Xana N’wana Wa Wena A Nga Swi Kota Ku Endla Xiboho Xa Nkoka?
1. I yini lexi vantshwa lava nga Timbhoni va tiyimiseleke ku xi endla loko swi ta emhakeni ya ngati? Endla xikombiso.
1 Xiboho lexi xa nkoka xi ta va xi khumba yini? Xi ta va xi khumba ku pomperiwa ngati. Hilaha swi kombisiweke hakona eka xihloko lexi nge, “Fambani Tanihi Lava Leteriwaka Hi Yehovha,” eka Xihondzo xo Rindza xa June 15, 1991, vana va Timbhoni ta Yehovha va boheke ku yima va tiyile, va swi veka erivaleni leswaku va tiyimiserile ku yingisa nawu wa Xikwembu emhakeni ya ngati nileswaku i wa nkoka eka vona hilaha wu nga wa nkoka hakona eka vatswari va vona. Xana swi nga endleka leswaku n’wana wa wena a boheka ku endla xiboho xo tano?
2. Hi yihi ndlela ya le nawini leyi huvo yin’wana yi yi tirhiseke eka n’wana loyi a aleke ku pomperiwa ngati, naswona vatswari lava nga Vakreste ni vana va vona va nga dyondza yini emhakeni leyi?
2 Xana Nawu Wu Ri Yini? Le United States, huvo leyi tlakukeke leyi nga tshama yi endla xiboho lexi khumbaka mfanelo ya n’wana yo ala ku pomperiwa ngati i Huvo-nkulu ya le Illinois. Loko huvo leyi yi ri karhi yi kambisisa mhaka leyi khumbaka makwerhu wa xisati loyi a a ri ni malembe ya 17 hi vukhale, yi endle xiboho lexi: ‘Loko vumbhoni byi twala naswona byi tshembisa leswaku n’wana u wupfile lerova a nga swi kota ku twisisa vuyelo bya magoza lawa a ma tekeke, ni leswaku u anakanya ku fana ni munhu lonkulu, leswi a dyondzisiweke swona swi n’wi nyika mfanelo ya nawu wa tiko ya ku pfumela kumbe ku ala ndlela leyi a tshunguriwaka ha yona.’ Ni laha Afrika Dzonga, nawu wa ma amukela mavonelo ya n’wana la wupfeke. Hikwalaho, loko madokodela kumbe valawuri va lava ku vona loko n’wana a ta swi kota ku tiendlela xiboho xa yena n’wini va nga ha n’wi vutisa swivutiso swo karhi ku twa vonelo ra yena emhakeni ya ngati. Muntshwa u fanele a swi twisisa kahle leswaku vuvabyi lebyi n’wi khomeke byi ni khombo ku fikela kwihi ni leswaku ndlela leyi a hlawulaka ku tshunguriwa ha yona yi nga va ni vuyelo byihi kutani a tiyimisela ku namarhela leswi vukhongeri bya yena byi n’wi dyondzisaka swona hi nawu wa Xikwembu emhakeni ya ngati.
3. Hi swihi swivutiso leswi vatswari va faneleke va tivutisa swona naswona ha yini?
3 Xana N’wana Wa Wena U Ta Hlamurisa Ku Yini? Xana vana va wena va nga swi kota ku hlamula loko va vutisiwa vonelo ra nawu wa Xikwembu emhakeni ya ngati? Xana va pfumela hi mbilu hinkwayo leswaku i Xikwembu xi hi lerisaka ku ‘papalata ngati’? (Mint. 15:29; 21:25) Xana va nga swi kota ku seketela leswi va swi pfumelaka hi ku tirhisa Matsalwa? Xana va na xona xivindzi xo seketela xiboho lexi va xi endleke emhakeni ya ngati loko madokodela ma vona onge vutomi bya vona byi le khombyeni, hambiloko vatswari va vona va nga ri kona? Tanihi leswi ‘nkarhi ni xiendlakalo lexi nga languteriwangiki swi hi welaka hinkwerhu,’ u nga va pfuna njhani vana va wena leswaku va kota ku langutana ni xiyimo lexi nga languteriwangiki lexi ringaka vutshembeki bya vona?—Ekl. 9:11; Efe. 6:4.
4, 5. (a) Hi byihi vutihlamuleri lebyi vatswari va nga na byona naswona va nga byi hetisisa njhani? (b) Hi wahi malunghiselelo lama nga kona lama nga pfunaka vatswari?
4 Vatswari, Xana Mi Nga Endla Njhani? Mi ni vutihlamuleri byo dyondzisa vana va n’wina leswaku Xikwembu xi ri yini emhakeni ya ngati. (2 Tim. 3:14, 15) Nhlamuselo leyi twisisekaka yi kumeka ebukwini leyi nge Ku Hlamulana, matluka 179-82. Dyondza nhlamuselo leyi hi vukheta ni ndyangu wa wena. Tirhisa nhloko-mhaka leyi nge “Loko Munhu A Ku—” leyi nga eka tluka 183-4, u praktisa ni vana va wena leswaku va kota ku hlamusela leswi va swi pfumelaka ni leswaku ha yini va swi pfumela. (1 Pet. 3:15) Xin’wana lexi nga ku pfunaka leswaku u dyondzisa vana va wena hi mhaka ya ngati i broxara leyi nge Xana Ngati Yi Nga Byi Ponisa Njhani Vutomi Bya Wena? ni Xihondzo xo Rindza xa June 15, 2004, matluka 14-24. Nakambe vhidiyo leyi nge Transfusion-Alternative Health Care—Meeting Patient Needs and Rights ni leyi nge No Blood—Medicine Meets the Challenge, leti sweswi ti kumekaka eka DVD leyi nga ni xihloko lexi nge Transfusion Alternatives—Documentary Series, ti nyika vumbhoni lebyi khorwisaka bya leswaku ku tshungula handle ko tirhisa ngati swa twisiseka naswona swa pfuna. Xana ndyangu wa wena wu ti hlalerile tivhidiyo leti naswona se mi burile ha tona sweswinyana?
5 Pfuna vana va wena va “tiyiseka hi ku rhandza ka Xikwembu loku nga kunene ni loku amukelekaka ni loku hetisekeke” emhakeni ya ngati. Hi ndlela yoleyo va ta kota ku tiendlela xiboho xa nkoka lexi katekisiweke hi Yehovha.—Rhom. 12:2.