiwa ka Yehovha lokukulu swinene!—Ps. 47:1.