Xana U Nga Pfula Kaya Ra Wena?
1 Eka lembe-xidzana ro sungula, Vakreste vo tala va pfule makaya ya vona leswaku ma tirhiseriwa ku khoma minhlangano ya vandlha. (1 Kor. 16:19; Kol. 4:15; Film. 1, 2) Emavandlheni man’wana namuntlha, a ku na tindhawu leti eneleke ta mintlawa ya Dyondzo ya Buku ya Vandlha ni minhlangano ya ntirho wa nsimu. Sweswo swi endla leswaku mintlawa yin’wana ya dyondzo ya buku yi va ni vanhu va 30 kumbe ku tlula, kasi ku ringanyetiwa ntsengo wa vanhu va kwalomu ka 15.
2 Lunghelo Lerikulu: Xana u kale u anakanya hi ku pfula kaya ra wena ri va ndhawu yo khomela eka yona Dyondzo ya Buku ya Vandlha? Kamara leri kuleke ku ringana ri tlhela ri basa, ri va ni ku vonakala loku eneleke naswona ri nghenisa moya kahle, ri nga va leri faneleke emhakeni leyi. Tanihi leswi dyondzo ya buku ku nga nhlangano wa vandlha ni xiphemu xa lunghiselelo ra Yehovha ro letela vanhu va yena, ku khomiwa ka dyondzo ya buku ekaya ra wena i lunghelo lerikulu. Vo tala va vula leswaku va vuyeriwile hi tlhelo ra moya hi ku pfula makaya ya vona hi xikongomelo lexi.
3 Loko u vona onge kaya ra wena ra faneleka, u nga kanakani ku tivisa vakulu. Swi nga endleka va lava tindhawu leti engetelekeke. Loko swi nga koteki ku khomela dyondzo ya buku ekaya ra wena, xana minhlangano ya ntirho wa nsimu yi nga khomeriwa kona? Hambiloko ku nga si va ni xilaveko eka nkarhi wa sweswi, vakulu va ta swi tlangela ku tiva leswaku kaya ra wena ri pfulekile. U nga tsakela lunghelo leri enkarhini lowu taka.
4 Ku Kombisa Mahanyelo Lamanene: Loko minhlangano yi khomeriwa ekaya ra makwerhu, vanhu hinkwavo va fanele va xixima nhundzu ya yena. Vatswari va fanele va tiyiseka leswaku vana va vona nkarhi hinkwawo va tshame laha ku dyondzeriwaka kona, va nga nghena-ngheni etindhawini tin’wana. Nakambe vaakelani va fanele va anakanyeriwa hi ku ka va nga kavanyetiwi swi nga fanelanga.—2 Kor. 6:3, 4; 1 Pet. 2:12.
5 Vaheveru 13:16 yi hi khutaza leswaku hi nga rivali “ku endla leswinene ni ku avelana swilo ni van’wana, hikuva Xikwembu xi tsakisiwa swinene hi switlhavelo swo tano.” Ku pfula kaya ra wena leswaku ku khomeriwa minhlangano ya vandlha kona i ndlela leyinene yo avelana leswinene ni van’wana ni ku “xixima Yehovha hi swilo swa wena swa nkoka.”—Swiv. 3:9.