Xana U Muhuweleri Wa Mahungu Lamanene Wa Nkarhi Hinkwawo?
1 Hinkwerhu a hi tsakile loko hi vona leswaku Afrika Dzonga ri fikelele nhlohlorhi leyikulu ku tlula hinkwato, ya vahuweleri va 67 069 hi August 1999. Hakunene lawa i matshalatshala lama kombisaka vun’we ni ku tiyimisela! Ku ni vumbhoni lebyi kombisaka leswaku etin’hwetini leti landzeleke, vahuweleri van’wana a swi va tikela ku va vahuweleri va Mfumo va nkarhi hinkwawo, hikuva ku sukela enkarhini wolowo, nhlayo-xikarhi ya n’hweti yin’wana ni yin’wana a yi ri kwalomu ka 63 300. Leswi swi vula leswaku muhuweleri un’we eka vahuweleri va 16, a a nga hlanganyeli entirhweni wa nsimu n’hweti yin’wana ni yin’wana. Hi tshemba leswaku xikhutazo lexi landzelaka xi ta hi pfuna leswaku hi lulamisa xiphiqo lexi.
2 Tlangela Lunghelo Leri: Hi fanele hi ri tlangela swinene lunghelo leri hi nga na rona ra ku byela van’wana mahungu lamanene ya Mfumo. Ntirho lowu wu tsakisa Yehovha naswona wu pfuna vanhu va timbilu letinene leswaku va dyondza ndlela leyi yisaka evuton’wini. (Swiv. 27:11; 1 Tim. 4:16) Hi kuma ntokoto hi ku nyikela vumbhoni evutirhelini bya nsimu nkarhi na nkarhi naswona hi kuma ntsako ni ku eneriseka.
3 Vika Ntirho: Van’wana lava hlanganyelaka entirhweni wa nsimu va honisa ku vika ntirho wa vona hi nkarhi. A hi fanelanga hi anakanya leswaku ntirho wa hina a wu pfuni nchumu lerova hi nga wu viki. (Ringanisa Marka 12:41-44.) A hi tikarhateleni ku vika ntirho wa hina! Loko ho titoloveta ku tirhisa khalendara ekaya leswaku hi tsala tiawara leti hi ti tirheke evutirhelini bya nsimu, swi ta hi tsundzuxa nkarhi na nkarhi leswaku hi tsala xiviko lexi faneleke eku heleni ka n’hweti yin’wana ni yin’wana.
4 Pfuna Lava Lavaka Mpfuno: Malunghiselelo ya vandlha ma nga ha antswisiwa leswaku ku pfuniwa lava lavaka mpfuno, leswaku va hlanganyela nkarhi na nkarhi evutirhelini bya nsimu. Matsalana wa vandlha ni vafambisi va dyondzo ya buku ya vandlha va fanele va hlela leswaku vahuweleri lava nga ni ntokoto va pfuna van’wana. Loko u ri ni vana kumbe swichudeni swa Bibele leswi nga vahuweleri lava nga khuvuriwangiki, va dyondzise ku vika ntirho wa vona n’hweti yin’wana ni yin’wana.
5 Anakanya hi ntokoto lowu hlamuseriweke eka xihloko lexi nge “Ku Tlangela Vutomi Byo Leha eNtirhweni Wa Yehovha” eka Xihondzo xo Rindza xa October 1, 1997. Makwerhu Ottilie Mydland wa le Norway, a ri muhuweleri wa mahungu lamanene wa nkarhi hinkwawo emahlweni ka ku khuvuriwa ka yena hi 1921. Endzhaku ka malembe ya 76, loko se a ri na 99 wa malembe, u te: “Ndza tsaka hikuva ndza ha swi kota ku tirha tanihi muhuweleri wa nkarhi hinkwawo.” Mayana langutelo lerinene swonghasi leri malandza hinkwawo ya Yehovha ma nga ri tekelelaka!