Khathalela Van’wana—Hi Ku Languta N’wini Wa Muti eXikandzeni
1 Hakanyingi loko hi chumayela vanhu hi yindlu ni yindlu ni le ndhawini ya mani na mani, hi rhanga hi ku languta vanhu exikandzeni hi nga si sungula ku vulavula na vona. Hi xinkarhana xexo, hi nga kota ku vona loko va swi lava ku vulavula na hina kumbe va nga swi lavi niloko va tsakile kumbe va hlundzukile. Na vona ku ni swo tala leswi va nga swi vonaka eka hina. Loko wansati un’wana a vulavula hi Mbhoni leyi nga tshama yi n’wi endzela, u te: “Lexi ndzi xi tsundzukaka hi leswaku ku n’wayitela ka yena a ku ndzi byela leswaku u rhurile. Sweswo swi endle leswaku ndzi lava ku twa mhaka leyi a nga ta ha yona.” Ku n’wayitela koloko ku endle leswaku wansati loyi a yingisa mahungu lamanene.
2 Ku va languta exikandzeni vanhu lava hi vulavulaka na vona i ndlela leyinene yo kota ku byela vanhu mahungu lamanene loko hi ri karhi hi chumayela exitarateni kumbe etindhawini ta mani na mani. Makwerhu un’wana u va languta eswikandzeni vanhu lava va taka va kongome laha a nga kona. Loko ku ri ni loyi a hlanganaka na yena hi matihlo wa n’wayitela kutani a n’wi komba magazini. Ndlela leyi yi n’wi pfuna leswaku a va ni mabulo lamanene ni vanhu vo tala nileswaku a fambisa minkandziyiso yo tala.
3 Xiya Ndlela Leyi Van’wana Va Titwaka Ha Yona: Ku languta vanhu exikandzeni swi ta hi pfuna leswaku hi xiya ndlela leyi van’wana va titwaka ha yona. Hi xikombiso, loko munhu a nga swi twisisi leswi hi swi vulaka kumbe a nga pfumelelani na hina, u ta vonaka exikandzeni. Loko a khomekile kumbe a hi helela mbilu, hi ta n’wi vona exikandzeni. Kutani hi ta kota ku cinca ndlela leyi hi vulavulaka ha yona kumbe hi komisa bulo ra hina. Ku anakanyela ndlela leyi van’wana va titwaka ha yona i ndlela leyinene yo kombisa leswaku ha va khathalela.
4 Ku Tshembeka Ni Ku Khorwiseka: Eka mindhavuko yo tala loko u languta munhu exikandzeni swi kombisa leswaku wa tshembeka. Xiya ndlela leyi Yesu a anguleke ha yona loko vadyondzisiwa va yena va n’wi vutise va ku: “Kahle-kahle i mani la nga ponisiwaka?” Bibele yi ri: “Loko a va languta exikandzeni, Yesu a ku eka vona: ‘Eka vanhu leswi a swi koteki, kambe eka Xikwembu swilo hinkwaswo swa koteka.’” (Mat. 19:25, 26) Swi le rivaleni leswaku ku khorwiseka loku Yesu a ku kombiseke exikandzeni xa yena ku endle leswaku leswi a swi vulaka swi va swa ntikelo swinene. Hilaha ku fanaka, ku languta vanhu exikandzeni ku ta hi pfuna leswaku hi tshembeka naswona hi khorwiseka loko hi ri karhi hi chumayela rungula ra Mfumo.—2 Kor. 2:17; 1 Tes. 1:5.