Ndzi Lava Dyondzo Ya Bibele!

¹ Vo tala va hina hi vule leswaku ha swi navela ku va na dyondzo ya Bibele, naswona a hi ri ni xikongomelo lexinene. Loko hi fambisa dyondzo ya Bibele hi fikelela pakani ya hina ya ku endla vadyondzisiwa lavantshwa. (Mat. 28:19, 20) Naswona vo tala va hina hi hete tin’hweti, kumbexana malembe, hi nga si kuma ntsako wo hlawuleka lowu tisiwaka hi ku dyondzisa munhu ntiyiso. Xana hi nga endlisa ku yini emhakeni leyi hi November? Tanihi leswi ku fambisiwaka buku leyi nge Vutivi n’hweti leyi, hi nga endla matshalatshala yo hlawuleka leswaku hi yi tirhisa eku sunguleni ka tidyondzo letintshwa ta Bibele.

² Hlawula Mahelo-vhiki Man’we Kumbe Lama Engetelekeke: Hi khutaza un’wana ni un’wana leswaku a hlawula nkarhi en’hwetini leyi leswaku a tikarhatela ku sungula dyondzo leyintshwa ya Bibele. Vafambisi va Dyondzo ya Buku ya Vandlha va fanele va hlawula mahelo-vhiki lawa va nga ta ma tirhisela ngopfu-ngopfu xikongomelo lexi ivi va hlela mintlawa ya vona leswaku yi tikarhatela ntirho wa ku endla maendzo yo vuyela.

³ Tana ni tirhekhodo ta wena ta maendzo yo vuyela eka minhlangano leyi ya ntirho wa nsimu. Kutani tlhelela eka vanhu hinkwavo lava kombiseke ku tsakela, lava tekeke tibuku kumbe lava yeke eminhlanganweni. Endla riendzo rin’wana ni rin’wana ro vuyela hi xikongomelo xo sungula dyondzo.

⁴ Endla Nkombiso Wa Dyondzo Ya Bibele: Eminhlanganweni leyi hlawuriweke ya ntirho wa nsimu, ku fanele ku va ni nkombiso lowu lunghiseleriweke kahle, wu kombisa ndlela yo sungula dyondzo eriendzweni ro vuyela. U nga ha ku: “Vanhu vo tala va na yona Bibele, kambe a va swi voni leswaku yi ni tinhlamulo ta swivutiso swa nkoka leswi hinkwerhu hi tivutisaka swona evuton’wini. [Kombisa leswi nga endzeni ka buku leyi nge Vutivi, ivi u hlaya tinhloko-mhaka ta tindzima 3, 5, 6, 8 na 9.] Loko wo hlaya buku leyi ku ringana awara kumbe ku tlula hi vhiki, u nga twisisa Bibele ku antswa etin’hwetini ti nga ri tingani ntsena. Loko u tsakela ku hlawula yin’wana ya tinhloko-mhaka leti, ndzi ta tsakela ku ku kombisa ndlela leyi u nga dyondzaka ha yona.” Loko munhu wa kona a kanakana ku dyondza hikwalaho ka leswi a nga taleriwa hi mintirho, n’wi byele leswaku hi ni dyondzo ya buku yin’wana leyi komisiweke. Humesa broxara leyi nge Leswi Xi Swi Languteleke, kutani u n’wi tshembisa ku dyondza dyondzo yin’we yo koma ku ringana timinete ta 15 ku ya ka 30 hi vhiki.

⁵ Loko hinkwerhu hi endla matshalatshala hi vun’we leswaku hi sungula tidyondzo ni loko hi khongelela ku katekisiwa hi Yehovha eka matshalatshala ya hina, hi ta ti kuma tidyondzo letintshwa hakunene! (1 Yoh. 5:14, 15) Loko u lava dyondzo ya Bibele, lowu wu nga ha va nkarhi wa wena wa leswaku u yi kuma.