Loko Hi Endla Leswinene Hi Ta Bumabumeriwa!
1 “Va ni ku rhula loku ndzi nga si tshamaka ndzi ku vona eka vanhu van’wana.” “Swa tsakisa ku va ni vanhu lava.” Leti i tin’wana ta tinhlamuselo to tala leti tolovelekeke leti vuriweke hi vahlaleri endzhaku ka mintsombano ya muganga ya n’wexemu, leti kandziyisaka ndhuma leyinene ya tinhlengeletano ta hina. (Swiv. 27: 2; 1 Kor. 4:9) Swidzuniso sweswo swi hetelela swi ya eka Yehovha. (Mat. 5:16) Ntsombano wa Muganga wa nan’waka wa “Vadyondzisi Va Rito Ra Xikwembu,” wu hi vekele lunghelo rin’wana lerinene ra ku dzunisa Xikwembu.
2 Lembe ni lembe hi kuma switsundzuxo leswinene malunghana ni ku tikhoma lokunene entsombanweni. Ha yini? Hikuva hi papalata ku fambisana ni langutelo, maambalelo ni mahanyelo ya misava leswi yaka emahlweni swi hohloka. A hi lavi leswaku ndhuma ya hina leyinene yi onhaka. (Efe. 2:2; 4:17) A hi tshameni hi ri karhi hi tsundzuka swilemukiso leswi landzelelaka.
3 A Hi Endleni Leswinene—eTihotela, Laha Ku Pakiwaka Kona Tikharavhani Kumbe eTindlwini Leti Hirhiwaka: . (Hev. 13:18) Hikwalaho, hi fanele hi vula ntiyiso hi nhlayo ya vanhu lava hi nga ta tshama na vona. A hi fanelanga hi swekela ekamareni loko sweswo swi nga pfumeleriwi. Mufambisi un’wana u vule leswaku u kote ku hungutela Timbhoni ta Yehovha mali ya ku hirha makamara ya byetlelo, hikuva a a nga boheki ku sala a xava mathawula lama yiviweke. Wa swi tiva leswaku ndhawu yakwe yi ta khathaleriwa. Entiyisweni a hi fanelanga hi teka “swikhaviso.” Ku ri na sweswo, laha swi tolovelekeke ku nyika xo karhi ku ri ku nkhensa ntirho lowu endliweke, hi ta endla tano. Naswona minkarhi hinkwayo hi fanele ku tikhoma kahle ni ku lehisa mbilu loko hi tirhisana ni vatirhi va kwalaho.
4 Vanhu va tsaka loko va vona vana va hina va tikhoma hi ndlela leyinene ni ku va lava yingisaka. (Efe. 6:1, 2) Vatswari, mi komberiwa ku lawula vana va n’wina leswaku va nga kavanyeti vanhu van’wana, ku katsa ni loko va tirhisa tindhawu ta ku hlambela kumbe tindhawu tin’wana ta vuhungasi. Hinkwerhu hi fanele ku papalata ku hima mavanti kumbe ku ba huwa, ngopfu-ngopfu loko se byi ri vusiku.
5 Hi nga endla leswinene hi ku anakanyela vanhu lava nga riki Timbhoni lava na vona va hirheke endhawini leyi. A hi fanelanga hi longa swakudya leswi hi nyikiweke swona. Hi nga tshuki hi titwa onge milawu ya ndhawu ya byetlelo a yi tirhi eka hina.
6 A Hi Endleni Leswinene—Endhawini Ya Ntsombano: Swi xiyiwile leswaku vanhu van’wana lava teke entsombanweni va ale ku khomisana ni varindzi, va tlhela va vulavula na vona hi ndlela leyi nga riki ya Vukreste. Van’wana lava teke entsombanweni va kume mimovha ya vona yi kokiwile hi maphorisa, hikwalaho ko ala ku landzela swiletelo swa vamakwerhu kutani va paka laha ku yirisiweke ku paka. Kunene, ku va ni langutelo ra vutianakanyi a swi kombisi munhu a ri muendli wa leswinene naswona a swi tisi ku dzuneka eka Yehovha Xikwembu. Hikwalaho a hi veni ni rirhandzu, hi lehisa mbilu ni ku tirhisana ni van’wana.—Gal. 5:22, 23, 25.
7 Loko tinyangwa ta ntsombano ti pfuriwa hi 7:00 a.m., vamakwerhu van’wana va voniwe va ri karhi va tsutsuma, va dlidlimbetana ni ku susumetana leswaku va ta kuma switulu swo “antswa.” Van’wana va vavisekile hikwalaho ka mikhuva yo tano. Hambileswi ku ringanyetiweke leswaku hi ta ni swakudya swo khomisa rhumbu ninhlikanhi, a swi fanelanga ku veketela matafula endhawini yo paka mimovha leswaku ku ta dyiwa swi vonaka. Sweswo swi ta va swi nga hambananga ni tipikiniki leti endleriwaka eka swigolonyana, leti tolovelekeke loko ku ri ni mintlangu.
8 A Hi Endleni Leswinene—Hi Maambalelo Ya Hina Ni Ku Tisasekisa: Loko mintsombano yin’wana ya muganga ya n’wexemu yi herile, muhleri wa phepha-hungu leri xavisiwaka edorobeni rin’wana lerikulu u tsale a ku: “Ku tlula hinkwaswo, nchumu lowu a wu tsakisa swinene a ku ri ku tikhoma ka Timbhoni hi toxe.” A swi tsakisa swonghasi ku vona vanhu vo tala va tikhome hi ndlela leyi xiximekaka ni hi xichavo. Madzana ya mindyangu, a yi nghena erivaleni ra ntsombano, yi ambale swiambalo swa yona swo xonga swa Sonto naswona yi yimela mindhavuko ya tinxaka ni swivongo swo hambana-hambana. Ndlela leyi a va tikhome ha yona a yi hambane ngopfu ni ya mintshungu yo tala leyi taka exivandleni lexi. Entiyisweni, Timbhoni ti hambane ngopfu ni vanhu van’wana lava tolovelekeke. Se swi ya swi toloveleka ku vona vanhu lava va tikhomaka vuharhi endhawini ya mani na mani. . . . Hakunene, swa phyuphyisa ku tirhisana ni Timbhoni.” Onge hi nga lwela ku ambala ni ku tisasekisa hi ndlela leyi faneleke leswaku hi nga susi xindzhuti xa ntsombano hi ndlela yihi na yihi.—Filp. 1:10; 1Tim. 2:9, 10.
9 A Hi Endleni Leswinene—Loko Hi Khuvuriwa: Lava yaka eku khuvuriweni va fanele ku xi xixima swinene xiendlakalo lexi. Ku ambala swiambalo leswi faneleke swi ta kombisa ku tlangela ku kwetsima ka xiendlakalo lexi. Swi ta vuyerisa swinene leswaku vafambisi va tidyondzo ta Bibele va pfuxeta “Swivutiso Swa Vahlayi” swa nkandziyiso wa Xihondzo xo Rindza xa April 1, 1995, ni swichudeni swa vona ku nga si yiwa entsombanweni.
10 Ku tilunghisa ka hina ni mahanyelo ya ku chava Xikwembu swi nyikela vumbhoni eka tidyondzo ta hina ta Vukreste naswona swi endla leswaku vanhu va timbilu to tshembeka swi va olovela ku vona ntiyiso. Hikwalaho, a hi ‘hambeteni hi endla leswinene’ kutani hi bumabumeriwa eNtsombanweni wa Muganga wa “Vadyondzisi Va Rito Ra Xikwembu.”—Rhom. 13:3.