Tirhisa Tibroxara Ku Koka Mianakanyo Ni Mbilu
1 Ntiyiso wa Bibele wu fanele wu hlamuseriwa hi ndlela leyi nga ta koka mianakanyo ni timbilu ta vanhu. Loko Yesu a ri karhi a hlamusela ntiyiso eka vayingiseri vakwe, u hlawule tinhloko-mhaka leti a ti va tsakisa ni leti a ti va khutaza. (Luka 24:17, 27, 32, 45) Leswaku hi humelela evutirhelini bya hina swi titshege ngopfu hi ku gingiriteka ka hina leswaku hi tiva swilaveko swa moya swa lava va hi yingisaka.
2 Tibroxara ti nga va switirho leswi pfunaka swinene leswaku hi fikelela timbilu ta vanhu lava hi va kumaka evutirhelini. Anakanya ka ha ri emahlweni malunghana ni lava nga angulaka eka rungula leri nga eka broxara yin’wana ni yin’wana leyi fambisiwaka hi August:
—Xana Xikwembu Xa Hi Khathalela Hakunene? Vanhu lava nga swisiwana kumbe lava tshameke va vona maxangu, va ta ri tlangela rungula leri leri chavelelaka malunghana ni vumundzuku lebyi nga riki na maxangu.
—Xana Xikongomelo Xa Vutomi I Yini—U Nga Xi Kumisa Ku Yini? Vantshwa lava anakanyisisaka hi vumundzuku bya vona va ta pfuneka hi tinhlamulo leti sekeriweke eBibeleni leti kumekaka eka broxara leyi.
—Tsakela Vutomi eMisaveni Hi Masiku! Swifaniso swo tala ni matsalwa lama kombisiweke swi ta pfuna vana lavatsongo ni lava nga swi kotiki kahle ku hlaya leswaku va twisisa swikongomelo swa Xikwembu.
—Hulumendhe Leyi Nga Ta Tisa Paradeyisi. Mani na mani la tirhisanaka ni hulumendhe a nga ha ri amukela rungula leri ri kombisaka ndlela leyi Mfumo wa Xikwembu wu nga ta swi tlhantlha ha yona swiphiqo leswi nonon’hwaka swa vanhu.
—Loko U Feriwa Hi Loyi U N’wi Rhandzaka. Vanhu vo tala lava fambisaka minkosi va nga tlangela ku kuma tikopi ta broxara leyi leswaku va ti nyika mindyangu leyi feriweke. Vahuweleri lava nyikelaka vumbhoni loko ku ri ni swilahlo va tirhisa broxara leyi ku chavelela vakhandli va nhlonge. Vamakwerhu van’wana vambirhi va vulavurisane ni ndyangu wun’wana wa vanhu va nkombo lowu a wu ri karhi wu khongela esirheni. Endzhaku ka loko va va byele rungula leri chavelelaka leri kumekaka eka broxara leyi, ku sunguriwe dyondzo ya Bibele ni mana wa vona esikwini leri tlhandlamaka!
—Xana U Fanele Ku Pfumela Eka Vunharhu-un’we? Munhu la namarheleke vukhongeri swinene a nga ha tsakela ntiyiso lowu kumekaka eka broxara leyi, leyi nga ni vuxokoxoko hinkwabyo, leyi paluxaka dyondzo ya xisekelo ya Vujagana.
3 Tolovela broxara yin’wana ni yin’wana, naswona u tiyimisela ku yi tirhisa hi ndlela leyinene ensin’wini ya ka n’wina. Leswaku u kuma swingheniso leswi ringanyetiweke, vona tluka ra le ndzhaku ra Vutirheli Bya Hina Bya Mfumo bya July 1998. Onge Yehovha a nga katekisa matshalatshala ya wena leswaku u fikelela mianakanyo ni timbilu ta vanhu.—Mar. 6:34.