Xana U Tirha U Ri Ni Xikongomelo?

¹ Yehovha i Xikwembu lexi nga ni xikongomelo. (Esa. 55:10, 11) Hi khutaziwa ku n’wi tekelela. (Efe. 5:1) Entiyisweni, leswi hi nga swi kombisa hi ndlela leyi hi endlaka vutirheli bya hina ha yona. Hikwalaho xivutiso lexi xa fanela: “Xana u tirha u ri ni xikongomelo?”

² Ku chumayela ka wena hi yindlu ni yindlu, ku chumayela hi xitshuketa ni ku fambisa tibuku, hinkwaswo i xiyenge xa vutirheli lebyi endliwaka hi xikongomelo. Kambe, tsundzuka leswaku ntirho wa hina a wu katsi ku chumayela ntsena kambe wu katsa ni ku endla vanhu vadyondzisiwa. (Mat. 28:19, 20) Endzhaku ka loko hi byale mbewu ya ntiyiso wa Mfumo, hi fanele hi tlhelela hi ya yi cheleta ni ku hambeta hi yi khathalela hi ri karhi hi rindzele Yehovha leswaku a yi kurisa. (1 Kor. 3:6) Hi fanele hi tikarhatela ku endla maendzo yo vuyela ni ku sungula tidyondzo ta Bibele.

³ Ndlandlamuxa Vutirheli Bya Wena: Nkarhi hinkwawo wa tsaka loko u anakanya hi leswi u swi endleke evutirhelini, kutani hi mbilu u ku: “Ndzi endle leswi a ndzi kunguhate ku swi endla.” Hilaha swi tsariweke hakona eka 2 Timotiya 4:5, Pawulo u khutazile: “Hetisisa vutirheli bya wena hi xitalo.” Leswi swi katsa ku endla matshalatshala lama engetelekeke ya ku tlhelela eka vanhu hinkwavo lava kombiseke ku tsakela. Exiyimisweni xa ntirho wa wena wa vhiki ni vhiki, hlela nkarhi lowu u nga ta wu tirhisela ku endla maendzo yo vuyela. Tirha u ri ni xikongomelo xa ku sungula tidyondzo ta Bibele ni vanhu lava rhandzaka leswi lulameke. Xexo xi fanele ku va xikongomelo xa wena loko u ri evutirhelini bya nsimu.

⁴ Vutisa vahuweleri leswaku va titwise ku yini loko va vona swichudeni swa vona swa Bibele swi khuvuriwa enhlengeletanweni. A va tsakile, kumbexana a va tsake ngopfu ku fana ni lava a va khuvuriwa. Va hetisise xikongomelo lexikulu swinene! Un’wana wa lava endlaka vanhu vadyondzisiwa u swi veke hi ndlela leyi: “Ku endla vanhu vadyondzisiwa swi vula ku engetela nhlayo ya vanhu lava dzunisaka Yehovha. Swi vula vutomi eka lava amukelaka ntiyiso. Ndzi swi rhandza ngopfu ku dyondzisa van’wana ntiyiso—i swa nkoka swinene! . . . Vunyingi bya lava dyondzeke ku rhandza Yehovha va ve vanghana va mina lavakulu.”

⁵ Anakanya leswaku swi njhani ku kota ku pfuna munhu leswaku a va nandza wa Yehovha la tinyiketeleke! Mayana ntsako lowu swi wu tisaka! Vuyelo byo tano byi kumiwa hi ku tirha u ri ni xikongomelo evutirhelini bya nsimu.—Kol. 4:17.