Vuyimbeleri Lebyi Phyuphyisaka
1 Ku yimbelela ni ku yingisela vuyimbeleri i nchumu wa nkoka evugandzerini bya ntiyiso. EIsrayele wa khale, Asafa ni vamakwavo va yimbelele va ku: “Nkhensani Yehovha! . . . N’wi yimbeleleleni, n’wi yimbeleleleni miloti, ehleketisisani hi swiendlo swakwe hinkwaswo swo hlamarisa.” (1 Tikr. 16:8, 9) Namuntlha hi tlakusa marito ya hina hi yimbelelela Yehovha eminhlanganweni ya hina ya vandlha ya vhiki na vhiki. (Efe. 5:19) Eka yona hi kuma nkarhi lowunene wo dzunisa vito ra yena.—Ps. 69:30.
2 Ku yingisela ti-Kingdom Melody, ku nga tinsimu ta Mfumo ta okhestra, swi nga hi endla hi anakanya hi timhaka ta swa moya. Makwerhu un’wana wa xisati u te: “Loko vuyimbeleri lebyi byi ri karhi byi chaya, ndzi kota ku tsundzuka marito ya risimu ra kona. Kunene, yoleyo i ndlela leyinene yo anakanyisisa hi Yehovha hala tlhelo ndzi ri karhi ndzi tiphina hi vuyimbeleri!”—Filp. 4:8.
3 Laha Hi Nga Byi Tlangaka Kona: Ku tlanga ti-Kingdom Melody ekaya swi endla leswaku ndyangu wu tsaka wu tlhela wu va ni ku rhula. Ndyangu wun’wana wu tsarile: “Hi tshamela ku tlanga [vuyimbeleri] lebyi ekaya ni le movheni kambe a byi hi phirhi hikuva byi hleriwe leswaku byi khutaza. Minkarhi yo tala ti-Kingdom Melody ti endla mianakanyo ya hina yi lunghekela timhaka ta moya loko hi ri karhi hi tilunghiselela ku ya eminhlanganweni ya Vukreste kumbe loko hi khome ndlela yo ya enhlengeletanweni.” Makwerhu un’wana wa xisati u te: “Ta ndzi hungasa hakunene, loko ndzi ri eku endleni ka mintirho ya le kaya—loko ndzi ti yingiserile ni ntirho wo paka swiambalo a ndzi wu twi. Ndzi tiyimisele ku tlanga vuyimbeleri lebyi loko ndzi hele matimba. Vuyimbeleri lebyi bya nyanyula hakunene! . . . Risimu rin’wana ni rin’wana ra tsakisa.” Xana swi kona swiyimo leswi vuyimbeleri lebyi, lebyi phyuphyisaka byi nga ta ku pfuna eka swona?
4 Vuyimbeleri byo tala bya namuntlha byi kombisa moya wa misava. Vatswari va nga pfuna vana va vona leswaku va rhandza vuyimbeleri lebyi akaka hi ku hamba va tlanga ti-Kingdom Melody. Vanhu vo tala lava ku dyondziwaka na vona Bibele swin’we ni lava tsakelaka va ta swi tsakela ku yingisela tinsimu leti to xonga ta swa moya, leti vangamisaka Yehovha ni ku rhurisa moya.—Ps. 47:1, 2, 6, 7.