Dyondzo Ya Wena N’wini Swin’we Ni Dyondzo Ya Ndyangu I Swa Nkoka!
1. Xana i yini lexi kombisaka leswaku Huvo leyi Fumaka ya hi khathalela namuntlha naswona hi swi tivisa ku yini sweswo?
1 Hilaha a swi ri ha kona eka lembe-xidzana ro sungula, namuntlha Huvo leyi Fumaka yi endla hinkwaswo leswi yi nga swi kotaka leswaku yi khathalela vanhu va Yehovha. (Mint. 15:6, 28) Leswi nhlomulo lowukulu wu tshinelaka, i swa nkoka leswaku muhuweleri un’wana ni un’wana wa Mfumo a tiyisa vuxaka bya yena na Yehovha. Xana u ta wu tirhisa njhani nkarhi lowu a wu tirhiseriwa Dyondzo ya Buku ya Vandlha? Hinkwerhu hi khutaziwa leswaku nkarhi wolowo hi wu tirhisela dyondzo ya ndyangu. Loko nkarhi lowu hi wu tirhisa hi vutlhari, sweswo swi ta hi pfuna leswaku hi dyondza Rito ra Xikwembu naswona hi vuyeriwa eka leswi hi swi hlayaka eka rona.—Ps. 1:1-3; Rhom. 11:33, 34.
2. Hi nga yi hlela njhani dyondzo ya hina ya ndyangu?
2 Dyondzo Ya Ndyangu: Tinhloko ta mindyangu ti khutaziwa ku hetisisa vutihlamuleri bya tona hi ku va ti fambisa dyondzo ya ndyangu nkarhi ni nkarhi. (Det. 6:6, 7) Vamakwerhu lava nga siki nghenelaka vukati naswona va nga riki na vutihlamuleri bya ndyangu, nkarhi lowu va ta wu tirhisela dyondzo ya vona vini ya Bibele ni ku endla ndzavisiso. I swa nkoka eka hina hinkwerhu leswaku hi “tixavela nkarhi lowunene” wo dyondza ni ku anakanyisisa hi leswi hi dyondzeke leswaku hi tiyisa vuxaka bya hina na Yehovha ku nga khathariseki ‘masiku lawa yo homboloka’ lawa hi hanyaka eka wona.—Efe. 5:15, 16.
3, 4. I yini leswi ku ringanyetiwaka leswaku swi nga hi pfuna ku hlawula rungula leri hi nga ri dyondzaka, naswona sweswo swi ta hi vuyerisa njhani?
3 Leswi Mi Nga Swi Dyondzaka: Watch Tower Publications Index kumbe Watchtower Library leyi nga eka CD-ROM, yi nga mi pfuna leswaku mi kuma rungula leri mi nga ri dyondzaka ni ku endla leswaku dyondzo ya ndyangu yi tsakisa. Mindyangu yi nga ha dyondza swihloko leswi tshamaka swi ri karhi swi huma eka Xihondzo xo Rindza swo tanihi leswi nge “Magoza Ya Nkoka Ya Ku Va Ni Ntsako eNdyangwini,” “Dyondzisa Vana Va Wena” ni lexi nge “Ta Vantshwa Va Hina.” Nakambe yi nga ha dyondza nxaxamelo wa swihloko leswi nga eka Xalamuka! leswi nge “Vantshwa Va Vutisa” ni swin’wana leswi vulavulaka hi ntumbuluko.
4 Loko ndyangu wu hlaya Bibele swin’we wu nga tsutsumi, sweswo swi nga pfuna xirho xin’wana ni xin’wana xa ndyangu leswaku xi tsundzuka milawu ya Bibele leyi kongomisaka ni ku yi tirhisa evuton’wini bya xona. (Hev. 4:12) Minkarhi yin’wana mi nga ha hlalela yin’wana ya tivhidiyo ta nhlengeletano kutani mi bula ha yona. Leswi swi ta mi pfuna ku hlawula rungula leri mi nga ta ri dyondza ni ndlela leyi mi nga ri dyondzaka ha yona. U nga ha vutisa swirho swa ndyangu wa wena leswaku hi rihi rungula leri swi nga tsakelaka leswaku mi ri dyondza.
5. Ha yini dyondzo ya hina vini ya Bibele ni ya ndyangu swi ri swa nkoka evuton’wini bya hina namuntlha?
5 Xivangelo Xa Ku Va Yi Ri Ya Nkoka Sweswi: Ku tiyisa vuxaka bya hina na Yehovha swi ta hi pfuna leswaku hi ‘yima hi tiya kutani hi vona ku ponisa ka Yehovha.’ (Eks. 14:13) Vatswari va fanele va kuma nkongomiso wa Yehovha leswaku va kurisa vana va vona “exikarhi ka xitukulwana xo homboloka ni lexi gombonyokeke.” (Filp. 2:15) Vana va lava ku pfuniwa leswaku va kota ku langutana ni mahanyelo yo biha lama nga kona eswikolweni namuntlha. (Swiv. 22:3, 6) I swinene leswaku mimpatswa yi tiyisa ‘ntambhu ya yona ya miluko yinharhu.’ (Ekl. 4:12) Onge hi nga wu tirhisa hi vutlhari nkarhi lowu saleke leswaku hi tiaka ‘eripfumelweni ra hina ro kwetsima!’—Yudha 20.