Twarisa Rungula Ra Mfumo
1 “Ndzi fanele ku vula mahungu lamanene ya mfumo wa Xikwembu, hikuva hi swona leswi ndzi rhumeriweke swona.” (Luka 4:43) Hi marito wolawo, Yesu u kombise nchumu lowu nga wa nkoka evutirhelini bya yena—ku nga Mfumo wa Xikwembu. Ni rungula leri hi ri twarisaka namuntlha ri vulavula hi Mfumo, hilaha ku profetiweke hakona eka Matewu 24:14 leyi nge: “Mahungu lamanene lawa ya mfumo ma ta chumayeriwa emisaveni hinkwayo leyi akiweke leswaku byi va vumbhoni ematikweni hinkwawo; kutani hi kona makumu ma nga ta fika.” I ntiyiso wihi lowu vanhu va faneleke va wu twa malunghana ni Mfumo wa Xikwembu?
2 Mfumo wa Xikwembu se wa fuma ematilweni naswona ku nga ri khale wu ta siva vulawuri hinkwabyo bya vanhu. Diyavulosi ana se u hlongoriwile etilweni, naswona nkarhi wa mafambiselo ya namuntlha ya swilo wu kusuhi ni ku hela. (Nhlav. 12:10, 12) Mafambiselo ya khale ya Sathana lama hombolokeke ma ta loviseriwa makumu, kambe Mfumo wa Xikwembu a wu nge tsekatsekisiwi hi nchumu. Wu ta tshama wu ri kona hi masiku.—Dan. 2:44; Hev. 12:28.
3 Mfumo wu ta endla leswaku vanhu hinkwavo lava yingisaka va kuma swilo leswinene leswi va swi lavaka. Wu ta herisa maxangu lama vangiwaka hi nyimpi, vugevenga, ku tshikileriwa ni vusweti. (Ps. 46:8, 9; 72:12-14) Ku ta va ni swakudya swo tala swa vanhu hinkwavo. (Ps. 72:16; Esa. 25:6) Vuvabyi ni vulema swi ta va swi herile. (Esa. 33:24; 35:5, 6) Loko vanhu va va lava hetisekeke, misava yi ta hundzuriwa paradeyisi, naswona va ta hanyisana hi ku rhula.—Esa. 11:6-9.
4 Ndlela leyi hi hanyaka ha yona sweswi hi yona yi kombisaka loko hi lava ku va ehansi ka Mfumo wa Xikwembu. Rungula ra Mfumo ri fanele ri lawula vutomi bya hina hinkwabyo, ku katsa ni tipakani ta hina ni leswi hi swi rhangisaka evuton’wini. Hi xikombiso, hambileswi hi nga ni vutihlamuleri bya ku wundla mindyangu ya hina, hi fanele hi vona leswaku timhaka ta Mfumo a ti kamanyetiwi hi ku karhatekela swilo leswi vonakaka. (Mat. 13:22; 1 Tim. 5:8) Ku ri na sweswo, hi fanele hi yingisa xitsundzuxo xa Yesu lexi nge: “Kutani, hambetani mi lava mfumo ni ku lulama ka yena ku sungula, xisweswo swilo leswin’wana hinkwaswo [swilaveko swa vutomi] mi ta engeteleriwa swona.”—Mat. 6:33.
5 Vanhu va fanele va hatla va twa rungula ra Mfumo kutani va teka goza va nga si siyiwa hi nkarhi. Onge hi nga va pfuna ku endla tano hi ku “tirhisa timhaka leti khorwisaka malunghana ni mfumo wa Xikwembu.”—Mint. 19:8.