Endla Leswaku Swisiwana Swi Va Ni Ntshembo
1 Yesu a a karhateka swinene hi swisiwana. Minkarhi yin’wana a a swi pfuna hi swilo leswi vonakaka kasi leswi vabyaka a a swi hanyisa hi singita, kambe xikongomelo xa yena a ku ri ku twarisa “mahungu lamanene” eka swisiwana. (Mat. 11:5) Namuntlha ntirho wa hina tanihi Vakreste wu hambeta wu vuyerisa swisiwana swin’we ni van’wana.—Mat. 24:14; 28:19, 20.
2 Ntshembo Wa Xiviri: Hakanyingi vafundhisi va Vujagana va tshembisa swisiwana leswaku swilo swi ta swi fambela kahle loko swo nyikela hi mbilu yo basa ekerekeni. Hambiswiritano, Bibele yi dyondzisa leswaku i Mfumo wa Xikwembu ntsena lowu nga ta herisa vusweti ni ku tlhantlha swiphiqo hinkwaswo swa vanhu. (Ps. 9:18; 145:16; Esa. 65:21-23) Loko hi kombisa swisiwana leswi Bibele yi swi dyondzisaka hakunene, hi endla leswaku swi va ni ntshembo naswona hi swi pfuna leswaku swi tiva Xikwembu swi tlhela swi xi gandzela.—Mat. 5:3.
3 Vafarisi va le sikwini ra Yesu a va nga ri na mhaka ni swisiwana, a va swi vitana hi vito ro swi nyefula leri nge ‛am-ha·’aʹrets, kumbe “vanhu va tiko.” Hambiswiritano, Yesu u langute “ngati ya swona” kumbe vutomi bya swona byi ri bya “risima.” (Ps. 72:13, 14) Hi nga tekelela Yesu naswona hi ‘kombisa tintswalo’ eka swisiwana swo tano hi ku va ni musa swin’we ni ntwela-vusiwana. (Swiv. 14:31) A hi fanelanga hi vulavula ku biha hi vanhu lava tshamaka etindhawini leti nga evuswetini kumbe hi kanakana ku va chumayela. Swisiwana hi swona swi talaka ku amukela rungula ra Mfumo.
4 Pfuna Swisiwana Sweswi: Vanhu lava nga swisiwana lava nga ensin’wini ya hina, loko hi va dyondzisa misinya ya milawu ya Bibele, hi va pfuna leswaku va nga vileli ngopfu hi vusiwana lebyi va langutaneke na byona sweswi. Hi xikombiso, Bibele yi sola vudakwa, ku gembula, vulolo, ku dzaha fole ni swiendlo swin’wana leswi vangaka vusweti. (Swiv. 6:10, 11; 23:21; 2 Kor. 7:1; Efe. 5:5) Matsalwa ma khutaza ku tshembeka ni ku tirha hi “moya-xiviri hinkwawo,” ku nga timfanelo leti lavekaka eka lava thoriweke. (Kol. 3:22, 23; Hev. 13:18) Entiyisweni eka nkambisiso wun’wana vathori vo tala va vule leswaku ku tshembeka i yin’wana ya timfanelo leti va ti lavaka ngopfu eka lava lavaka ntirho.
5 Yehovha wa khathala hi ku xaniseka ka swisiwana. Ku nga ri khale Yesu Kreste u ta kutsula “xisiwana lexi kombelaka ku pfuniwa.” (Ps. 72:12) Loko ha ha rindzele nkarhi wolowo hi ni lunghelo ro chavelela van’wana, ku katsa ni swisiwana, hi rungula ra Bibele leri nyikaka ntshembo.