Leswi Hi Nga Swi Vulaka Loko Hi Fambisa Timagazini

Xihondzo xo Rindza October 1

“Vanhu vo tala a va ha ri na ripfumelo eka Muvumbi. U ehleketa leswaku xiphiqo xi ve kwihi? [Yimela nhlamulo.] Tindzimana leti ta Bibele ti hi nyika xivangelo xin’we. [Hlaya Habakuku 1:2, 3.] Xihloko lexi xi hi hlamulela swin’wana swa swivutiso leswi tolovelekeke malunghana ni Xikwembu, swin’we ni swin’wana leswi nga endla leswaku vanhu va nga ha vi na ripfumelo eka xona.” N’wi kombe xihloko lexi sungulaka eka tluka 11.

Xalamuka! October

“Xana wa swi xiya leswaku namuntlha mindyangu yo tala yi langutana ni swiphiqo? [Yimela nhlamulo.] Vanhu vo tala a va yi tivi ndzayo leyi pfunaka leyi nga eBibeleni. Hi lexi xikombiso xin’wana. [Hlaya tsalwa leri nga eka magazini wolowo.] Xalamuka! leyi yo hlawuleka yi kombisa ndlela leyi milawu ya Bibele yi nga yi pfunaka ha yona mindyangu leswaku yi langutana ni swiyimo swo hambana-hambana.”

Xihondzo xo Rindza November 1

“Xana u ehleketa leswaku swilo hinkwaswo leswi dyondzisiwaka etikerekeni swi huma eBibeleni? [Yimela nhlamulo.] Bibele yi hi khutaza leswaku hi tivonela leswaku hi nga kanganyisiwi hi tidyondzo ta mavunwa. [Hlaya Vakolosa 2:8.] Magazini lowu wu paluxa tidyondzo ta tsevu leti tolovelekeke kambe leti nga fambisaniki ni Rito ra Xikwembu.”

Xalamuka! November

“Switirhisiwa swo tanihi selfoni kumbe khompyuta se swi tirhisiwa ngopfu namuntlha. Xana u ehleketa leswaku thekinoloji yi hlayisa nkarhi kumbe yi dya nkarhi? [Yimela nhlamulo.] Vo tala va nga pfumelelana na xona xikhutazo lexi xa ku tirhisa nkarhi hi ndlela leyinene. [Hlaya Vaefesa 5:15, 16.] Magazini lowu wu hlamusela ndlela leyi hi nga yi tirhisaka ha yona thekinoloji hi ndlela leyinene.”