Hi Xihi Xikongomelo Xa Ku Fambisa Tidyondzo Ta Bibele?

¹ Ha yini hi fambisa tidyondzo ta Bibele? Xana xikongomelo xa hina i ku nyika vanhu vutivi ntsena, ku antswisa vutomi bya vona kumbe ku endla leswaku va va ni langutelo lerinene hi vumundzuku? Doo! Xikongomelo xa hina lexikulu i ku endla vanhu va va vadyondzisiwa va Yesu Kreste! (Mat. 28:19; Mint. 14:21) Hi yona mhaka leyi vanhu lava hi dyondzaka na vona va faneleke va ya evandlheni. Va ta endla nhluvuko wa moya ntsena loko va yi twisisa kahle nhlengeletano ya Vukreste.

² Ndlela Yo Xi Fikelela: Hambeta u khutaza xichudeni ku ta eminhlanganweni ya vandlha ta ha suka. (Hev. 10:24, 25) Hlamusela ndlela leyi minhlangano yi nga ta ri tiyisa ha yona ripfumelo ra xona, yi xi pfuna ku endla ku rhandza ka Xikwembu ni ndlela leyi ha yona xi nga ta kuma vanghana lavanene lava na vona va navelaka ku dzunisa Yehovha. (Ps. 27:13; 32:8; 35:18) Loko xi ku twa u phofula ndlela leyi u rhandzaka ni ku tlangela vandlha ni minhlangano ha yona, na xona xi ta navela ku ya.

³ Lava va ha dyondzeriwaka va fanele va twisisa leswaku nhlengeletano ya Yehovha yi ni vanhu va matiko hinkwawo lava rhandzanaka. Va kombise video leyi nge Jehovah’s Witnesses—The Organization Behind the Name ni leyi nge Our Whole Association of Brothers. Va pfune va vona leswaku Yehovha u tirhisa vanhu va timiliyoni lava tinyiketeleke emisaveni hinkwayo, leswaku va endla ku rhandza ka yena. Byela lava va ha dyondzeriwaka leswaku na vona Xikwembu xa va rhamba leswaku va xi tirhela.—Esa. 2:2, 3.

⁴ Swi tsakisa ngopfu ku vona xichudeni xa Bibele xi va mudyondzisiwa wa ntiyiso wa Yesu. Lexi hi xona xikongomelo xa hina xa ku fambisa dyondzo ya Bibele!— 3 Yoh. 4.