Xikolo Xa Vutirheli Bya Le Tilweni Xa 2004

¹ Yehovha u hlomisa vanhu lava tolovelekeke leswaku va endla ntirho wa nkoka emisaveni hinkwayo. Ndlela yin’wana leyi a endlaka leswi ha yona i ku tirhisa ndzetelo wa Xikolo xa Vutirheli bya le Tilweni wa vhiki na vhiki. Xana u hlanganyela hi xitalo hilaha swiyimo swa wena swi ku pfumelelaka hakona? Hi January ku ta endliwa malunghiselelo ma nga ri mangani lama nga ta pfuna swichudeni leswaku swi vuyeriwa eka lunghiselelo leri.

² Ku Cincana Ka Vapfuni Va Mulanguteri Wa Xikolo: Vamakwerhu lava nyikelaka tinkulumo to laya ni tinhla-nkulu ta Bibele va swi tlangela swinene swiringanyeto leswi nyikeriwaka hi mupfuni wa mulanguteri wa xikolo. Loko ku ri ni vakulu van’wana lava fanelekaka, lembe ni lembe xiavelo xa ku va vapfuni va mulanguteri wa xikolo xi nga hundziseriwa eka nkulu un’wana. Loko ku endliwa leswi, ndzhwalo lowu a wu nge vi wa munhu un’we; naswona xa nkoka ngopfu ku ta vuyeriwa vakulu ni malandza ya vutirheli lama fanelekaka, hi ku kuma ntokoto wo huma eka swivulavuri ni vadyondzisi vo hambana-hambana lava va nga ni vuswikoti.

³ Ku Cinca Ka Siku Ra Bulo Ra Mpfuxeto: Loko vandlha ra ka n’wina ri ri na nhlengeletano ya xifundzha hi vhiki ra bulo ra mpfuxeto, mpfuxeto wu fanele wu endliwa eka vhiki leri landzelaka nhlengeletano, naswona xiyimiso xa vhiki leri landzelaka nhlengeletano xi fanele xi tirhisiwa enhlengeletanweni ya xifundzha. Hambiswiritano, a swi bohi leswaku ku cinciwa xiyimiso hinkwaxo xa vhiki loko bulo ra mpfuxeto ri kotlana ni ku endza ka mulanguteri wa xifundzha. Ku ri na sweswo, risimu, nkulumo ya tinhla to tirhela eka tona swin’we ni tinhla-nkulu ta Bibele ku ta nyikeriwa ta vhiki rero. Nkulumo yo laya (leyi nyikeriwaka endzhaku ka tinhla to tirhela eka tona) yi ta tekiwa eka xiyimiso xa vhiki leri landzelaka. Tinhla-nkulu ta Bibele ti ta landzeriwa hi Nhlangano wa Ntirho wa 30 wa timinete, lowu nga ta hleriwa hi swiyenge swinharhu leswi nga ni 10 wa timinete kumbe hi swiyenge swimbirhi leswi nga ni 15 wa timinete. (Switiviso a swi nge vi kona.) Nhlangano wa Ntirho wu ta landzeriwa hi risimu ni nkulumo ya 30 wa timinete leyi nyikeriwaka hi mulanguteri wa xifundzha. Xikolo xa Vutirheli bya le Tilweni xa vhiki leri landzelaka xi ta va ni nkulumo ya tinhla to tirhela eka tona ni tinhla-nkulu ta Bibele ta vhiki rero kutani ku landzela bulo ra mpfuxeto.

⁴ Tirhisa rin’wana ni rin’wana ra malunghiselelo lawa leswaku u kula hi tlhelo ra moya. Loko u ri karhi u vuyeriwa eka Xikolo xa Vutirheli bya le Tilweni, u khutaza vandlha ra ka n’wina, u hoxa xandla eku hetisiseni ka vuprofeta bya Bibele, naswona u endla leswaku Mutsari wa rungula leri ro hlamarisa leri hi ri twarisaka, a dzunisiwa.—Esa. 32:3, 4; Nhlav. 9:19.