Xana August Yi Ta Va N’hweti Yo Hlawuleka?

¹ Lembe ra 1963 a ri ri ro hlawuleka eka vanhu va Yehovha. Xana wa swi tiva leswaku a swi vangiwa hi yini? Hi wona nkarhi lowu nhlayo ya vahuweleri emisaveni hinkwayo yi fikeke eka miliyoni. Loko a wu ri entiyisweni enkarhini wolowo, u nga ha va u yi tsundzuka ndlela leyi a hi tsake ha yona hikwalaho ka leswi a ku ri ni vanhu vo tala swonghasi lava chumayelaka rungula ra Mfumo! Sweswi, ku ni vahuweleri vo tala eUnited States. Hambiswiritano, n’hweti na n’hweti laha Afrika Dzonga ku ni vahuweleri va nhlayo-xikarhi va 4500 lava nga wu vikiki ntirho wa vona wa nsimu.

² Pfumelela Ntlhontlho: Hi n’hweti ya August hi tiyimisele ku fikelela nhlohlorhi ya nkarhi na nkarhi eAfrika Dzonga, ya vahuweleri va 65 000. Leswaku leswi swi koteka, hi fanele hi endla xiavelo xa hina. Loko matshalatshala ya hina yo humelela, August yi ta va n’hweti yo hlawuleka hakunene! Hi nga swi fikelela leswi loko hinkwerhu ka hina hi endla xiavelo xa hina.

³ Lava va kunguhataka ku ya eku wiseni va nga tirhisa nkarhi wa vona evutirhelini. Famba ni swiphephana, tibroxara kumbe timagazini leswaku u ta kota ku nyikela vumbhoni eka vanhu lava u hlanganaka na vona. Nakambe laha u yaka kona u nga hlanganyela evutirhelini ni vahuweleri va ndhawu yoleyo.

⁴ Loko u vabya, kumbe u lamarile, u nga swi kota ku hlanganyela evutirhelini hilaha ku humelelaka. U nga ha kota ku nyikela vumbhoni eka madokodela, vaongori, kumbe van’wana lava ku endzelaka. Kumbexana u nga nyikela vumbhoni hi ku tsala papila kumbe hi riqingho.

⁵ A swi kanakanisi leswaku van’wana va ta wu tsakela mpfuno leswaku va ta kota ku hlanganyela entirhweni wa nsimu hi August. Vakulu, malandza ya vutirheli ni vafambisi va dyondzo va fanele va vona leswaku mpfuno wo tano wa nyikeriwa. Hikwalaho, u nga rivali ku nghenisa xiviko xa wena xa ntirho wa nsimu hi ku hatlisa eku heleni ka n’hweti leswaku u ta hlayiwa tanihi muhuweleri hi August.

⁶ Tsakela Lunghelo Leri: Vutirheli i “swilo leswinene leswi [hi] tamerisiweke swona.” (2 Tim. 1:14) Hi tlangela lunghelo leri hi nyikiweke rona ra leswaku hi chumayela mahungu lamanene. (1 Tes. 2:4) Loko hi anakanyisisa hi swilo hinkwaswo leswi Yehovha a hi endleleke swona, hi fanele hi susumeteleka ku hlanganyela hi xitalo eka ntirho lowu wa nkoka lembe hinkwaro. Hi nga pfumeleli nchumu wu hi kavanyeta ku chumayela nkarhi na nkarhi. A hi endleni August yi va n’hweti leyo hlawuleka entirhweni wa Yehovha ni ku tiyimisela ku nyikela vumbhoni ha yena n’hweti yin’wana ni yin’wana leyi landzelaka!—Ps. 34:1.