Dzunisa Yehovha Hi Mintirho Leyinene

¹ Loko wo kumiwa hi xidzedze lexikulu, u nga ku hefu, loko wo vona vutumbelo hi nkarhi wolowo! Loko vutumbelo bya kona byi hlayisekile no kufumela, naswona vini va byona va ri ni malwandla, u ta tsakela ku tshama kona. Ntirho wa ku chumayela hi Mfumo wu balekisa vanhu eka fambiselo ra Sathana wu va kongomisa eka vutumbelo byo tano. Xana mahanyelo ya hina ya siku ni siku ma nga pfuna van’wana va vona ndlela leyi vutumbelo lebyi byi nga xisirhelelo ha yona? Ina, hikuva Yesu u vule leswaku vanhu va ta ‘vona mintirho ya hina leyinene kutani va vangamisa Tata wa hina la nge matilweni.’—Mat. 5:16.

² Hi yihi ndlela leyi hi nga tikhomaka ha yona leswaku mintirho ya hina yi kokela van’wana eka Yehovha ni le nhlengeletanweni ya yena? Hi ku pfumelela marito ya Yesu lama tsariweke eka Luka 6:31 na 10:27 ma lawula vutomi bya hina bya siku ni siku. Sweswo swi ta hi susumetela ku kombisa vanhu-kulorhi nkhathalelo wa rirhandzu, swi hi hambanisa ni misava leyi nga riki na rirhandzu ni nkhathalelo.

³ Makwerhu un’wana wa xisati a a ri eriendzweni hi xikepe hiloko a vona wansati loyi hi ku chava lwandle, a tsandzekeke ku khathalela xihlangi xa yena. Makwerhu u tinyiketele ku khathalela xihlangi xexo. Loko wansati yoloye a vutisa makwerhu wa xisati leswaku a nga n’wi nkhensa hi yini, u te: ‘Ndzi kombela leswaku u yingisa Timbhoni ta Yehovha loko ti ku endzela enkarhini lowu taka.’ Wansati yoloye u endle tano kutani sweswi, yena ni nuna wakwe i Timbhoni. Mintirho leyinene yi pfule ndlela ya leswaku va amukela rungula ra Mfumo.

⁴ Vutomi Bya Hina Hinkwabyo Bya Katseka: Ndlela leyi hi tikhomaka ha yona laha hi tshamaka kona, loko hi ri entirhweni kumbe exikolweni ni hi minkarhi ya vuhungasi, swi susumeta vanhu leswaku va va ni langutelo ro karhi ha hina ni vukhongeri bya hina. Hikwalaho, hi endla kahle ku tivutisa hi ku: ‘Xana vanhu va ndzi teka njhani mina ni ndyangu wa ka hina? Xana vaakelani va vona yindlu ni jarata ra ka hina ri ri leri baseke naswona ri khathaleriwa kahle? Xana vatirhi-kulorhi ni lava hi nghenaka swin’we xikolo, va hi vona hi ri lava fikaka hi nkarhi ni ku tirha hi matimba? Xana van’wana va ta vona ndlela leyi hi langutekaka ha yona yi ri yinene ni ku xiximeka?’ Mintirho ya hina leyinene yi endla leswaku vugandzeri bya Yehovha byi koka rinoko swinene eka van’wana.

⁵ Petro u lemukise leswaku Vakreste va ta hlekuriwa. (1 Pet. 4:4) Hi fanele ku tiyiseka leswaku mahanyelo ya hina a hi wona ma vangaka leswaku hi vulavuriwa hi ndlela yo biha. (1 Pet. 2:12) Loko mintirho ya hina ya siku ni siku yi dzunisa Xikwembu lexi hi xi gandzelaka, hi ta fana ni timboni leti hayekiweke ehenhla, hi kongomisa vanhu evutumbelweni lebyi hlayisekeke lebyi lunghiseleriweke hi Yehovha.—Mat 5:14-16.