Hinkwerhu A Hi Xiximeni Yehovha Ni N’wana Wa Yena
Ndlela Leyi Hinkwavo Lava Nga Ta Va Kona eXitsundzuxweni Hi April 8 Va Nga Ta Vuyeriwa Swinene Ha Yona
1 I vamani namuntlha lava xiximiwaka hi ndlela yo hlawuleka? Hi lava misava yi tekaka swiendlo swa vona swi ri swa nkoka swinene. Hambiswiritano, minkarhi yo tala swiendlo swa vona swi hatla swi rivariwa. Kambe hi nga ku yini hi swiendlo leswi swi vuyerisaka vanhu hakunene? Hi ta nyikela nyingiso wa hina lowukulu eka xiendlakalo lexikulu eka hinkwaswo loko hi tlangela Xilalelo xa Hosi endzhaku ka ku pela ka dyambu hi April 8, 2001.
2 I mani loyi a faneleke a xiximiwa swinene? Bibele ya hlamula: “Swa ku fanela, Yehovha, . . . ku amukela ku vangama ni ku xiximiwa ni matimba, hikuva u tumbuluxe swilo hinkwaswo.” (Nhlav. 4:11) Leswi Yehovha a nga Muvumbi, i Hosi leyi Fumaka vuako hinkwabyo. U ta tshama a ri la faneriwaka hi ku xiximiwa hi laha ku nga heriki!—1 Tim. 1:17.
3 Yesu Kreste, N’wana wa Xikwembu, u endle swiendlo leswi fanelekaka, leswi nga ta tisela vanhu mikateko leyi nga riki na makumu. U tekelele Tata wakwe hi ku hetiseka. (Yoh. 5:19) Ku yingisa ka yena hi ku helela ni vutirheli bya yena lebyi tshembekeke swi n’wi endle a “faneriwa hi ku amukela matimba ni rifuwo ni vutlhari ni ntamu ni ku xiximiwa ni ku vangama ni ku dzuneka.” (Nhlav. 5:12) Tata wa yena u n’wi xixime hi ku n’wi veka exiluvelweni a va Hosi. (Ps. 2:6-8) Loko ku ri hina, hi ta va ni lunghelo ra ku xixima Tatana ni N’wana wa yena loko hi tlangela Xilalelo xa Hosi hi April 8, 2001.
4 Swi twisa ku vava leswaku ematin’wini ya vanhu, a hi vangani lava xiximeke Yehovha ni N’wana wa yena hi ndlela leyi yi va faneleke. Minkarhi yin’wana hambi ku ri vanhu va Xikwembu va khale, Vaisrayele, a va tirhela Yehovha ku hetisisa nawu ntsena. Koloko a ku ri ku delela loku tsemaka nhlana. (Mal. 1:6) Ku xixima loku faneleke ku lava ku yingisa hi vutshembeki lebyi sekeriweke erirhandzwini ni le ku tlangeleni ka hinkwaswo leswi Yehovha ni N’wana wa yena va hi endleleke swona. Ku xixima ko tano ku lava leswaku hi kombisa ku chava Xikwembu ni ku xi xixima, hi nkhensa Yehovha na Yesu eka hinkwaswo leswi hi swi endlaka. Vandlha ra Vukreste ri lwela ku hi dyondzisa ni ku pfuna van’wana leswaku va endla hilaha ku fanaka.
5 Xiendlakalo Xa Nkoka Xa Ku Kombisa Ku Xixima: Lembe ni lembe, nkhuvo wa ku tlangela Xitsundzuxo i wa risima swinene eka vanhu va Yehovha. Un’wana ni un’wana la navelaka ku xixima Yehovha u fanele ku va kona. (Luka 22:19) Ku engetela eka Timbhoni leti nga kona ta timiliyoni ta tsevu, hi langutele leswaku nhlayo ya vanhu lava tsakelaka lava nga ta va kona yi tlula timiliyoni ta 14. Rolero i lunghelo lerikulu ra ku xixima Tata wa hina wa le tilweni! Hambileswi nkhuvo lowu wu yisaka nyingiso eka Yesu, ku kombisa ku xixima ni xichavo eka leswi a swi endleke swi dzunisa Tatana, loyi a n’wi rhumeke.—Yoh. 5:23.
6 I yini lexi hi nga xi endlaka leswaku hi seketela xiendlakalo lexi xo hlawuleka? Hi nga pfuna lava ha ku sungulaka ku tsakela leswaku va vuyeriwa hi xitalo. Va khutaze leswaku va va kona, naswona loko ku ri ni xilaveko, hi musa va pfune leswaku va kota ku fika laha nkhuvo wu nga ta tlangeriwa kona. Va hlamusele xikongomelo xa nkulumo leyi nga ta nyikeriwa. Va tivise eka van’wana. Leswi va swi vonaka ni ku swi twa swi nga va susumetela ku lava ku hlanganyela na hina eku dzuniseni ka Yehovha.
7 U nga ma tekeli ehansi matimba ya nongonoko lowu. Xichudeni xin’wana xa le yunivhesiti xi titwise xileswi: “A ndzi hamba ndzi ya eXilalelweni xa kereke ya hina, kambe leswi swi hambanile swinene. Ndza swi vona leswaku leswi hi swona leswi Bibele yi swi lerisaka kutani ndzi anakanya leswaku mi famba hi ntiyiso.” Xi sungule ku va kona eminhlanganweni minkarhi hinkwayo kutani ku nga ri khale xi khuvuriwile.
8 Pfuna Lava Sungulaka Ku Va Kona Leswaku Va Endla Nhluvuko: Xiya lava sungulaka ku va kona eXitsundzuxweni kutani u va endzela hi ku hatlisa endzhaku ka nhlangano lowu, leswaku u ta pfuxeta swilo leswi tsakisaka leswi va swi dyondzeke ni ku swi vona. Va tivise hi minhlangano leyin’wana, laha va nga engetelaka vutivi bya vona bya Bibele. Ku dyondza na vona ndzima 17 ya buku leyi nge Vutivi, eka nhloko-mhaka leyi nge “Kuma Nsirhelelo eXikarhi Ka Vanhu Va Xikwembu,” ku ta va kombisa malunghiselelo yo tala ya moya lawa ma va pfulekeleke, lawa va nga ma kumaka evandlheni. Endla malunghiselelo ya leswaku va vona vhidiyo leyi nge Our Whole Association of Brothers, leswaku va ta tivonela hi ya vona, vun’we, ntsako ni ku hiseka ka vanhu va Yehovha!
9 I swa nkoka leswaku vanhu lava ha ku tsakelaka va dyondza ndlela leyi vona vini va nga kombisaka Yehovha xichavo ni ku n’wi xixima. Va hlamusele leswaku Yehovha u tsakisiwa hi xikhongelo lexi endliwaka hi mbilu hinkwayo ni leswaku minkarhi hinkwayo i xihlovo xa ku phyuphya emoyeni. (1 Yoh. 5:14) Tirhisa tidyondzo 8 ku ya eka 12 ta broxara leyi nge Leswi Xi Swi Languteleke, ku hlamusela muxaka wa mahanyelo lama xiximaka Yehovha. Hlamusela leswi vuriweke eka broxara leyi nge Timbhoni Ta Yehovha, matluka 30-1, leswaku u khutaza vanhu lava vantshwa va anakanya hi ku xixima Yehovha, hi ku va un’wana ni un’wana wa vona a hlanganyela entirhweni wa ku chumayela.
10 Ku tlangela xitlhavelo xa Yesu ni lunghelo leri hi nga na rona ra ku va vadyondzisiwa va yena, swi xixima Tatana naswona swi tisela van’wana mikateko. Yesu u tshembise a ku: “Loko munhu a ta ndzi tirhela, Tatana u ta n’wi xixima.”—Yoh. 12:26.