I Swinene Ngopfu Ku Olovisa Swilo
1 I yini lexi endlaka leswaku hakanyingi vahuweleri lavantshwa va yingisiwa loko va nyikela rungula ra Mfumo? Xivangelo xin’wana hi leswaku leswi va swi vulaka swa olova. Vahuweleri van’wana va ehleketa leswaku ku nyikela vumbhoni hi ndlela leyi humelelaka swi lava u va xivulavuri xa matimba. Hambiswiritano, ntokoto wu kombisa leswaku xingheniso xo olova ni lexi nga erivaleni i xinene ngopfu.
2 Yesu u chumayele Mfumo wa Xikwembu hi ndlela yo olova, leyi kongomeke, kutani a letela vadyondzisiwa va yena leswaku va endla hi ndlela leyi fanaka. (Mat. 4:17; 10:5-7; Luka 10:1, 9) U tirhise swingheniso, swivutiso, ni swifaniso leswi nga rharhanganangiki, leswaku a koka nyingiso wa vayingiseri va yena ni ku fikelela timbilu ta vona. (Yoh. 4:7-14) Hi ta va hi endla kahle loko hi tekelela xikombiso xa yena, hi tirhisa swingheniso leswi olovaka ku swi twisisa.
3 Hi chumayela ‘mahungu lamanene ya mfumo.’ (Mat. 24:14) Ku tirhisa Mfumo tanihi xisekelo xa nhloko-mhaka ya wena swi ta ku pfuna ku olovisa xingheniso xa wena. Vulavula hi swilo leswi khumbaka vayingiseri va wena. Hakanyingi vavasati va khumbiwa swinene hi mindyangu ya vona ku tlula timhaka ta tipolitiki. Lexi tatana a karhatekaka ha xona swinene i ntirho wa yena wa ku tihanyisa ni vuhlayiseki bya ndyangu wa yena. Vantshwa va tsakela vumundzuku bya vona; vanhu lava kuleke va karhateke hi ku kuma rihanyo lerinene ni vuhlayiseki. Hakanyingi vanhu va khumbiwa swinene hi swiendlakalo swa muganga wa ka vona ku tlula leswi endlekaka ematikweni ya le kule. Endzhaku ko vulavula hi swilo leswi mi khumbekaka ha swona havumbirhi bya n’wina, yisa nyingiso wa yena eka mikateko leyi vanhu lava yingisaka va nga ta yi tsakela loko Mfumo wa Xikwembu wu fuma. Marito ma nga ri mangani lama hlawuriweke kahle ku katsa ni tsalwa, swi nga va ndlela leyinene ya ku pfuxa ku tsakela ka muyingiseri wa wena.
4 U nga sungula bulo hi ku:
◼ “A ndzi kanakani leswaku wa pfumela leswaku vanhu va hlaseriwe hi mavabyi yo tala lama nga tshungulekiki. Kambe, xana a wu swi tiva leswaku Xikwembu xi tshembise ku herisa mixaka hinkwayo ya mavabyi swin’we ni rifu, ku nga ri khale?” N’wi nyike nkarhi wa ku angula kutani u hlaya Nhlavutelo 21:3, 4.
5 Onge u nga tirhisa swingheniso swo olova ku fikelela mianakanyo ni timbilu ta vanhu lava engetelekeke ensin’wini ya ka n’wina, u va pfuna ku dyondza hi Yehovha ni ntshembo wa ku tsakela vutomi lebyi nga heriki.—Yoh. 17:3.