April—N’hweti Yo Hisekela Mintirho Leyinene!
1 Loko xidzedze xi ri kusuhi ni ku hlasela ndhawu leyi nga ni vanhu, goza ro sungula leri faneleke ku tekiwa i ku lemukisa vanhu hi khombo leri tshinelaka. Loko xidzedze se xi ri kwala nyongeni, vanhu va fanele va lemukisiwa swinene. Ha yini? Hikuva vutomi byi le khombyeni! Swi nga ha endleka vanhu van’wana va nga swi twanga switsundzuxo swo sungula. Van’wana va nga ha va va swi twile kambe va nga teki goza. Swi tano ni hi xitsundzuxo xa Xikwembu lexi hi lerisiweke ku xi twarisa, “mheho” ya vukarhi byo lulama bya Xikwembu, yi nga si herisa swilo hinkwaswo swa misava leyi yo homboloka. (Swiv. 10:25) Vanhu va tibiliyoni va le khombyeni ra ku herisiwa hilaha ku nga heriki! Xitsundzuxo xi fanele xi twarisiwa. Hi fanele hi ‘hisekela mintirho leyinene.’—Tito 2:11-14.
2 Ku ringana makume ya malembe, vanhu va Yehovha va susumeteleke ku endla nguva ya Xitsundzuxo yi va nkarhi wa ku hiseka swinene evutirhelini. Hi ximun’wana xa 1939, Informant, leyi sweswi yi nga Vutirheli Bya Hina Bya Mfumo, yi nyikele xikhutazo lexi: “Leswi ximun’wana xi tshinelaka, naswona ku nga ta va ni maxelo lamanene, hi fanele hi langutela leswaku tiawara ta vahuweleri va [vandlha] ta vutirheli bya nsimu ti andza kambirhi, naswona maphayona ma ta va ni nkarhi lowu engetelekeke swinene. April i n’hweti leyi nga ni Tisonto ta ntlhanu. Naswona yi ni Migqivela ya ntlhanu. Endla siku ra Mugqivela ni Sonto yin’wana ni yin’wana hi April . . . ma va masiku yo nyikela vumbhoni byo hlawuleka.” Yoleyo a ku ri pakani leyinene leyi vekeriweke vamakwerhu malembe ya 60 lama hundzeke! Nan’waka, ku fana ni hi 1939, n’hweti ya April yi na mahelo-vhiki ya ntlhanu. U kunguhate ku endla yini n’hweti leyi? Xana u tsale yini eka khalendara ya wena leswi u nga ta swi endla hi April 2000? Tivekele pakani ya ku hlanganyela hi xitalo emintirhweni leyinene swin’we ni vanhu va Yehovha hinkwavo hi n’hweti leyi yo hlawuleka leyi nga ni mintirho yo tala ya moya.
3 Leswi Hi Tiyimiseleke Ku Swi Fikelela: Siku ra risima swinene eka lembe leri ra 2000 ri wela eka n’hweti leyi. Siku ra kona i April 19, ku nga siku ro tlangela rifu ra Yesu. A hi endleni matshalatshala yo hlawuleka leswaku hi rhamba vanhu vo tala swinene hilaha hi nga kotaka hakona leswaku va ta eXitsundzuxweni. Hilaha swi ringanyetiweke hakona n’hweti leyi hundzeke, tsala mavito ya hinkwavo lava nga vaka kona eXitsundzuxweni ivi u kambisisa leswaku a ku na lava u va rivaleke. Eka lava nga ta rhambiwa ku fanele ku va ni vahuweleri vahi ni vahi lava holeke, swichudeni swa Bibele, vanhu lava hi faneleke hi endla maendzo yo vuyela eka vona, lava a hi dyondza na vona khale, vatirhi-kulorhi, vadyondzi-kulorhi, vaakelani, maxaka ni van’wana lava hi va toloveleke. Lava lavaka ku ta, xana va na xona xofamba? Loko va nga ri na xona, xana hi rirhandzu, u nga va pfuna? Hi vusiku bya Xitsundzuxo, hinkwerhu hi ta va ni lunghelo ro endla leswaku lava nga ta va kona va titwa va amukelekile. Endzhaku ka Xitsundzuxo, vanhu vo tano lava tsakelaka hi nga ha ya emahlweni hi va pfuna hi tlhelo ra moya.
4 Ku ‘hisekela mintirho leyinene’ emahlweni ni le ndzhaku ka Xitsundzuxo, i ndlela leyinene yo kombisa Yehovha leswaku ha swi tlangela hakunene hinkwaswo leswi a hi endleleke swona. Leswi n’hweti leyi yi nga na mahelo-vhiki ya ntlhanu, vo tala va hina hi ta swi kota ku endla matshalatshala lama engetelekeke entirhweni wo twarisa evhangeli. Loko u ri phayona ra nkarhinyana, u ta lava ku endla hilaha u nga kotaka hakona leswaku u heta 50 wa tiawara kumbe ku tlula evutirhelini bya nsimu. (Mat. 5:37) Xi namarhele swinene xiyimiso lexi u xi tsaleke loko n’hweti yi sungula. (Ekl. 3:1; 1 Kor. 14:40) Onge hinkwerhu ka hina hi nga endla leswi hi nga swi kotaka leswaku hi antswisa ku seketela ka hina maphayona, hi ku ma khutaza na hi ku tirha na wona ensin’wini. (Ringanisa 2 Tihosi 10:15, 16.) Loko hi byala hi ku hiseka hi April, hi nga ha kuma ntsako lowukulu ni nkateko lowu humaka eka Yehovha. (Mal. 3:10) Kumbexana leyi yi ta va ndlela leyinene yo hambeta ni vuphayona bya nkarhinyana kumbe bya nkarhi hinkwawo. Onge ku hiseka ka hina hi tlhelo ra moya loku hi nga ta va na kona hi April ku nga hundzela ni le ka tin’hweti leti landzelaka, loko hi ri karhi hi ya emahlweni tanihi vahuweleri va Mfumo va nkarhi hinkwawo.
5 A swi kanakanisi leswaku eka n’hweti leyi, magidi ya vanhu va Yehovha ma ta sungula tidyondzo leti engetelekeke ta le kaya ta Bibele. Xana u nga tsakela ku sungula dyondzo yo tano? Hi ku kongoma, khongelela ku kuma dyondzo ya Bibele, ivi u tirha hi ku pfumelelana ni swikhongelo swa wena. Tiyiseka leswaku Yehovha u ta amukela swikombelo swa wena swa ku titsongahata swo lava mpfuno eku kumeni ka vanhu va timbilu letinene leswaku u va dyondzisa.—1 Yoh. 3:22.
6 Hi leri endlelo leri tirhisiweke swinene ensin’wini naswona leri humelelaka eku sunguleni ka mabulo. U nga ha sungula hi ku vutisa u ku: “Xana u anakanya leswaku madzolonga hinkwawo lama nga kona eswikolweni ma vangiwa hi nkucetelo wa madimona kumbe ma vangiwa hi ku pfumala ndzetelo wa vutswari?” Yimela nhlamulo. Loko munhu a ku “ma vangiwa hi madimona,” hlaya Nhlavutelo 12:9, 12, ivi u kandziyisa xiphemu xa Diyavulosi eku hlohloteleni ka mpfilumpfilu emisaveni. Kutani pfula broxara leyi nge Leswi Xi Swi Languteleke eka dyondzo 4, ivi u vutisa munhu loyi leswaku u tshame a tivutisa leswaku Diyavulosi u huma kwihi. Yana emahlweni u hlaya ni ku bula hi tindzimana timbirhi to sungula. Loko munhu yoloye a vula leswaku lexi vangaka madzolonga eswikolweni i “ku pfumala ndzetelo wa vutswari,” hlaya 2 Timotiya 3:1-3 ivi u kombisa mikhuva leyi entiyisweni yi hoxaka xandla eka xirhalanganya lexi. Kutani pfula broxara leyi nge Leswi Xi Swi Languteleke eka dyondzo 8, hlaya ndzimana 5, ivi u ya emahlweni ni bulo. Loko mi twanana leswaku u vuya, swi nga ha endleka leswaku u pfula ndlela yo sungula dyondzo ya Bibele ya nkarhi na nkarhi ni munhu loyi. Loko u ri karhi u n’wi endzela, n’wi vutise loko a tiva un’wana loyi a nga ha tsakelaka ku twa leswi yena a swi dyondzaka.
7 Ndlela yin’wana yo ‘hiseka emintirhweni leyinene’ hi April i ku hlanganyela eka swiyenge swo hambana-hambana swa ntirho wo chumayela. Xana u tshame u anakanya hi ku nyikela vumbhoni ephakeni kumbe laha mimovha yi pakiwaka kona? Eswitichini swa mabazi kumbe swa xitimela? Kumbe u nga tsakela ku ringeta ku nyikela vumbhoni hi riqingho, exitarateni, kumbe etindhawini ta mabindzu? Ha yini u nga ringeti tin’wana ta tindlela leti, n’hweti leyi? Yehovha u ta ku pfuna leswaku u va ni xivindzi lexi lavekaka. (Mint. 4:31; 1 Tes. 2:2b) Kumbexana u nga hlela ku tirha ni phayona kumbe muhuweleri loyi a nga ni ntokoto hi tindlela leti ta le vutirhelini.
8 Swa fanela leswaku un’wana ni un’wana loyi a navelaka ku tirha nkarhi lowu engetelekeke entirhweni wo nyikela vumbhoni, a hlanganyela eku nyikeleni ka vumbhoni hi xitshuketa. Hakanyingi leswi lavekaka i ku sungula bulo ra xinghana ni munhu. U nga ha sungula mhaka leyi tolovelekeke leyi kokaka nyingiso, kumbexana u tirhisa endlelo leri kandziyisiweke eka ndzimana 6. Lwela ku wu tirhisa kahle hambi ku ri nkarhi wutsongo lowu a wu ta lahleka. A hi ti cukumeti tisente hikwalaho ka leswi ti nga ringaniki ni tirhandi. Ha yini u nga tirhisi ntlhanu wa timinete, khume ra timinete kumbe kotara ya awara hi ndlela leyi vuyerisaka eku nyikeleni vumbhoni hi xitshuketa?
9 Nkarhi Wo Anakanyisisa: Anakanya hi tinhla ta nkoka leti ku vulavuriweke ha tona eka drama ya Ntsombano wa Muganga wa “Rito Ra Xikwembu Ra Vuprofeta” wa n’wexemu. Drama leyi a yi ri ni nhloko-mhaka leyi nge Ku Tlangela Ndzhaka Ya Hina Ya Moya, yi hi endle hi anakanya hi vukheta malunghana ni ku hambana exikarhi ka Yakobe na Esawu. Esawu u vule leswaku a a tsakela swilo swa moya ku fana na Yakobe, kambe mintirho ya Esawu a yi kombisa leswi hambaneke. (Gen. 25:29-34) Mawaku xitsundzuxo xa matimba swinene eka hina! Ku fana na Yakobe, a hi lunghekeleni ku endla matshalatshala lama engetelekeke, hambi ku ri ku lwela nkateko wa Yehovha. (Gen. 32:24-29) Ha yini hi nga tirhisi April swin’we ni tin’hweti leti landzelaka leswaku hi pfuxeta ku hiseka ka hina, ivi hi hlakulela ku nga yi tekeli ehansi ndzhaka ya hina leyo saseka ya moya?
10 “Siku lerikulu ra Yehovha ri le kusuhi. Ri le kusuhi, naswona ra hatlisa swinene.” (Sof. 1:14) Mahungu lamanene ya Mfumo ma fanele ma twarisiwa. Vutomi byi le khombyeni! Onge n’hweti leyi yi nga va n’hweti ya risima swinene eka vanhu va Yehovha hinkwavo, loko hi vun’we hi ri karhi hi kombisa leswaku hi ‘hisekela mintirho leyinene.’
[Bokisi leri nga eka tluka 4]
Switsundzuxo Swa Nkhuvo Wa Xitsundzuxo
Nan’waka nkhuvo wa Xitsundzuxo wu ta va hi Ravunharhu, April 19. Vakulu va fanele va xiyisisa timhaka leti landzelaka:
◼ Loko mi hlela nkarhi wa nhlangano, tiyisekani leswaku swifanekiselo a swi nge fambisiwi loko dyambu ri nga si pela.
◼ Vanhu hinkwavo, ku katsa ni xivulavuri, va fanele va tivisiwa nkarhi ni ndhawu leyi faneleke leyi nga ta tirhisiwa.
◼ Xinkwa ni vhinyo leyi faneleke swi fanele swi kumiwa ni ku lunghisiwa ka ha ri emahlweni.—Vona Xihondzo xo Rindza xa February 1, 1985, tluka 29 (xa Xinghezi February 15, 1985, tluka 19).
◼ Tipuleti, Tinghilazi, tafula leri fanelekaka ni nguvu ya tafula swi fanele swi tisiwa eholweni ivi swi vekiwa ka ha ri na nkarhi.
◼ Holo ya Mfumo kumbe ndhawu yin’wana ya nhlangano yi fanele ku basisiwa kahle ka ha ri na nkarhi.
◼ Varindzi ni vafambisi va swifanekiselo va fanele va hlawuriwa ni ku leteriwa ka ha ri emahlweni malunghana ni mintirho ya vona kun’we ni endlelo leri faneleke.
◼ Ku fanele ku endliwa malunghiselelo ya ku yisa swifanekiselo eka mutotiwa un’wana ni un’wana la vabyaka loyi a nga ta tsandzeka ku ta.
◼ Loko Holo ya Mfumo yi ta tirhisiwa hi mavandlha yo hlayanyana, mavandlha lawa ma fanele ma hleleka leswaku ku ta papalatiwa ntlimbano eminyangweni, etindleleni leti vanhu va fambaka eka tona kun’we ni le tindhawini to paka mimovha.