Nongonoko Lowuntshwa Wa Nhlengeletano Ya Xifundzha

Yehovha u faneriwa hi ku vangamisiwa. Hi nga n’wi vangamisa njhani Yehovha? Hi yihi mintlhontlho leyi van’wana va langutanaka na yona loko va ri karhi va vangamisa Yehovha? Hi yihi mikateko leyi kumiwaka hi lava va vangamisaka Xikwembu sweswi? Nongonoko wa nhlengeletano ya xifundzha ya lembe ra ntirho ra 2008 yi ta hlamula swivutiso leswi hi ndlela leyi enerisaka. Yi ni nhloko-mhaka leyi nge: “Endlani Hinkwaswo Leswaku Mi Vangamisa Xikwembu.” (1 Kor. 10:31) Xiya leswi ku nga ta va ku tlhuvutsiwa swona eka masiku mambirhi, lawa hi nga ta kuma ndzayo leyi fuweke hi tlhelo ra moya.

Mulanguteri wa muganga u ta tlhuvutsa nkulumo leyi nge “Ha Yini Hi Fanele Ku Vangamisa Xikwembu?” ni leyi nge “Vana Xikombiso Lexinene Eku Hetisiseni Ka Swilaveko Swa Xikwembu.” U ta tlhela a nyikela nkulumo ya le rivaleni leyi nge “I Vamani Lava Vangamisaka Xikwembu?” swin’we ni nkulumo yo gimeta leyi nge “Ku Vangamisa Xikwembu Hi Vun’we eMisaveni Hinkwayo.” U ta tlhela a fambisa Xikolo Xa Vutirheli Bya Le Tilweni. Mulanguteri wa xifundzha u ta vulavula hi tinhloko-mhaka leti nge “Tsaka Hileswi U Kombisaka Ku Vangama Ka Xikwembu,” “Ku Khathalela Swilaveko Swa Xifundzha,” ni leyi nge “Yimani ‘Mi Tiya eNtiyisweni,’” leyi sekeriweke eka 2 Petro 1:12. Hi ta tlhela hi dyondza hi ta ndlela leyi “Ntirho Wa Vuphayona Wu Vangamisa[ka] Xikwembu” ha yona. Eka xiyenge xo sungula xa tinkulumo ta nxaxamelo leti tlhontlhaka mianakanyo leti nga ta va ni nhloko-mhaka leyi nge “Ku Vangamisa Xikwembu eTimhakeni Hinkwato Ta Vutomi Bya Hina,” hi ta hlamuseriwa hi vuenti leswi vuriwaka hi marito lama huhuteriweke lama kumekaka eka 1 Vakorinto 10:31. Nkulumo ya nxaxamelo leyi nge “Ku Endla Ntirho Wo Kwetsima Leswaku Hi Dzunisa Yehovha” yi ta hi hlamusela swiyenge swo hambana-hambana swa vugandzeri bya hina. Hi ta tiphina hi nkatsakanyo wa Xihondzo xo Rindza swin’we ni bulo ra ndzimana ya siku hi Sonto. Ku ta tlhela ku va ni nkhuvulo.

Vanhu vo tala a va swi lavi ku pfumela eka Xikwembu. Vo tala va hambukisiwa hi marhengu ya vanhu leswaku va nga ku voni ku vangama ka Yehovha. (Yoh. 5:44) Kambe hina ha tiyiseka leswaku nkarhi lowu hi wu hetaka hi ri karhi hi anakanyisisa hi ndlela leyi hi nga ‘Endlaka Hinkwaswo Ha Yona Leswaku Hi Vangamisa Xikwembu’ i wa nkoka. Kunguhata ka ha ri emahlweni leswaku u va kona nileswaku u vuyeriwa eka tinkulumo hinkwato leti nga ta tlhuvutsiwa.