Va Pfune Leswaku Va Hambeta Va Twa Mahungu Lamanene
1 Loko hi ri karhi hi chumayela mahungu lamanene, hakanyingi hi hlangana ni vanhu lava nga tshamiki ensin’wini ya hina kumbe lava vulavulaka ririmi rin’wana ku katsa ni ririmi ra mavoko. Van’wana lava a hi dyondza na vona Bibele va nga ha rhurha ensin’wini ya hina. Xana hi nga hlela njhani leswaku vanhu volavo va ya mahlweni va chumayeriwa? Hi nga tirhisa fomo leyi nge Please Follow Up (S-43).
2 Hakanyingi vanhu va rhiya ndleve loko va chumayeriwa hi ririmi ra vona. (Mint. 22:1, 2) Loko hi hlangana ni vanhu vo tano, hi fanele hi xi tirhisa hilaha ku heleleke xitirho lexintshwa lexi nge Good News for People of All Nations, lexi ha ha ku xi kumaka entsombanweni wa muganga. Hikwalaho loko hi hlangana ni munhu la vulavulaka ririmi rimbe, hi boheka ku tata fomo leyi hambiloko a nga ri tsakeli rungula ra Mfumo. Hambiswiritano, laha ku nga ni vanhu vo tala lava vulavulaka ririmi rimbe lava chumayeriwaka hi ririmi ra rikwavo, a swi bohi leswaku ku tatiwa fomo handle ka loko ko va ni lava tsakelaka.
3 Ku Tata Fomo: Ringeta ku kuma vito ra munhu yoloye hi vutlhari, adirese yakwe ni nomboro yakwe ya riqingho. Tsala leswaku u tsakela ngopfu kumbe a nga tsakeli ngopfu, nkarhi lowu a nga kumekaka ha wona, nkandziyiso lowu u n’wi fambiseleke wona kumbe lowu a kombeleke leswaku a tiseriwa wona ni ririmi leri a ri twisisaka kahle. Loko u heta ku tata fomo, yi yise eka matsalana wa vandlha hi ku hatlisa, kutani yena u ta yi hundzisela evandlheni kumbe entlaweni lowu faneleke.
4 Ndlela Yo Hundzisela Fomo: Loko matsalana a nga swi tivi leswaku i vandlha rihi kumbe ntlawa wihi lowu faneleke wu kuma fomo leyi kumbe a nga yi tivi adirese ya kona, a nga ha bela riqingho erhavini a kombela ku vulavula ni vamakwerhu lava tirhaka eka Territory Desk, kutani u ta kuma rungula leri engetelekeke. A swa ha bohi leswaku mi rhanga mi vulavula ni mulanguteri wa doroba loko mi rhumela fomo leyi.
5 Nkarhi wun’wana ni wun’wana loko vandlha kumbe ntlawa wu kuma fomo leyi nge Please Follow Up, ku fanele ku endliwa malunghiselelo yo tihlanganisa ni munhu yoloye hi xihatla. Loko hi ri karhi hi hisekela ku endla ntirho wa hina, hi nga tiyiseka leswaku Yehovha u ta pfula timbilu ta lava nga ni “mboyamelo lowunene eka vutomi lebyi nga heriki.”—Mint. 13:48.