Mhaka Leyi Ha Yona Hi Rhandzaka Nhlengeletano Hinkwayo Ya Vamakwerhu
Emisaveni ya namuntlha leyi nga riki na rirhandzu, xana hi nga endla yini leswaku rirhandzu leri hi nga na rona eka vamakwerhu va moya ri tshama ri ri karhi ri pfurha swinene? (1 Pet. 2:17) Hi nga va komba njhani vanhu van’wana leswaku ha rhandzana hakunene ni vamakwerhu va misava hinkwayo? (Mat. 23:8) Hi ku tirhisa vhidiyo leyi nge Our Whole Association of Brothers. Yi komba swivangelo swa ku rhandzana ka hina. Vona loko u nga swi kota ku hlamula swivutiso leswi:
(1) Hi swihi swilo swinharhu leswi hi swi endlaka hinkwerhu tanihi vamakwerhu va misava hinkwayo? (2) Vamakwerhu va wu kombisa njhani moya wa ku tiyimisela ku chumayela (a) emananga ya le Alaska, (b) emahlalukweni lamakulu ya le Yuropa ni (c) le makhwatini lama tlhumeke ya le Peru? (3) Hi wihi nchumu lowu humelelaka ngopfu lowu hi wu tirhisaka eku chumayeleni? (4) Ha yini hi nga fanelanga hi anakanya leswaku ku chumayela i ntirho lowu tifanelaka ni mintirho yin’wana? (5) Nyika swikombiso swa ndlela leyi Timbhoni ta Yehovha ti chaveleleke ni ku pfuna van’wana ha yona eminkarhini ya timhangu—ta ku tsekatseka ka misava, swidzedze ni tinyimpi ta xin’wana-manana. (Vona tinhlamuselo ta Takao eka tluka 23 ra Xalamuka! [ya Xinghezi] ya August 22, 1995, kun’we ni tinhlamuselo ta Kotoyo eka tluka 18 ra Xalamuka! ya November 8, 1996.) (6) Hinkwerhu hi nga wu kombisa njhani hi ku kongoma mfungho lowukulu lowu hi tiviwaka ha wona tanihi vamakwerhu lava nga Vakreste? (Yoh. 13:35) (7) Xana hi fanele hi yi tlangela ku fikela kwihi minhlangano ya hina ya vandlha? (8) Ku va ni Holo ya Mfumo yo hlanganyela eka yona swi va khumba njhani lava eku sunguleni a va nga ri na yona? (9) Vamakwerhu va le Yuropa Vuxa ni le Rhaxiya va endle yini leswaku va tshama va hanyile emoyeni loko va ha yirisiwile? (10) Hi wahi matshalatshala lamakulu lawa ni sweswi ma endliwaka hi Timbhoni to tala leswaku ti va kona eminhlanganweni, naswona ha yini? Xana sweswo swi ku khumbe njhani wena? (11) Ha yini u tiyimisele ku gandzela swin’we ni van’wana hi vun’we, ku pfuna van’wana loko ku ri ni xilaveko ni ku chumayela hi ku tshembeka kwihi ni kwihi loko u pfulekeriwa hi nkarhi? (12) Ha yini swi ri swinene ku kuma kopi ya vhidiyo leyi kutani u yi komba vanhu lava tsakelaka vo tala hilaha swi nga kotekaka hakona?