U Nga Ku Yini Eka Muyuda?
1 Eka lembe-xidzana ro sungula, vo tala va “vana va Israyele” va angule hi ndlela leyinene eka rungula ra Yesu ni vaapostola va yena. (Mint. 10:36) Tanihi leswi a swi ri tano hi nkarhi wolowo, namuntlha Vayuda vo tala vo tshembeka va amukela ntiyiso hi mbilu hinkwayo—ku nga ri eIsrayele ntsena kambe ni le Russia, United States ni le matikweni man’wana. Xana u nga swi tsakela ku humelela swinene loko u chumayela Vayuda? Swiringanyeto leswi landzelaka swi ta ku pfuna leswaku u nyikela vumbhoni hi vuxiya-xiya eka Vayuda lava nga vapfumeri ni lava nga riki vapfumeri.
2 Ku Chumayela Vayuda Lava Nga Vapfumeri: Swi fanele swi xiyiwa leswaku hakanyingi Vayuda lava nga vapfumeri va tikarhatela swinene ku hlayisa mindhavuko ya varhabi ku ri ni ku hlamusela tidyondzo to karhi. Hakunene, va languta ndhavuko wu ri lowu nga ni matimba yo ringana ni ya Matsalwa. Hikwalaho, kahle-kahle a va swi tsakeli ku bula hi tidyondzo ta Bibele hi vuenti. Nakambe va ni mboyamelo wo anakanya leswaku Bibele i buku ya Vukreste. Hikwalaho ka sweswo, hakanyingi i swinene leswaku loko u vulavula hi Bibele u tirhisa marito yo tanihi “Matsalwa ya Xiheveru,” “Torah,” kumbe “Matsalwa.” Buku leyinene ngopfu leyi lunghiseleriweke ngopfu-ngopfu Vayuda i broxara leyi nge Will There Ever Be a World Without War?
3 I tidyondzo tihi leti nga tsakisaka Vayuda lava nga vapfumeri? Va pfumela leswaku ku ni Xikwembu xin’we, lexi khathalaka swinene hi vanhu. Nakambe va pfumela leswaku Xikwembu xa nghenelela etimhakeni ta vanhu. U nga ha tirhisa tinhla leti leswaku u veka masungulo. Ku engetela kwalaho, Vayuda vo tala va anakanya ngopfu hi ku xaniseka ka vanhu va ka vona hi nkarhi wa Nyimpi ya Vumbirhi ya Misava. Va tivutisa leswaku i yini lexi endleke leswaku Xikwembu xi pfumelela vuhomboloki byo tano ni leswaku vubihi byi ta hela rini. Hi hlomisiwe swinene leswaku hi hlamula swivutiso swo tano, hi xikombiso, hi vulavula hi leswi vamakwerhu va langutaneke na swona hi nkarhi wa ku dlayiwa ka Vayuda va le Yuropa hi Manazi.
4 Ina, leswaku u papalata ku humesa n’wini wa muti emhakeni, swi nga antswa loko wo ka u nga hatliseli ku vulavula hi mhaka ya Mesiya ebulweni ra n’wina. Ematshan’weni ya sweswo, u nga ha bula hi leswi Muxe a swi endleke ematin’wini ya Vaisrayele ivi u vutisa n’wini wa muti loko a pfumela leswaku tidyondzo ta Muxe i ta nkoka namuntlha. Loko swi vonaka swi fanela ku bula hi Mesiya, u nga ha rhanga hi ku hlaya Deteronoma 18:15, leyi nge: “Yehovha Xikwembu xa wena u ta ku yimisela muprofeta a huma exikarhi ka wena, a huma eka vamakwenu, ku fana na mina—yena mi fanele mi n’wi yingisa.” Vutisa n’wini wa muti leswaku Muxe a a vula mani loko a vulavula hi muprofeta la fanaka na yena. Kutani boxa tinhla ti nga ri tingani leti nga eka broxara leyi nge World Without War, tluka 14, tindzimana 17 na 18.
5 Vayuda Lava Nga Riki Vapfumeri Va Ni Langutelo Leri Hambaneke: A hi Vayuda hinkwavo lava amukelaka tidyondzo ta Vuyuda. Vayuda vo tala a hi vapfumeri. Va tsakela swinene ku kondletela Vuyuda lebyi hambaneke, lebyi nga ni ndhavuko, mukhuva ni dyondzo, ku ri na ku pfumela eka vukhongeri bya Vuyuda. Vayuda van’wana lava nga riki vapfumeri va vula leswaku Xikwembu a xi tiviwi—va nga ri vangani va ala ni vukona bya Xikwembu. Xo sungula, a mi nge yi helo loko mi tshaha swinene eMatsalweni ya Xiheveru. Swi nga va swinene ngopfu loko mi bula hi ndlela leyi a mi ta bula ha yona ni munhu loyi a nga riki mupfumeri. Hi xikombiso, u nga ha hlamusela ndlela leyi Bibele yi pfunaka ha yona esikwini ra hina. Loko n’wini wa muti a nga pfumeli leswaku Bibele yi huhuteriwile, tinhla tin’wana leti nga eka broxara leyi nge World Without War ti nga pfuna, ngopfu-ngopfu leti kumekaka eka xiyenge lexi nga eka tluka 3 lexi nge “Bibele—Xana Yi Huhuteriwe Hi Xikwembu?”
6 Loko u chumayela Muyuda, u nga ha ku:
◼ “Vo tala va hina hi tshame hi feriwa hi varhandziwa va hina. Xana u ehleketa leswaku ku humelela yini hi hina loko hi fa?” Yimela nhlamulo. Kutani komba n’wini wa muti bokisi leri nge “Rifu Ni Moya-xiviri—Xana I Yini?” eka tluka 22 ra broxara leyi nge World Without War. Bokisi leri ri ringanisa leswi Matsalwa ma swi vulaka hi vutomi endzhaku ka rifu ni leswi varhabi va swi dyondzisaka. Kutani pfula eka tluka 23 eka ndzimana 17 ivi u n’wi kombisa leswaku hi ku ya hi Matsalwa, vafi va ta pfuxeriwa evuton’wini emisaveni leyi nga paradeyisi. Fambisa broxara. Leswaku u lunghiselela ku endla riendzo ro vuyela, u nga ha boxa leswaku mupatriarka Yobo a ri ni ntshembo wa ku pfuxiwa ka vafi. Vulavula hi matsalwa lama boxiweke emakumu ka ndzimana 17, ivi u tshembisa leswaku u ta vuya mi ta bula ha wona.
7 Buku ya Matewu, Marka, Luka, Yohane na Mintirho ti vulavula hi mintokoto ya Vayuda lava yingiseke ni ku hanya hi ntiyiso. Yehovha wa ha yi pfurile ndlela leyi yisaka evuton’wini lebyi nga heriki. Vayuda vo tala lava tshembekaka va nga dyondza hi Yehovha, Xikwembu xa ntiyiso, leswaku na vona va hanya hi masiku emisaveni leyintshwa ya Xikwembu.—Mik. 4:1-4.