Ku Huma Mpexeni—Xana Swi Nga Pfuna Munhu Leswaku A Andzisa Vutirheli Byakwe?
1 Vanhu vo tala lava tirhaka hi matimba, va wu rindze hi mahlo-ngati nkarhi lowu va nga ta huma mpexeni ha wona, leswaku va ta hambana ni ku tirha hi matimba ni mintshikilelo leyi taka ni ntirho wo tihanyisa. Hambiswiritano, hakanyingi ku huma mpexeni, hi ku hatlisa ku endla vanhu va titwa va nga ha tsakeli nchumu, va ri ni xivundza ni ku hatla va dyuhala. Leswi va nga riki na ntirho, va tshama va ri karhi va titshandza vusiwana. Phepha-hungu ra le Brazil ri vike leswaku vatirhela-mfumo lava humeke mpexeni va vilela hi swiphiqo swo tanihi ku ‘titwa va nga eneriseki, va hela mbilu, va titwa va nga sirhelelekanga ni ku titwa va nga rhandziwi kutani eku heteleleni va va ni ntshikilelo wa mianakanyo ni ku vona onge a va ha hanyeli nchumu.’
2 Ku hambana ni sweswo, Vakreste vo tala va teka ku huma mpexeni ku ri nkarhi wo andzisa vutirheli bya vona hi tlhelo ra moya. Makwerhu un’wana loyi a sunguleke ku phayona loko a ri ni malembe ya 65 ni mavhiki mambirhi u te: “A ndzi si tshama ndzi va ni nkarhi lowu fuweke hi mikateko evuton’wini bya mina, ku fana ni malembe ya khumbe lawa ndzi ma heteke ndzi karhi ndzi phayona.” Mpatswa wun’wana wu te: “Hi sungule ku va ni malembe ya hina yo tsakisa loko hi teke vuphayona.” Ina, eka vo tala, ku huma mpexeni ku va nyika nkarhi lowunene wo engetela vutirheli bya vona kutani va kuma mikateko leyi fuweke leyi humaka eka Yehovha.
3 Ku Tshama U Khomekile Hi Hala Tlhelo U Bindzula: Vanhu vo tala lava humeke mpexeni a va kulanga ha byona vulovolovo lebyi nga kona namuntlha naswona va dyondze ku tirha hi matimba ku sukela va ha ri vatsongo. Hambileswi va nga ha riki na wona matimba ya vuntshwa, va ha bindzula swinene. Ensin’wini ya rhavi rin’wana, 22 wa tiphesente ta maphayona—ku nga vamakwerhu va kwalomu ka 20 000—va ni malembe ya kwalomu ka 60 hi vukhale. Vanhu lava lava kuleke va hoxa xandla swinene entirhweni wo chumayela. Mintokoto ya vona ni timfanelo ta vona letinene, swi fuwisa mavandlha lawa va nga eka wona.—Yak. 3:17, 18.
4 Loko munhu a tshama a khomekile hi ntirho wa Vukreste, swi endla leswaku a va ni rihanyo lerinene ni ku hanya vutomi lebyi tsakisaka. Makwerhu wa xisati la nga ni malembe ya 84 hi vukhale, loyi a ngheneleke vuphayona loko a ha ku huma mpexeni, u te: “Ku fambisa tidyondzo ta Bibele to tala, eka vanhu lava tsakelaka, swi endla leswaku mianakanyo ya mina yi tshama yi xalamukile. A ndzi na movha, kutani ndzi famba-famba ngopfu hi milenge. Leswi swi ndzi pfuna leswaku ndzi tshama ndzi hanye kahle.” Mpatswa lowu kuleke lowu nga maphayona wu te: “Ntirho wo chumayela wu hi endla hi tshama hi xalamukile emianakanyweni ni le mirini. Hi tshama hi ri swin’we. Hi kuma minkarhi yo tala yo hleka hi tiphina hi vutomi.”
5 Ku Tirha Laha Ku Nga Ni Xilaveko: Vakreste van’wana lava humeke mpexeni, lava xiyimo xa vona xa timali xi va pfumelelaka, va rhurhile va ya laha ku nga ni xilaveko lexikulu xa vachumayeri va Mfumo. Van’wana va ndlandlamuxe vutirheli bya vona hi ku famba va ya tirha ensin’wini ya vanhu lava vulavulaka ririmi rimbe. Ku fana ni muapostola Pawulo, vahuweleri lava lava hisekaka va “endla swilo hinkwaswo hikwalaho ka mahungu lamanene, leswaku [va ta] ma avela van’wana.”—1 Kor. 9:23.
6 Mpatswa wun’wana wu sungule ku phayona endzhaku ka loko wu kurise majaha ya wona mambirhi. Endzhaku ko phayona malembe yo hlayanyana, wu sungule ku dyondza ririmi ra Xichayina. Sweswi wu le malembeni ya wona ya va-70, naswona ku nga ri khale wu tsakile loko wu vona ntlawa wa Machayina lowu a wu tirha na wona, wu hundzuka vandlha. I nkateko swinene ku va ni mimpatswa yo fana ni leyi!
7 A Ku Humiwi Mpexeni Entirhweni Wo Chumayela: Hambiloko vanhu vo tala va hetelela va huma mpexeni emintirhweni ya vona yo tihanyisa, a nga kona Mukreste ni un’we la humaka mpexeni entirhweni wa Xikwembu. Hinkwavo va fanele va hambeta va tshembeka “ku fika emakumu.” (Mat. 24:13, 14) Ina, van’wana hikwalaho ka vudyuhari, a va ha swi koti ku endla leswi engetelekeke entirhweni wa Yehovha ku fana ni le ku sunguleni. Kambe swa khutaza hakunene ku va vona va tirha hilaha va kotaka ha kona, hi mbilu hinkwayo! Rito ra Xikwembu ra va tiyisekisa leswaku Yehovha a nga ka a nga wu rivali ntirho wa vona ni ndlela leyi va ri rhandzeke ha yona vito ra yena.—Luka 21:1-4; Hev. 6:10.
8 Loko u ri ekusuhi ni ku huma mpexeni, ha yini u nga yi anakanyisisi hi xikhongelo ndlela leyi u nga ta wu tirhisa ha yona nkarhi wa wena? Hi ku pfuniwa hi Xikwembu, u nga kuma leswaku ku huma mpexeni ku ku pfulela ndlela yo andzisa vutirheli bya wena, leswi swi ta yisa ku dzuneka eka Yehovha swi tlhela swi ku tisela mikateko yo tala.—Ps. 148:12, 13.