Nongonoko Lowuntshwa Wa Nhlengeletano Ya Xifundzha
Xana hi nga swi kotisa ku yini ku langutana ni vanhu lava lwaka ni vugandzeri bya ntiyiso hi ndlela ya tihanyi? Xana hi nga ma hlula njhani matshalatshala ya Sathana ya ku hi ringa leswaku hi tlhelela emisaveni leyi nga xi chaviki Xikwembu? Nongonoko wa nhlengeletano ya xifundzha ya lembe ra ntirho ra 2009 yi ta hlamula swivutiso sweswo swa nkoka. Nhloko-mhaka ya wona yi ri, “Hambeta U Hlula Swo Biha Hi Leswinene.” (Rhom. 12:21) Xiya leswi u nga ta phameriwa swona.
Mulanguteri wa muganga u ta nyikela tinkulumo leti nge “Hi Hlomiseriwe Ku Hlula Leswo Biha Hi Leswinene,” “Tivonele Eka Moya Wa Ku Titshemba Ngopfu!,” “Vubihi Hinkwabyo Byi Ta Hela Ku Nga Ri Khale!” ni leyi nge “Ku Tiyisa Ripfumelo Ra Hina Leswaku Hi Kota Ku Hlula Misava.” Mulanguteri wa xifundzha u ta nyikela nkulumo leyi nge “A Hi Tshameni Hi Xalamukile!,” leyi sekeriweke eka Varhoma 13:11-13, ni leyi nge “U Nga Heli Matimba Loko U Langutane Ni Maxangu,” leyi sekeriweke eka Swivuriso 24:10. U ta tlhela a nyikela ni leyi nge “Swilaveko Swa Xifundzha.” Nkulumo yin’wana leyi hi nga yi langutelaka hi mahlo-ngati hi leyi nge, “Xana U Nga Swi Kota Ku ‘Hlanganyela eVutirhelini Lebyi’—Hi Ku Va Phayona?” Nxaxamelo wo sungula wa tinkulumo wu ta va wu ri ni nhloko-mhaka leyi nge “Yimani Mi Tiyile, Mi Lwisana Ni Marhengu Ya Vukanganyisi Ya Diyavulosi.” Tinkulumo leti ti ta hi pfuna leswaku hi vona mano ya Diyavulosi lawa a ma tisaka hi ku tirhisa thekinoloji, vuhungasi ni dyondzo kutani hi ma papalata. Nxaxamelo wa vumbirhi wa tinkulumo wu ta va wu ri ni nhloko-mhaka leyi nge “Kuma Matimba Yo Kaneta Sathana eMasikwini Lawa Yo Homboloka,” kutani wu ta hi komba ndlela leyi hi nga yi tirhisaka ha yona ndzayo leyi huhuteriweke leyi nga eka Vaefesa 6:10-18.
Hi hlula muvangi wa leswo biha hi ku chumayela rungula ra Mfumo. (Nhlav. 12:17) Hi swona leswi endlaka leswaku Sathana a nga tshiki ku hlasela Timbhoni ta Yehovha! (Esa. 43:10, 12) Kambe u ta khomiwa hi tingana hikuva hi tiyimisele ku “hlula swo biha hi leswinene.” Endla malunghiselelo leswaku u ta vuyeriwa swinene eka swiyimiso leswa mune swa nhlengeletano ya xifundzha.