Hlakulela Xiyimiso Lexinene Xa Swa Moya, U Ta Kuma Mikateko Yo Tala
1. Ha yini swi pfuna ku kambisisa xiyimiso xa hina xa timhaka ta swa moya?
1 Loko wa ha ku va Mbhoni, a swi kanakanisi leswaku a wu endla matshalatshala yo tala leswaku u va ni xiyimiso lexinene xo endla mintirho hinkwayo ya swa moya leyi katsaka ku dyondza Bibele, ku va kona eminhlanganweni, ensin’wini ni ku khongela. U kurile hi tlhelo ra moya hileswi Yehovha a katekiseke matshalatshala ya wena. Kumbexana se ku hundze malembe yo hlayanyana u khuvuriwile. Xana wa ha namarhele xiyimiso lexinene xa timhaka ta moya lexi u xi sunguleke loko u va Mbhoni?
2. Xana hi vuyeriwa njhani hi ku hlaya Bibele siku ni siku?
2 Kambisisa Xiyimiso Xa We-na: Xana i mukhuva wa wena ku hlaya Rito ra Xikwembu siku ni siku? Hakunene hi kuma mikateko leyi fuweke loko hi endla tano! (Yox. 1:8; Ps. 1:2, 3) Le Israyele wa khale, hosi yin’wana ni yin’wana a yi fanele yi tihlayela Nawu eka buku-nsongwa ya yona ‘masiku hinkwawo ya vutomi bya yona.’ Vuyelo bya kona a byi ri byihi? A yi ta va ni mbilu yo titsongahata yi tlhela yi dyondza ku chava Yehovha leswaku yi nga hambuki eka milawu ya Yena. (Det. 17:18-20) Ninamuntlha, ku hlaya Bibele siku ni siku swi hi pfuna ku tshama hi nga ri na xivati ni ku tshama hi tshembekile emisaveni leyi yo homboloka. Swi tlhela swi hi pfuna leswaku hi tshama hi hlomisiwe hi ku helela entirhweni wa hina wo chumayela.—Filp. 2:15; 2 Tim. 3:17.
3. Hi yihi mikateko leyi hi yi kumaka loko hi va kona eminhlanganweni minkarhi hinkwayo?
3 Yesu a a tolovele ku ya esinagogeni laha a a fika a vulavula hi Matsalwa. (Luka 4:16) A swi kanakanisi leswaku leswi swi n’wi tiyisile leswaku a kota ku langutana ni miringo leyi a ya ha ri ndleleni. Na hina ha tiyisiwa hi ndzetelo wa moya lowu hi wu kumaka eminhlanganweni ya vandlha ni hi ku “khutazana.” (Rhom. 1:12) Ku hlengeletana ni vamakwerhu swi hi pfuna ku tiyisela swiphiqo swa minkarhi leya makumu. (Hev. 10:24, 25) Xana wa ha ri mukhuva wa wena ku va kona eminhlanganweni hinkwayo?
4. Xana ku huma nsimu vhiki ni vhiki swi hi pfuna njhani?
4 Matsalwa lama huhuteriweke ma hi byela leswaku vaapostola va hlanganyele eku twariseni ka mahungu lamanene “siku ni siku etempeleni ni hi yindlu ni yindlu.” (Mint. 5:42) Hambileswi swi nga ha endlekaka leswaku hi nga swi koti ku chumayela siku ni siku, xana hi nga swi endla mukhuva ku hlanganyela eka lunghiselelo rin’wana ro chumayela vhiki rin’wana ni rin’wana? Loko hi endla tano, a swi kanakanisi leswaku hi ta va ni vutshila byo chumayela Rito ra Xikwembu, naswona hi ta tiphina hi mintokoto leyi khutazaka loko hi ri karhi hi dyondzisa van’wana ntiyiso wa Bibele.
5. Ha yini swi ri swa nkoka ku khongela eka Yehovha minkarhi hinkwayo?
5 Muprofeta Daniyele u vuyeriwe swinene hi ku tirhela Yehovha “nkarhi hinkwawo” evuton’wini byakwe. Leswi a swi katsa mukhuva wakwe wo khongela eka Yehovha minkarhi hinkwayo. (Dan. 6:10, 16, 20) Hilaha ku fanaka, loko hi khongela eka Yehovha minkarhi hinkwayo, u ta hi nyika moya wakwe wo kwetsima. (Luka 11:9-13) Ku tlula kwalaho, Yehovha u hi angula hi ku hi tshineta ekusuhi na yena, a hi pfumelela leswaku hi tiphina hi vuxaka lebyikulu na yena. (Ps. 25:14; Yak. 4:8) Mawaku vuyelo lebyikulu swonghasi! Hikwalaho, a hi tikarhateni hi matimba leswaku hi namarhela xiyimiso lexinene xa timhaka ta swa moya kutani Yehovha u ta hi katekisa swinene.