Tikhome Hi Ndlela Leyinene Leyi Dzunisaka Xikwembu

¹ Kun’wana ni kun’wana laha hi nga kona, ku tikhoma ka hina, maambalelo ya hina ni ku tilunghisa ka hina swi nyikela vumbhoni ha hina ni Xikwembu lexi hi xi gandzelaka. Leswi swi tikomba ngopfu eminhlanganweni leyikulu ya vanhu va Xikwembu, laha hi voniwaka hi vanhu vo tala. Loko hi va swikombiso leswinene, vito ra Yehovha ra kwetsimisiwa. (1 Pet. 2:12) Kambe, ku tikhoma hi ndlela ya vusopfa kumbe swiendlo swa ku nga khathali leswi endliwaka hi vanhu va nga ri vangani swi nga tisa ndzhukano eka vito ra Xikwembu ni le ka vanhu va xona. (Ekl. 9:18b) Ku tsundzuka leswaku hi ku tikhoma ka hina, vanhu va misava va nga va ni langutelo ro karhi hi nhlengeletano ya hina ni Xikwembu lexi hi xi gandzelaka, swi fanele swi hi susumetela ku ‘endla hinkwaswo leswaku hi vangamisa Xikwembu.’—1 Kor. 10:31.

² Ku Tikhoma Hi Ndlela Leyi Nga Xikombiso Lexinene eTihotela Ni le Tihositele: Hakanyingi, vatirhi va tsakisiwa hi ku hleleka, mikhuva leyinene ni ku tenga ka Timbhoni ta Yehovha. Loko mufambisi un’wana a vulavula hi mindyangu ya Timbhoni leyi tshameke ehotela yakwe, u te: “A ndzi si tshama ndzi vona vana lavanene ku fana ni vana va Timbhoni ta Yehovha! Va ambala hi ndlela leyi xiximekaka; va xixima, va ni musa naswona va ni mahanyelo lamanene; a va si tshama va pfuxa hasahasa nikan’we. Kunene ma bumabumeriwa hikwalaho ka vantshwa va n’wina. Hi tsakele ku va ni vana va n’wina laha.” Marito yo fana ni lawa mo titela kunene loko lava hi tirhisanaka na vona va vona rirhandzu ni ku xixima leswi nga kona exikarhi ka vanhu va Yehovha.

³ Kasi hi hala tlhelo, marito lama humaka eka vatirhi van’wana ma kombisa leswaku ka ha ri ni xiphiqo hi vanhu van’wana lava tikhomaka hi ndlela ya vusopfa kumbe lava tirhisaka swilo hi ndlela leyi nga fanelangiki. Leswi swi vanga swisolo leswi a swi nga faneli swi va kona. Vafambisi van’wana va rila hi leswaku vana van’wana va ni pongo naswona a va lawuleki, va tirhisa tindhawu to hlambela kumbe tindhawu tin’wana ta vuhungasi handle ko kongomisiwa hi vatswari va vona.

⁴ Tihotela ni tihositele to tala ti ni milawu leyi lava etlelaka eka tona va languteriweke ku yi landzela. Vamakwerhu van’wana va tlule milawu leyi, leyi khumbaka pongo kumbe ku swekela emakamareni ya kona. Vafambisi va tihotela ni tihositele va hi byela leswaku nawu lowu talaka ku tluriwa etindhawini ta vona i wa ku swekela laha swi yirisiweke ku sweka kona. A hi mhaka ntsena ya ku onha makamara hi ku kongoma, kambe ku sala ni risema leri endlaka leswaku swi teka masiku yo hlaya kumbe mavhiki swi nga koteki ku rhurhela vanhu van’wana emakamareni wolawo. Ku nga swekeriwa ekamareni loko swi vuriwe hi ku kongoma, handle ka sweswo ku nga tshuki ku endliwa tano.

⁵ Swi ta lava matshalatshala lamakulu ya ku khomisana hi ku helela ni vakongomisi. Entiyisweni a hi lavi ku siya vito ro biha hi vanhu va Yehovha. Leswi hi nga Vakreste, hi fanele ku tikhoma hi vutshembeki minkarhi hinkwayo. A hi fanelanga hi teka switirhisiwa kumbe “swikhaviso” swin’wana swa le hotela, hikuva sweswo i ku yiva; naswona loko hi endla swikombelo swa ndhawu yo tshama kumbe loko hi fika eka yona, hi fanele hi tshembeka hi ku tisa nhlayo ya vanhu lava hi nga va kombelela ku ta tshama na vona ekamareni rero ntsena.

⁶ Ku Languteka Lokunene eNtsombanweni: Ku nga khathariseki leswaku ntsombano wu khomeriwe endhawini ya njhani, hi nkarhi wolowo yi fanele ku tekiwa yi ri Holo leyikulu ya Mfumo. Maambalelo ni ku tisasekisa loku faneleke swi fanele swi fana niloko hi ya eminhlanganweni ya vandlha ra ka hina. Hi nkarhi wa minongonoko ya ntsombano ni le ndzhaku ka yona, vamakwerhu va fanele ku papalata ku ambala swiambalo leswi nga fanelangiki kumbe swa fexeni leyi humeke endleleni, leswi kombisaka moya wa misava ni ku endla swi tika ku hi hambanisa ni vanhu va misava. Vamakwerhu va xisati va fanele ku xiyisisa leswaku switayela ni ku leha ka swiketi ni tirhoko ta vona swa faneleka. (1 Tim. 2:9, 10) Komiti yin’wana ya Ntsombano yi nyike xiviko lexi landzelaka lexi humaka eka munhu la tsakelaka: “Vanhu va Yehovha i vanhu lavanene. Dyondzo ya vona i ntiyiso kambe swiambalo swa lava xisati a hi swinene ku fana ni swa vanhu va kereke ya Apostolic.” Komiti leyi yi xiye leswaku “xiphiqo lexikulu hi leswaku mindyangu yin’wana ya vakulu a yi veki xikombiso lexinene.” Komiti yin’wanyana ya Ntsombano yi vikile: “Hi tsakisiwe hi ku vona vamakwerhu va xisati vo tala va ambale hi ndlela ya Vukreste. Kambe a swi tsema nhlana ku vona leswaku a ka ha ri ni vamakwerhu van’wana va xisati lava ambaleke swiketi swo koma kumbe tirhoko leti pfulekeke ku ya fika emindzhumbini.” Leswaku mimboyamelo leyi yi papalatiwa, swi nga va swinene loko mindyangu yo burisana hi mhaka ya maambalelo lama faneleke, edyondzweni ya ndyangu. Hambi hi ya entsombanweni, hi tshama ehotela kumbe ehositele, hambi hi ri eku dyeni ekhefini kumbe hi ri eku xaveni exitolo, minkarhi hinkwayo hi fanele hi kombisa leswaku hi vatirheli va Xikwembu, hi papalata ku khunguvanyisa van’wana.—2 Kor. 6:3.

⁷ Entsombanweni ku ta va ni nkhuvulo hi Mugqivela nimixo. Xihondzo xo Rindza xa April 1, 1995, eka tluka 30, xi hlamusela langutelo leri hi faneleke hi va na rona eka xiendlakalo xo tano. Xi vula leswaku hi ‘fanele ku teka nkhuvulo wu ri nchumu wa nkoka. A hi nkarhi wa ku nyanyukela etlhelo, wa ku giya kumbe wa ku tsakela etlhelo. Naswona a hi nkarhi wa gome kumbe ku karhateka.’ Swi ta va swi nga fanelanga nikatsongo leswaku lava khuvuriwaka va ambala swiambalo swo hlambela leswi khomaka ngopfu kumbe leswi vonikelaka, ku nga khathariseki leswaku i va xinuna kumbe i va xisati. Hikwalaho, hinkwerhu hi fanele ku kombisa leswaku nkhuvulo wa Vukreste i xiendlakalo xa ntikelo ni lexi tsakisaka.

⁸ Petro u hi tsundzuxa ‘muxaka wa vanhu lava hi faneleke hi va vona hi tlhelo ra swiendlo swo kwetsima swa ku tikhoma ni swiendlo swa ku tinyiketela loku nga ni vukwembu.’ (2 Pet. 3:11) Onge marito ni swiendlo swa hina eNtsombanweni wa Muganga wa “Vaendli Va Rito Ra Xikwembu” swi nga pfuna vahlaleri lava nga ni timbilu to tshembeka va tiva ni ku gandzela Xikwembu xa hina lexikulu, lexi faneriwaka hi ku xiximiwa ni ku dzunisiwa.—1 Kor. 14:24, 25.