Malunghiselelo Lamantshwa Yo Hi Pfuna Leswaku Hi Papalata Ngati

Huvo leyi Fumaka yi nyike mpfumelelo wa leswaku ku hlanganisiwa tinhla ta nkoka ta rungula leri a ri ri eka papila ra le nawini leri vuriwaka durable power of attorney (DPA) [matimba ya gqweta lama nga ta tshama nkarhi wo leha] ni rungula ra khadi leri nge Advance Medical Directive/Release, leri se hi nga ta ri vitana khadi ra DPA. Ku lunghiseleriwe khadi ra DPA leri nga ta tirha ematikweni ya le dzongeni wa Afrika.

Khadi ra DPA a ri nge heleriwi hi nkarhi edzongeni wa Afrika naswona ri ta va mbhoni ya ndlela leyi u lavaka ku tshunguriwa ha yona etikweni rin’wana ni rin’wana laha u nga ta va u endzele kona. Enkarhini lowu taka, u fanele u tata khadi lerintshwa ra DPA loko (1) swo endleka leswaku u lava ku cinca swo karhi ekhadini ra wena ra DPA, swo kota ndlela leyi u navelaka ku tshunguriwa ha yona, vayimeri va wena va swa vutshunguri, adirese, nomboro ya riqingho ni swin’wana, kumbe loko (2) khadi ra wena ra DPA ri lahlekile kumbe ri onhakile.

U nga si tata khadi leri ra DPA ekaya, rhanga hi ku khongela ni ku anakanyisisa hi leswi tsariweke eka rona. Hambiswiritano, i swa nkoka leswaku u landzela endlelo ra le nawini hi vukheta u nga si sayina khadi ra wena. Hi xikombiso, ekhadini ra wena ku tsariwe leswaku u fanele u voniwa hi timbhoni timbirhi loko u sayina, kutani u fanele u endla tano. Valanguteri va tidyondzo ta buku va nga ha kambela nkarhi ni nkarhi loko ku ri ni lava va nga si tataka makhadi ya vona, ivi va va pfuna.

Loko u hetile hi khadi ra wena ra DPA, u nga si ri petsa, rhanga u endla tikopi ta tlhelo ha rin’we ra rona, hi phepha ra xiyimo xa le henhla, ivi u tinyika muyimeri wa wena wa ta rihanyo, muvulavuleri wa wena, dokodela wa wena kutani kopi yin’wana u yi veka efayeleni ya wena. Swi nga va swinene loko kopi yin’wana wo yi nyika swirho swin’wana swa ndyangu ni matsalana wa vandlha. Tikopi ti fanele ti va ta tlhelo ha rin’we ra phepha ra A-4 naswona u tiyiseka leswaku rungula hinkwaro ra khadi ra DPA ri helerile eka tikopi ta wena. Kutani u fanele u tshama u ri na khadi ra wena ra DPA kun’wana ni kun’wana laha u nga kona, ku nga ri kopi ya rona.

Khadi ra vana va Timbhoni lava nga vahuweleri lava nga khuvuriwangiki, leri vuriwaka Identity Card, leri tsariweke siku ra 3/99, a ri cincanga. Vatswari va fanele va tiyiseka leswaku n’wana un’wana ni un’wana u ni khadi ra yena naswona ri tatiwe kahle ri tlhela ri sayiniwa, nileswaku n’wana u tshama a ri na rona kun’wana ni kun’wana laha a nga kona.

Vahuweleri lava nga khuvuriwangiki va nga ha tirhisa rungula leri tsariweke eka khadi ra DPA ni ra Identity Card, leswaku va titsalela rungula ra ndlela leyi vona ni vana va vona va lavaka ku tshunguriwa ha yona, kutani va ri nyika va ta vutshunguri. Loko ku va ni vahuweleri lava khuvuriwaka exikarhi ka lembe, matsalana u fanele a va nyika makhadi ya vona ya DPA.