Xana Tihlo Ra Wena Ra Olova?
1. Swi vula yini ku va ni ‘tihlo ro olova’?
1 Swilo leswi hi dzikisaka mahlo ya hina eka swona swi nga khumba swiendlo swa hina. Hakunene Yesu a a tiyisile loko a ku: “Kutani, loko tihlo ra wena ri olova, miri wa wena hinkwawo wu ta vangama”! (Mat. 6:22) Loko tihlo ra hina ri “olova” hi tlhelo ra moya, ri ta dzika eka nchumu wun’we ntsena, ku nga ku endla ku rhandza ka Xikwembu. Hi ta rhangisa Mfumo naswona a hi nge kavanyetiwi hi rifuwo leri nga pfuniki nchumu kumbe hi mintirho leyi nga hi sivelaka ku hetisisa vutirheli bya hina.
2. I yini leswi nga ha soholotaka ndlela leyi hi swi langutaka ha yona swilo, naswona i yini lexi nga hi pfunaka?
2 Xilaveko Xo Tikambisisa: Leswi hi swi lavaka swi nga ha soholotiwa hileswi vahaxi va mahungu va swi navetisaka kumbe hi ku navela leswi vanhu van’wana va nga na swona. Loko hi nga si xava nchumu wo karhi lowu nga hi dyelaka nkarhi, mali kumbe matimba, swi ta va swinene ku rhanga hi ku “hlayela ntsengo” hi ku tivutisa hi ku, ‘Xana nchumu lowu wu ta antswisa ntirho lowu ndzi wu endlelaka Yehovha kumbe wu ta wu kavanyeta?’ (Luka 14:28; Filp. 1:9-11) Nakambe i vutlhari ku tshama hi ri karhi hi tikambisisa ku vona leswaku hi nga byi olovisa njhani vutomi bya hina leswaku hi ndlandlamuxa vutirheli bya hina.—2 Kor. 13:5; Efe. 5:10.
3. I yini leswi hi swi dyondzaka eka makwerhu un’wana wa xisati la oloviseke vutomi byakwe?
3 Loko makwerhu un’wana wa xisati a nghenela vuphayona bya nkarhi hinkwawo, u hlawule ku ya emahlweni ni ntirho wakwe wo tihanyisa lowu a wu lava nkarhi wo tala, hambileswi a wu ri kona ntirho lowu a wu nga lavi nkarhi wo tala lowu a wu ta n’wi nyika mali leyi eneleke leswaku a khathalela swilaveko swakwe. Eku heteleleni u te: “Ku hava loyi a nga vaka hlonga ra tihosi timbirhi. Ndzi boheke ku tshika ku hlongorisa swilo leswi nga riki swa nkoka leswaku ndzi tikumela ntsena swilo swa xisekelo. Hi ku famba ka nkarhi rifuwo ra dzudzeka, loko a ndzi lo ya emahlweni ndzi hlongorisana na rona, vuyelo bya kona a ku to va nyuku wa mbyana.” Eku heteleleni swiyimo swakwe swi n’wi pfumelerile ku olovisa vutomi byakwe naswona u kume ntirho wun’wana lowu n’wi pfuneke leswaku a ya emahlweni a phayona.
4. Ha yini swi ri swa nkoka ku hlayisa tihlo ra hina ri olova sweswi?
4 I swa nkoka ku va ni tihlo ro olova eminkarhini leyi hi hanyaka eka yona. Loko siku rin’wana ni rin’wana ri hundza, ri hi tshineta ekusuhi swinene ni makumu ya mafambiselo lawa ya swilo ni le ku sunguleni ka misava leyintshwa ya Xikwembu. (1 Kor. 7:29, 31) Loko hi hisekela ntirho wo chumayela, hi ta tiponisa hina swin’we ni lava hi yingisaka.—1 Tim. 4:16.